ແມ່ຍິງລາວຍັງຖືກຫຼອກໄປ ໄທ

ເຈົ້າຫນ້າທີ່ ກະຊວງ ແຮງງານ ແລະ ສວັດດີການ ສັງຄົມ ທ່ານນຶ່ງ ເວົ້າວ່າ ວັຍລຸ້ນ ແມ່ຍິງ ລາວ ຍັງ ຖືກຫຼອກ ໄປຂາຍ ຢູ່ ໄທ ຫຼາຍຢູ່, ເຖິງແມ່ນວ່າ ທາງການ ໄດ້ ໂຄສະນະ ໃຫ້ ຮູ້ເຖິງ ຜົລຮ້າຍ ແລະ ຄວາມສ່ຽງ ຕໍ່ ກຸ່ມ ຄ້າມະນຸດ ແລ້ວ ກໍຕາມ, ແມ່ຍິງລາວ ທີ່ ຮູ້ເທົ່າ ບໍ່ເຖິງການ ຍັງຖືກ ກຸ່ມ ຄ້າມະນຸດ ຕົ້ວະ ຫຼອກ ໄປຂາຍໃຫ້ ກຸ່ມ ຄ້າ ປະເວນີ ໃນ ໄທ ຫຼາຍຢູ່ ແລະ ບາງຄົນ ກໍຖືກຈັບ ແລ້ວ ສົ່ງກັບ ບ້ານ. ດັ່ງ ທ່ານກ່າວ ໃນ ຕອນນຶ່ງ ວ່າ:

"ທົ່ວ ແຂວງ ຂອງ ແຂວງ ວຽງຈັນ ນີ້ ຖືວ່າເຮົາ ກະສົ່ງມາ, ໃນ ຊ່ວງແລ້ວນີ້ ກະປະມານ 10 ປາຍ ກວ່າຄົນ ເນາະ ແບບພວກ ທີ່ຮຽນ ບໍ່ຈົບ ສາຍສາມັນ ເບາະ ແລ້ວມາ ເຮັດວຽກ ນຳຮ້ານ ອາຫານ ຫລືວ່າ ຮ້ານກິນດື່ມ ຕ່າງໆ ຄິດວ່າ ໄປຫາ ງານ ຢູ່ພຸ້ນ ຊິໄດ້ ເງິນດີບໍ ເພື່ອ ສົ່ງໃຫ້ ຄອບຄົວ ໄປແລ້ວ ບາງທີ ມັນ ກັບບໍໄດ້ ຫັ້ນ ແຫລ້ວ".

ທ່ານກ່າວ ຕື່ມວ່າ ນອກຈາກ ນັ້ນ ກໍຍັງມີ ແມ່ຍິງລາວ ທີ່ ຖືກ ກຸ່ມ ຄ້າມະນຸດ ຫຼອກ ໄປຂາຍຢູ່ ຈີນ ໃນ ລັກສນະ ມາຂໍ ແຕ່ງງານ ແລ້ວ ພາກັບ ໄປ ຈີນ ແລະ ກໍ ຫາຍສາບສູນ ເລີຍ. ທ່ານວ່າ ແມ່ຍິງລາວ ຈາກ ຕ່າງແຂວງ ກໍ ເຂົ້າມາຫາ ວຽກເຮັດ ງານທຳ ໃນ ນະຄອນ ຫຼວງ ວຽງຈັນ ບາງຄົນ ກໍຖືກກຸ່ມ ຄົນບໍ່ດີ ທີ່ ເປັນ ຄົນລາວ ດ້ວຍກັນ ຫຼອກວ່າ ເປັນ ນາຍຫນ້າ ຊອກຫາ ແຮງງານ ໄປ ເຮັດວຽກ ໃນໄທ ທີ່ໄດ້ ຄ່າຈ້າງດີ ກໍເລີຍ ຫລົງເຊື່ອ ໄປນຳເຂົາ.

ເຈົ້າຫນ້າທີ່ ອົງການ ຈັດຕັ້ງ ສາກົນ ກ່ຽວກັບ ການ ຄ້າມະນຸດ ກ່າວວ່າ ບັນຫາ ການ ຄ້າມະນຸດ ໃນລາວ ຍັງຈະສືບ ຕໍ່ໄປ ຍ້ອນ ສະພາບ ເສຖກິດ ແລະ ການ ຄອງຊີພ ໃນລາວ ຍັງບໍ່ດີ ປານໃດ.