ກອງປະຊຸມ ຜູ້ນໍາ ເອເຊັຍ-ຢູໂຣບ

ປະທານ ສະຫະ​ພາບ ຢູ​ໂຣບ ທ່ານ ​​ໂຮ​ເຊ ບາ​ໂຣ​ໂຊ ກ່າວ​​ວ່າ ລະດັບ ຂອງ ການ​ຮ່ວມ​ໄມ້​ຮ່ວມ​ມື ຂອງ​ທົ່ວ​ໂລກ ທີ່​ບໍ່​ເຄີຍ​ມີ ​ມາ​ກ່ອນ ​ເປັນ​ທີ່​ຕ້ອງການ​ທີ່​ສຸດ ​ເພື່ອ​ຕໍ່ສູ້​ກັບ ວິ​ກິດ​ການ​ ໃນ​ຄັ້ງ​ນີ້.

ຈຸດ​ປະສົງ​ ຂອງ​ການ​ປະຊຸມ ຂອງກຸ່ມ 43 ປະ​ເທດ ​ຄັ້ງ​ນີ້ ອາດ​ຈະບໍ່​ໄດ້​ ຄໍາ​ຕອບ​ ​ເທົ່າ​ທີ່​ຄວນ ຍ້ອນ​ ປະ​ເທດ ທີ່​ເຂົ້າ​ຮ່ວມ​ນັ້ນ ​ແຕກ​ຕ່າງ​ກັນ ​ຢ່າງ​ຫລວງຫລາຍ ​ໃນ​ທຸກໆດ້ານ. ​ເຊັ່ນ​ປະ​ເທດ ທີ່​ມີ​ການ​ຄ້າ ​ເສຣີ ສິງກະ​ໂປ ປະ​ເທດ​ ເສດຖະກິດ ​ຍັກ​ໃຫຍ່ ​ເຢຣະມັນ ຮວມ​ໄປ​ເຖິງ ປະ​ເທດ ທຸກ​ຍາກ ພະ​ມ່າ ​ແລະ ປະ​ເທດ ທີ່​ບໍ່​ມີ​​ເຂດ​ແດນ ​ຕິດ​ກັບ ທະ​ເລ ສປປລາວ.

ປະທານາທິບໍດີ ຝັ່ຣງ​ເສດ ທ່ານ Nicolas Sarkozy ຢາກ​ໃຊ້ ອາ​ແຊມ ຊັກຊວນ ​ໃຫ້​ປະ​ເທດ ​ໃນ ​​ເອ​ເຊັຍ ຮ່ວມ​ໃນ​ການ ຕັ້ງ​ກົດ ລະບົບ​ນາຍທຶນ ​ນາໆ​ຊາດ. ​ໂຄສົກ ກະຊວງ​ການ ຕ່າງປະ​ເທດ​ຈີນ ທ່ານ Liu JianChao ຢາກ​ສ​ເນີ​ ​ໃຫ້ປ່ຽນ​ແປງ ລະບົບ ​ປັດຈຸບັນ ​ໂດຍ​ການ ​ເຮັດ​ໃຫ້ ສະຖານະ​ການ ດ້ານການ​ເງິນ​ ຂອງ​ໂລກ ທຸ່ນ​ທ່ຽງ​ຂື້ນ. ຮອງ ປະທານ ຂອງອົງການ​ ເງິນ​ກູ້ ຂອງ​ທາງ​ການ​ຈີນ ຄາດ​ວ່າ ວິ​ກິດ​ການ ຈະ​ສົ່ງ​ຜົນ​ກະທົບ ​ແກ່​ເສດຖະກິດ ພາຍ​ໃນ 6 ​ເດືອນ​ຂ້າງ​ໜ້າ ​ແລະ ຈະ​ບໍ່ ສ​ງົບ​ລົງ ​ໃນອະນາຄົດ​ ອັນ​ໃກ້​ນີ້.

ການ​ປະຊຸມ ມີ​ຂື້ນ​ທຸກໆ ສອງ​ປີ, ກອງ​ປະຊຸມ ຢູ​ໂຣບ ​ແລະ ​ເອ​ເຊັຍ ຫລື ທີ່​ຮູ້​ກັນ​ວ່າ ອາ​ແຊມ ຈະ​ບໍ່​ມີ​ຂໍ້​ຜູກ​ມັດ​ ໃນ​ການ​ຕັດ​ສີນ​ໃຈ ຂອງ​ກອງ​ປະຊຸມ ​ແຕ່ ພວກ​ທີ່​ ເຂົ້າ​ຮ່ວມ​ ຫວັງ​ວ່າ ການ​ປະຊຸມ ຈະ ມີ​ການ​ຮັບ​ຮູ້ ຮ່ວມກັນ ກ່ອນ​ການປະຊຸມ ​ໃນ​ວັນ​ທີ 15 ພຶດສະຈິກາ ຂອງ​ກຸ່ມ ​ເສດຖະກິດ ທີ່​ຍິ່ງ​ໃຫຍ່ ​ຂອງ​ໂລກ ຢູ່​ກຸງ Washington ສະຫະຣັຖ ອະ​ເມຣິກາ ​ເພື່ອປຶກສາ​ຫາລື ວິ​ກິດການ ທາງ​ດ້ານ​ການ​ເງິນ ທີ່ ຮ້າຍ​ແຮງ​ທີ່​ສຸດ ນັບ​ແຕ່ ຄັ້ງ ຊຸມ​ປີ 1930.