ເຂດອ້ອມເຂົາພຣະວິຫາຣ ຕົກເປັນ ຂອງຂເມນ

ຫົວໜ້າສານສະຫະປະຊາຊາດ ໄດ້ຕັດສິນໃນວັນຈັນນີ້ ໃຫ້ເຂດອ້ອມ ວັດພຣະວິຫານທີ່ເກົ່າແກ່ ຊຶ່ງຕິດກັບຊາຍແດນໄທ ນັ້ນເປັນຂອງ ກໍາພູ ຊາ ແລະວ່າ ກໍາລັງຮັກສາຄວາມສະຫງົບຂອງໄທ ທຸກຄົນ ຕ້ອງອອກຈາກເຂດນັ້ນ. ຕາມຣາຍງານຂອງອົງການຂ່າວ AFP ໃນວັນທີ 11 ພຶສຈິກາ 2013 ນີ້.

ທ່ານ Peter Tomka ຜູ້ພິພາກສາເວົ້າວ່າ ສານຍຸຕິທັມສາກົນ ໄດ້ຕີຄວາມຄໍາຕັດສິນຂອງສານ ເມື່ອປີ 1962 ເວົ້າວ່າ: “ກໍາພູຊາມີອໍານາດ ອະທິປະຕັຍ ເໜືອດິນແດນທັງໝົດ ຂອງເຂດອ້ອມ ວັດພຣະວິຫານ“. ທ່ານວ່າ “ຜົລການຕັດສິນຂອງສານ ແມ່ນວ່າໄທ ຢູ່ພາຍໃຕ້ພາລະ ທີ່ ຈະຕ້ອງໄດ້ຖອນທະຫານ, ຕໍາຣວດ ແລະຄົນຍາມ ອອກຈາກເຂດອ້ອມແອ້ມ ວັດພຣະວິຫານ“.

ນັບຕັ້ງແຕ່ປີ 2011 ມາເກີດມີການປະທະກັນ ຣະຫວ່າງທະຫານໄທ ແລະກໍາພູຊາ ຈົນເຮັດໃຫ້ມີຜູ້ເສັຍຊີວິດຍ້ອນຢ່າງໜ້ອຍ 28 ຄົນແລະ ເມື່ອປີຜ່ານມາ ສານສະຫະປະຊາຊາດ ຕັດສິນໃຫ້ສອງຝ່າຍ ຖອນກໍາລັງ ທະຫານອອກຈາກເຂດອ້ອມແອ້ມ ວັດພຣະວິຫານ ທີ່ມີການຂັດ ແຍ່ງກັນ.

ໃນທີ່ສຸດ ກໍາພູຊາແລະໄທ ກໍໄດ້ຖອນທະຫານ ຂອງຕົນອອກ ເມື່ອເດືອນ ກໍຣະກະດາ 2012 ແລະໄດ້ເອົາຕໍາຣວດ ແລະເຈົ້າໜ້າທີ່ ຮັກສາ ຄວາມປອດພັຍ ໄປຢູ່ແທນ. ທ່ານ Hor Namhong ຣັຖມົນຕຣີການຕ່າງ ປະເທສ ກໍາພູຊາ ຜູ້ທີ່ໄດ້ຣາຍງານ ຢູ່ໃນສານ ທີ່ກຸງ Hague ກ່າວຕໍ່ສື່ມວນຊົນວ່າ “ມັນດີພໍແລ້ວ“.

ນາຍົກຣັຖມົນຕຣີໄທ ຍານາງ ຍິ່ງລັກ ຊິນນະວັດ ໄດ້ກ່າວເມື່ອວັນອາທິດຜ່ານມາວ່າ ຫລັງຈາກສານ ສະຫະປະຊາຊາດ ຕັດສິນແລ້ວ ທາງ ການໄທ ຈະໂອ້ລົມກັບທາງການ ກໍາພູຊາຕື່ມອີກ ເພື່ອຫລີກລ້ຽງ ການເຂົ້າໃຈຜິດກັນອີກ.