ສປປລາວ ຍັງຂາດຄຣູສອນ

ຜູ້ແທນສະພາ ທ່ານນຶ່ງ ໄດ້ສະແດງ ຄວາມເຫັນວ່າ ເຖິງແມ່ນວ່າ ການສຶກສາ ຢູ່ສປປລາວ ຈະໄດ້ມີການ ພັທນາຫລາຍຂຶ້ນ ກໍດີ ແຕ່ໃນ ປັດຈຸບັນນີ້ ຢູ່ບາງເຂດຍັງ ມີບັນຫາຂາດເຂີນ ນາຍຄຣູ:

"ແຕ່ວ່າໃນສະພາບ ປັດຈຸບັນນີ້ ມັນຍັງມີຢູ່ ບ່ອນວ່າ ຄຣູນີ້ບໍ່ພຽງພໍ ຄຣູນີ້ທີ່ບໍ່ ພຽງພໍຫັ້ນ ພວກເຮົາກໍໄດ້ ແກ້ຢູ່ບ່ອນວ່າ ເອົານັກຮຽນຈົບ ມໍ 6 ເພື່ອໄປສອນ ຢູ່ຊົນນະບົດ".

ທ່ານເວົ້າອີກວ່າ ຄຣູທີ່ໄດ້ເອົາ ໄປສອນຢູ່ ຊົນນະບົດນັ້ນ ແມ່ນໄດ້ໃຫ້ ປະຊາຊົນລ້ຽງຊ່ວຍ ບາງບ່ອນກໍທັງ ປະຊາຊົນ ແລະທັງຣັດຊ່ວຍ ແລະຈຳນວນນຶ່ງ ກໍໄດ້ເອົາເງິນ ຂອງແຂວງອອກຊ່ວຍ.

ທ່ານວ່າ ຄຸນນະພາບ ການສຶກສາ ກໍຍັງຈະຕ້ອງ ໄດ້ຮັບການ ປັບປຸງຕື່ມອີກ ຄຣູທີ່ໄປສອນ ກໍຄວນໄດ້ຮັບ ການຍົກຣະດັບ ຕ້ອງໄດ້ມີການ ຝຶກອົບຮົມ ວິຊາຄຣູ ຊຶ່ງທີ່ຜ່ານມາ ກໍມີໂຄງການ ນີ້ແລ້ວແຕ່ຍັງ ບໍ່ທົ່ວເຖິງ:

"ຈາກນີ້ຄືຄຣູ ຊັ້ນມັທຍົມນີ້ ສ່ວນຫລາຍມັນຂາດ ດ້ານວິຊານັ້ນ ດ້ານວິຊານີ້ ເປັນຕົ້ນວ່າ ວິຊາເລຂ ວິຊາທັມມະສາຕ ນີ້ກໍຍັງ ຂາດເຂີນຫລາຍ ອັນນີ້ໝາຍ ຄວາມວ່າສິ ໃຫ້ຄຸນນະພາບ ການສຶກສາສູງ ນີ້ ມັນກໍຈະຕ້ອງ ໄດ້ໃຊ້ເວລາ".

ທ່ານເວົ້າອີກວ່າ ທີ່ຜ່ານມາ ເບິ່ງພາບລວມ ຂອງວຽກງານ ການສຶກສາ ກໍຖືວ່າດີຂຶ້ນ ເຊັ່ນທາງດ້ານ ປະຣິມານ ກໍເພີ້ມຫລາຍຂຶ້ນ ກວ່າແຕ່ກ່ອນ ທັງຈຳນວນນັກຮຽນ ຈຳນວນໂຮງຮຽນ ແລະທັງຄຸນນະພາບ ແລະວ່າ ຣັຖບານ ແລະຕ່າງປະເທດ ກໍໃຫ້ການ ສນັບສນູນ ຊ່ວຍເຫລືອຫລາຍຂຶ້ນ.