ບັນຫາ ກຸ່ມວັຍລຸ້ນ ທີ່ສ້າງຄວາມບໍ່ສງົບໃນເວລາກາງຄືນ ເປັນບັນຫາ ທາງດ້ານສັງຄົມ ບັນຫານື່ງ ໃນແຂວງສວັນນະເຂດ ທີ່ເຈົ້າຫນ້າທີ່ ກ່ຽວຂ້ອງ ກຳລັງປາບປາມ ກັນຢູ່ ໃນເວລານີ້ ດັ່ງເຈົ້າຫນ້າທີ່ ຈາກຫ້ອງການ ປາບປາມ ທ່ານນື່ງ ເວົ້າວ່າ:
“ກໍ່ມີຢູ່ ແຕ່ບໍ່ຮຸ່ນແຮງ ສ່ວນຫລາຍ ກໍ່ແມ່ນກຸ່ມວັຍລຸ້ນ ທີ່ອອກໄປ ມືນເມົາ ມາຕີກັນ ແລະ ອາຣະວາດກັນ ກໍ່ມີ ອາຍຸ ປະມານ 10 ປາຍປີ.”
ທ່ານກ່າວ ເພີ້ມອີກວ່າ ການຜິດຖຽງກັນ ສ່ວນໃຫຍ່ ຈະເກີດມາຈາກ ຄວາມນຸ່ມຄະນອງ ແລະ ການຢາກດີຢາກເດັ່ນ ກ່ວາກັນ ໃນກຸ່ມວັຍລຸ້ນ ພາຍຫລັງ ທີ່ດື່ມເຫລົ້າເມົາ. ເດັກວັຍລຸ້ນ ກຸ່ມທີ່ມີບັນຫາ ສ່ວນໃຫຍ່ ຈະແມ່ນເດັກນ້ອຍ ຢູ່ໃນເມືອງ ບໍ່ແມ່ນຢູ່ໃນ ເຂດຊົນນະບົດ ເພາະມີສີ່ງລໍ້ໃຈ ຫລາຍກວ່າ. ກ່ຽວກັບ ການແກ້ໄຂບັນຫາ ເຈົ້າຫນ້າທີ່ ທ່ານນັ້ນເວົ້າວ່າ:
“ມີການສືກສາ ອົບຣົມ ຖ້າຄັ້ງນື່ງ ຍັງບໍ່ຫລາບ ກໍ່ຈະມີການ ປັບໄຫມ ບາງທີ່ ກໍ່ອາດ ຈະຢູ່ ໃນປະມານ 50 ພັນ ຫລື ນື່ງແສນກີບ ສ່ວນຫລາຍ ກໍ່ມີບາງຄັ້ງ ບາງຄາວ ເລັກໆນ້ອຍໆ.”
ເຈົ້າຫນ້າທີ່ ອີກທ່ານນື່ງ ເວົ້າວ່າ ບັນຫາສ່ວນໃຫຍ່ ແມ່ນເກີດມາຈາກ ເດັກນ້ອຍ ທີ່ຂາດການສືກສາ ບໍ່ໄດ້ເຂົ້າໂຮງຮຽນ ຖານະ ຄວາມທຸກຈົນ ໃນຄອບຄົວ ແລະ ການຂາດວຽກເຮັດງານທຳ ໃນແຂວງສັນນະເຂດ ຈື່ງສະແດງອອກ ດ້ວຍການດື່ມເຫລົ້າ ແລະ ສ້າງບັນຫາ ດ້ວຍການຜິດຖຽງກັນ. ນອກຈາກນັ້ນ ທາງການແຂວງ ກໍ່ບໍ່ເອົາໃຈໃສ່ ໃນກຸ່ມເດັກ ດັ່ງກ່າວ ເພາະຂາດງົປມານ ແລະ ນັກວີຊາການ ທີ່ຈະມາແກ້ໄຂບັນຫາ.