ທະນາຍ ຂອງຍິງອັງກິດ ໃນຄະດີຢາເສບຕິດ ທ້າຕໍ່ ການຕັດສີນ ຂອງສານລາວ

ນາງ Samantha Orobator, ວັຍ20ປີ ຈາກປະເທດອັງກິດ ຖືກສານລາວຕັດສີນ ລົງໂທດ ຈຳຄຸກຕລອດຊີວິດ, ແລະ ໄດ້ຮັບອະນຸຍາດ ໃຫ້ໄປຮັບໂທດຕໍ່ ຢູ່ປະເທດອັງກິດ ເມື່ອຕົ້ນເດືອນນີ້, ຕາມຂໍ້ຕົກລົງ ລະຫວ່າງ ລາວແລະອັງກິດ.

ອົງການສິດທິມະນຸສ Reprieve ທີ່ຕາງໜ້ານາງ Orobator ຈະຍື່ນຂໍທ້າຕໍ່ ການຕັດສີນຂອງ ສານລາວ. ໂຄສົກກະຊວງຍຸຕິທັມ ອັງກິດກ່າວວ່າ, ຕາມທັມມະດາ ແລ້ວອັງກິດຕ້ອງ ປະຕິບັດຕາມ ການຕັດສີນລົງໂທດ ຈາກຕ່າງປະເທດ ຕໍ່ໄປ, ຖ້າບໍ່ດັ່ງນັ້ນ ນັກໂທດຊາວອັງກິດ ໃນຕ່າງປະເທດ ຄົນອື່ນໆ ກໍຕ້ອງໄດ້ໃຊ້ ໂທດກັມ ໃນປະເທດເຫລົ່ານັ້ນ.

ນາງ Orobator ຈາກເມືອງ Peckham ປະເທດອັງກິດ ຫລຸດພົ້ນຈາກການ ຖືກຕັດສີນ ປະຫານຊີວິດ, ໃນ ສປປລາວ ຍ້ອນວ່ານາງ ຖືພາມານ. ຊຶ່ງນາງຢືນຢັນ ວ່າໄດ້ນຳເຊື້ອ ຂອງນັກໂທດນຳກັນ, ສັກເຂົ້າຮວງໄຂ່ ເພື່ອໃຫ້ມີລູກ ແລະ ນາງຈະອອກລູກ ພາຍໃນເດືອນໜ້ານີ້.

ອົງການ Reprieve ວິຈານການດຳເນີນ ຄະດີໃນລາວວ່າ ‘ເປັນໜ້າລະອາຍ’ ໂດຍກ່າວວ່າ ນາງ Orobator ໄດ້ຖືກບັງຄັບ ໃຫ້ເຊັນເອກກະສານ ຫລາຍຢ່າງ ແລະ ບໍ່ໄດ້ຮັບການ ຊ່ອຍເຫລືອຈາກ ທະນາຍຄວາມອິສຣະ ໃນລາວເລີຍເພາະວ່າ ນາງ Orobator ໄດ້ຖືກຕັດສີນ ໃນເວລາອັນສັ້ນໆ, ໂດຍທີ່ຝ່າຍຈຳເລີຍ ບໍ່ມີໂອກາດໄດ້ ໃຫ້ການ ແຕ່ປະການໃດ.

ນາງ Clare Algar ຈາກອົງການ Reprieve ກ່າວວ່າ, ເນື່ອງຈາກວ່າເປັນຜູ້ຍິງ, ອາຍຸນ້ອຍທີ່ບໍ່ມີ ປະສົບການ, Samantha ຈຶ່ງຖືກເອົາປຽບ ຈາກຣັຖບານທີ່ ຕັ້ງໃຈໄວ້ແລ້ວວ່າ, ຈະລົງໂທດນາງ ໃຫ້ໄດ້.

ວິທີໃນການ ດຳເນີນຄະດີ ສະແດງໃຫ້ເຫັນວ່າ ທາງການລາວ ບໍ່ມີຈຸດປະສົງ ທີ່ຈະຊອກຫາ ຄວາມຈິງ, ຄວາມຖືກຕ້ອງ ແລະ ສິດທິທາງດ້ານ ກົດໝາຍເລີຍ BBC ລາຍງານ ໃນທີ່ສຸດ.