ເສຖກິດ ເຂດອ່າງແມ່ນ້ຳຂອງ ຍັງຢູ່ໃນສະພາບຖອຍຫລັງ ສືບຕໍ່ໄປ.

ປະເທດໃນຂົງເຂດນີ້ ສ່ວນຫລາຍ ເປັນປະເທດທີ່ ຜລິດສິນຄ້າ ແລ້ວອາໃສສົ່ງ ໄປຂາຍ ໃນປະເທດອື່ນໆ ເປັນຕົ້ນປະເທດ ທີ່ຮັ່ງມີເຊັ່ນ: ສະຫະຣັຖ ອະເມຣິກາ ແລະ ສະຫະພາບຢູໂຣບ.

ແຕ່ໃນປັດຈຸບັນ ຄວາມຕ້ອງການສິນຄ້າ ຂອງປະເທດ ທີ່ຮັ່ງມີເຫລົ່ານີ້ ຍັງຕ່ຳຢູ່ ສະນັ້ນ ການຜລິດຢູ່ ປະເທດ ແມ່ນ້ຳຂອງ ຈຶ່ງຍັງຈະບໍ່ ທັນເພິ້ມຂື້ນງ່າຍໆ; ຕົວຢ່າງ ການຜລິດເສື້ອຜ້າ ຢູ່ກຳພູຊາ ບໍ່ພຽງແຕ່ບໍ່ ເພິ້ມຂື້ນເທົ່ານັ້ນ ແຕ່ຍັງຕົກຕ່ຳ ລົງເລື້ອຍໆ ເພາະຄວາມຕ້ອງການ ຢູ່ສະຫະຣັຖ ຕົກຕ່ຳ ໂຮງຕັດຫຍິບຢູ່ ກຳພູຊາ ລົດຄົນງານ ລົງຫລາຍໝື່ນຄົນ ແລະ ໂຮງງານ ຫລາຍສິບແຫ່ງ ຈຳເປັນຕ້ອງ ຢຸຕການຜລິດ ຫລືຫລຸດຜ່ອນ ການຜລິດລົງ.

ໜັງສືພິມ The Nation ຣາຍງານອີກວ່າ ເຖິງຢ່າງໃດ ກໍດີ ປະເທດໃນເຂດ ອ່າງແມ່ນ້ຳຂອງ ກໍຍັງມີພື້ນຖານ ດ້ານເສຖກິດດີ ເຊັ່ນມີ ແມ່ນ້ຳຂອງ ທີ່ມີປາ ສາມາດລ້ຽງ ຄົນເຖິງ60 ລ້ານຄົນໄດ້ ອັນທີ່ສອງ ພາກພື້ນນີ້ ອຸດົມສົມບູນ ໄປດ້ວຍຊັພຍາກອນ ທັມມະຊາດ ເກືອບທຸກຢ່າງ ປະຊາຊົນ ສາມາດ ຫາຢູ່ຫາກິນຕາມ ທັມມະຊາດໄດ້ ເຖິງວ່າເສຖກິດ ຂອງປະເທດ ຫລືຂອງໂລກ ຈະຕົກຕ່ຳ ປານໃດກໍຕາມ.