16ໝູ່ບ້ານ ໃນເມືອງຫີນເຫີບ ບໍ່ທັນມີ ໄຟຟ້າ

ປັດຈຸບັນນີ້ ການພັທນາ ພື້ນຖານໂຄງຮ່າງ ໂດຍສະເພາະການ ຕິດຕັ້ງຕໍ່ໄຟຟ້າ ໄປຫາໝູ່ບ້ານຕ່າງໆ ໃນເຂດ ເມືອງຫີນເຫີບ ແຂວງວຽງຈັນ ປາກົດວ່າ ຍັງອີກ10 ກວ່າໝູ່ບ້ານທີ່ຢູ່ ຫ່າງໄກສອກຫລີກ ບໍ່ທັນມີໄຟຟ້າໃຊ້. ດັ່ງທ່ານ ວົງວິຈິດ ທອງລາດ ເຈົ້າເມືອງ ເມືອງຫີນເຫີບ ແຂວງວຽງຈັນ ໄດ້ອະທິບາຍວ່າ:

"ບັນດາບ້ານທີ່ ຢູ່ຫ່າງໄກສອກຫລີກ ປັດຈຸບັນນີ້ ກໍຖືວ່າໄດ້ມີ ໄຟຟ້າໃຊ້ແລ້ວ ເວົ້າຮວມແລ້ວແມ່ນ ໝົດເມືອງເຮົານີ້ ຍັງເຫລືອປະມານ 16ບ້ານໃນຈຳນວນ 43ບ້ານ ທີ່ຍັງບໍ່ທັນມີ ໄຟຟ້າ."

ທ່ານໄດ້ເວົ້າ ຕໍ່ໄປວ່າ ສຳລັບປະຊາຊົນ ທີ່ຍັງບໍ່ທັນມີ ໄຟຟ້າໃຊ້ນັ້ນ ທາງການ ໄດ້ຊ່ອຍເຫລືອຈັດຕັ້ງ ໄຟຟ້າຈາກພລັງ ແສງຕາເວັນ ເພື່ອໃຫ້ພວກ ຂະເຈົ້າໄດ້ໃຊ້ ໄຟຟ້າສຳຮອງ ແລະຄາດວ່າໃນປີ 2012 ປະຊາຊົນ ໃນເມືອງຫີນເຫີບ ຈະມີໄຟຟ້າໃຊ້ ຢ່າງຖາວອນ ໃນທຸກໆບ້ານ.

ເຖິງຢ່າງໃດກໍຕາມ ທາງການ ແຂວງວຽງຈັນ ໄດ້ມີການຂຍາຍ ໄຟຟ້າຈາກພລັງ ແສງຕາເວັນ ເພື່ອໃຫ້ເຂົ້າໄປ ເຖິງປະຊາຊົນ ຕາມບ້ານທີ່ຢູ່ໃນ ເປົ້າໝາຍ ໂດຍ ສະເພາະ ທີ່ຢູ່ຫ່າງໄກ ສອກຫລີກ ເພື່ອປັບປຸງຊີວິດ ການເປັນ ຢູ່ຂອງຂະເຈົ້າ ໃຫ້ດີຂື້ນ. ການໃຊ້ໄຟຟ້າ ແສງຕາເວັນ ຈະມີຣາຄາ ຖືກກວ່າການຕໍ່ ສາຍໄຟຟ້າ ຖາວອນໄປຫາ ໝູ່ບ້ານຕ່າງໆ.

ດ້ວຍເຫດນີ້ ຫລາຍແຂວງໃນລາວ ທີ່ຢູ່ຕິດ ຊາຍແດນ ຈຶ່ງຊື້ກະແສໄຟ ຈາກປະເທດໃກ້ຄຽງ ເພາະສະດວກ ໃນການຕໍ່ສາຍໄຟ ແລະລາວບໍ່ມີ ງົບປະມານ ທີ່ຈະມາຊື້ ສາຍໄຟ ເພື່ອວາງຕິດຕໍ່ ລະຫວ່າງກັນໄດ້ ຍ້ອນມີຣາຄາສູງ.