ສະຫະຣັຖແລະຈີນ ຈະເຈຣະຈາຫາລື ປະເດັນສິດທິມະນຸສ

ອີງຕາມຖແລງການ ຮ່ວມດັ່ງກ່າວ ທັງຝ່າຍ ສະຫະຣັຖແລະຈີນ ເຫັນພ້ອມກັນວ່າ ແຕ່ລະປະເທດຄວນ ນັບຖືສິດທິ ຂອງກັນແລະກັນ ໃນການເລືອກຣະບົບ ການພັທນາ ຂອງໃຜມັນ.

ຖແລງການຍັງກ່າວ ອີກວ່າທັງສອງຝ່າຍ ຮັບຮູ້ວ່າ ທັງຈີນແລະສະຫະຮັຖ ມີຄວາມເຫັນແຕກຕ່າງກັນ ກ່ຽວກັບປະເດັນ ສິດທິມະນຸສ ແລະ ຈະປຶກສາຫາລືກັນ ກ່ຽວກັບ ຄວາມແຕກຕ່າງ ເພື່ອນຳມາຊຶ່ງຄວາມ ສເມີພາບ ແລະການນັບຖື ຊຶ່ງກັນແລະກັນ, ນອກຈາກນີ້ຍັງຈະສົ່ງເສີມ ແລະປົກປ້ອງຮັກສາ ສິດທິມະນຸສ ໃຫ້ສເມີພາບກັບ ຣະບົບສິດທິມະນຸສ ນາໆຊາດ.

ກອງປະຊຸມດັ່ງກ່າວ ຈະມີຂື້ນຫລັງຈາກ ປະທານາທິບໍດີ ສະຫະຣັຖ ທ່ານບາຣັກໂອບາມາ ໄດ້ໂອ້ລົມກັບ ປະທານປະເທດຈີນ ທ່ານ Hu Jintao ເມື່ອທ່ານມາ ຢ້ຽມຢາມຈີນ. ທ່ານໂອບາມາ ໄດ້ກ່າວກ່ຽວກັບ ເຣື້ອງສິດທິມະນຸສ ໃນຕອນນຶ່ງວ່າ:

"ຄົນທຸກຄົນ ທັງຊາຍແລະຍິງ ມີພື້ນຖານ ສິດທິມະນຸສຄືກັນ ພວກເຮົາບໍ່ເຊື່ອວ່າ ຫລັກການນີ້ ຈະເປັນຫລັກການ ພິເສດສະເພາະແຕ່ ອະເມຣິກາເທົ່ານັ້ນ ແຕ່ແມ່ນສິດທິ ສາກົນ ແລະຄວນຈະມີ ສຳລັບທຸກໆຄົນ ທຸກໆຊົນຊາດຊົນເຜົ່າ ທຸກໆສາສນາ ແລະ ທຸກໆຊົນກຸ່ມນ້ອຍ.

ນອກນີ້ທັງສອງຝ່າຍ ຍັງຕົກລົງທີ່ຈະຮ່ວມມື ທາງດ້ານກົດໝາຍ ແລະການແລກປ່ຽນ ກົດເກນດ້ານກົດໝາຍ ເພື່ອຜົນປະໂຫຍດ ແກ່ປະຊາຊົນ ແລະຮັຖບານຂອງ ທັງສອງປະເທດ ໂດຍຈະມີການປະຊຸມ ນັກວິຊາການດ້ານ ກົດໝາຍຂອງຈີນ ແລະ ສະຫະຣັຖອີກນຳ.