ຕອບແຊັດວຽກເຖື່ອນ ຄົນງານ ຮຽກຮ້ອງຣັຖຊ່ອຍ

ການໂຄສະນາ ວຽກຕອບແຊັດ ໃນເຂດເສຖກິຈພິເສດ ສາມຫລ່ຽມຄຳ ເມືອງຕົ້ນເຜິ້ງ ແຂວງບໍ່ແກ້ວຕາມສື່ສັງຄົມ ອ໋ອນລາຍນ໌ ເຮັດວຽກງ່າຍ ເງິນເດືອນສູງ ຢ່າງໜ້ອຍ 5 ລ້ານກີບ/ເດືອນ ກິນຢູ່ພັກເຊົາຟຣີໂດຍທາງບໍຣິສັດ ທີ່ຮັບເອົາຄົນງານ ຈະເປັນຜູ້ຮັບຜິດຊອບ ທັງໝົດ.

ແຕ່ພໍຄົນງານເຂົ້າມາ ໃນເຂດເສຖກິຈ ເພື່ອເຮັດວຽກ ຕາມໂຄສະນາ ແລະການຊັກຊວນ ຂອງນາຍໜ້ານັ້ນ ກັບພົບວ່າ ບໍ່ເປັນຄືດັ່ງໂຄສະນາ. ທຳອິດຕ້ອງໄດ້ກັກໂຕ ຕາມມາຕການປ້ອງກັນ ໂຄວິດ-19 ບາງຄົນກໍຢູ່ເປັນເດືອນ ຍັງບໍ່ໄດ້ເຮັດວຽກ. ຊໍ້າບໍ່ໜໍາຖືກຂາຍທອດ ຕໍ່ໃຫ້ບໍຣິສັດອື່ນພາຍໃນເຂດ.

ຕໍ່ເຫດການດັ່ງກ່າວ ຫລາຍຄົນຕ້ອງການອອກຈາກວຽກ ແຕ່ນາຍຈ້າງຈີນບໍ່ຍອມ ຖ້າຈະອອກຕ້ອງໄດ້ຈ່າຍເງິນ ຢ່າງໜ້ອຍ 10-50 ລ້ານກີບ ໃຫ້ນາຍຈ້າງຈີນທີ່ອ້າງວ່າ ໄດ້ໃຊ້ຈ່າຍໃຫ້ຄົນງານລາວ ໃນໄລຍະກັກໂຕ ກໍຖືວ່າໄດ້ຕິດໜີ້ບໍຣິສັດ ທັງທີ່ວຽກບໍ່ທັນໄດ້ເຮັດ.

“ຟັງການສັມພາດ ຄົນງານຍິງ ທີ່ຂໍການຊ່ອຍເຫລືອ ອອກຈາກວຽກ ຕອບແຊັດ ໃນເຂດເສຖກິຈ ພິເສດສາມຫລ່ຽມຄຳ...”

ອີງຕາມນັກຂ່າວ RFA ໄດ້ສັມພາດ ຄົນງານລາວເມື່ອວັນທີ 7 ກຸມພາ 2022 ໃນລະຫວ່າງເດືອນມົກກະຣາ 2022 ໄດ້ມີ ຄົນງານຍິງ ທີ່ເຮັດວຽກຕອບແຊັດ ລັກໜີອອກມາເປັນຈຳນວນຫລາຍ ແລະໄດ້ຮັບການຊ່ອຍເຫລືອ ຈາກເຈົ້າໜ້າທີ່ສະເພາະກິຈ. ທັງຄົນງານຍິງ ຈາກນະຄອນຫລວງວຽງຈັນ ແລະຕ່າງແຂວງ.

ສ່ວນເຈົ້າໜ້າທີ່ ທີ່ກ່ຽວຂ້ອງແຂວງບໍ່ແກ້ວ ໄດ້ເວົ້າເຖິງການຊ່ອຍເຫລືອວ່າ ປີຜ່ານມາເຈົ້າໜ້າທີ່ຕຳຣວດ ກໍໄດ້ຊ່ອຍເຫລືອຄົນງານ ອອກຈາກເຂດເສຖກິຈພິເສດ ສາມຫລ່ຽມຄຳ ໄດ້ປະມານ 40-50 ຄົນ ສ່ວນຫລາຍເປັນແມ່ຍິງ. 

ຕໍ່ກັບການຊ່ອຍເຫລືອນີ້ ແມ່ນເປັນເຣື່ອງຂອງເຈົ້າໜ້າທີ່ຕຳຣວດໂດຍກົງ. ຜ່ານມາການຊ່ອຍເຫລືອ ເປັນວຽກທີຍາກຫລາຍ ເນື່ອງຈາກເປັນເຂດຂອງນັກລົງທຶນຈີນ ດັ່ງນັ້ນການຊ່ອຍເຫລືອ ແມ່ຍິງທຸກພາກສ່ວນຕ້ອງໃຫ້ການຮ່ວມມື ກັບເຈົ້າໜ້າທີ່ຕຳຣວດໂດຍກົງ.