ເກົາຫລີເໜືອ ຂໍປຶກສາກັບ ສະຫະຣັຖ ອະເມຣິກາ ທີ່ກຸງພຽງຢາງ ໃນບັນຫາ ນີວເຄລັຽ

ຖ້າຫາກວ່າລາຍງານນີ້ ເປັນຄວາມຈິງ ກໍໝາຍຄວາມວ່າ, ເກົາຫລີເໜືອ ໄດ້ເອົາບາດກ້າວໃໝ່ ໃນການເວົ້າຈາກັບ ປະຊາຄົມໂລກ, ຫລັງຈາກ ເກົາຫລີເໜືອຖືກ ສະຫະປະຊາຊາດ ລົງໂທດ ທາງດ້ານເສຖກີດ, ຍ້ອນເກົາຫລີເໜືອ ທົດລອງນີວເຄລັຽ ເມື່ອເດືອນພຶສພາ ຜ່ານມາ.

ລາຍງານໜັງສືພິມ JoongAng Ilbo ໂດຍອ້າງອິງໃສ່ ຄໍາເວົ້າ ຂອງນັກການທູດ ຂັ້ນສູງທີ່ ກຸງວໍຊິງຕັນ, ວ່າທ່ານ Stephen Bosworth ຈະເປັນຜູ້ນໍາພາ ຄນະຜູ້ແທນ ສະຫະຣັຖ ເດີນທາງໄປປະເທດ ເກົາຫລີໃຕ້ ປະເທດຈີນ ແລະຍີ່ປຸ່ນ ເສັຽກ່ອນ, ເພື່ອສົນທະນາ ບັນຫານີວເຄລັຽ ກ່ອນຈະເດີນທາງຕໍ່ ໄປຍັງກຸງພຽງຢາງ.

ໜັງສືພິມຢອນຮັບ ຂອງເກົາຫລີໃຕ້ ກໍລາຍງານຄ້າຍໆ ດຽວກັນນີ້ວ່າ, ເກົາຫລີເໜືອໄດ້ ເຊື້ອເຊີນສະຫະຣັຖ ໄປຢ້ຽມຢາມ ເກົາຫລີເໜືອ, ໃນເວລາທີ່ທ່ານ Bill Clinton ອະດີດ ປະທານາທິບໍດີ ສະຫະຣັຖ ໄດ້ເດີນທາງໄປ ເກົາຫລີເໜືອ ເພື່ອຂໍຮ້ອງໃຫ້ ເກົາຫລີເໜືອ ປ່ອຍນັກຂ່າວຊາວ ອາເມຣິກັນ ສອງຄົນ ທີ່ເກົາຫລີເໜືອ ຈັບໄວ້.

ຖ້າຫາກເປັນດັ່ງນັ້ນ, ກໍຈະເປັນຂີດໝາຍ ທໍາອິດ ຂອງການເຈຣະຈາ ໂດຍກົງຣະຫ່ວາງ ເກົາຫລີເໜືອ ກັບສະຫະຣັຖ ອະເມຣິກາ, ກ່ຽວກັບບັນຫາ ນີວເຄລັຽ.

ສ່ວນທາງສຖານທູດ ສະຫະຣັຖ ທີ່ກຸງໂຊນ ປະເທດເກົາຫລີໃຕ້ ຍັງຢືນຢັນວ່າ ສະຫະຣັຖ ມີຄວາມມຸ້ງໝາຍ ທີ່ຈະເຈຣະຈາ ໂດຍກົງກັບ ເກົາຫລີເໜືອ ແຕ່ຢູ່ໃນຂອບເຂດ ຂອງກອງປະຊຸມ 6ຝ່າຍ ດັ່ງທີ່ເຄີຍມີ ໃນລະຍະຜ່ານມາ.