ເສັ້ນທາງເປັນຂີ້ຝຸ່ນຫຼາຍ ຊາວບ້ານ ຢູ່ເມືອງໜອງບົກ ໄດ້ຮັບຄວາມເດືອດຮ້ອນ

ປະຊາຊົນ ບ້ານດົງຂວາງ, ບ້ານດົງບູນ, ບ້ານນາຄໍາ ແລະ ບ້ານໂນນຈິິກ ເມືອງໜອງ ບົກ ແຂວງຄໍາມ່ວນ ຍັງປະສົບບັນຫາຖນົນຂີ້ຝຸ່ນ ຍ້ອນຣົຖບັນທຸກບໍຣິສັດ ຊີໂນອາກຣີ ໂປຕາສ ຈໍາກັດ ຂອງນັກລົງທຶນຈີນ ທີ່ເຂົ້າມາສ້າງໂຮງງານ ແລ່ນຜ່ານຫຼາຍ.

ຊາວບ້ານ ຢູ່ເມືອງໜອງບົກ ແຂວງຄໍາມ່ວນ ໄດ້ກ່າວຕໍ່ວິທຍຸ ເອເຊັຽ ເສຣີ ໃນວັນທີ 1 ມິຖຸນາ ວ່າ:

“ຖນົນເປັນຂີ້ຝຸ່ນຫັ້ນແຫຼະ ເປັນຂີ້ຝຸ່ນຫຼາຍ ດຽວນີ້ຣົຖຈີນ ເຂົາແລ່ນຕລອດ ຂີ້ຝຸ່ນຍັງຫຼາຍ ຂື້ນຣົຖຈັກໄປຕ້ອງໃສ່ໝວກກັນນອກໃສ່ຫຍັງ ຂີ້ຝຸ່ນເຕັມໝົດແລະ ບໍ່ເຫັນຮອດຫົນທາງພຸ້ນລະ ສ້ອມແປງຢູ່ ແຕ່ວ່າ ຝຸ່ນຕລອດ ເພາະວ່າ ຣົຖ 10 ລໍ້ ເຂົາວິ້ງຕລອດ ເປັນຝຸ່ນຕລອດ ຊ້ວງແລ້ງໆ ບໍ່ມີລົມສົ່ງຝຸ່ນນະ ບໍ່ເຫັນທາງເລີຍແຫຼະ.​”

ຖນົນເສັ້ນນີ້ ເປັນຖນົນດິນແດງທີ່ຊາວບ້ານ ແລະ ບໍຣິສັດສັນຈອນເປັນປະຈໍາ ໂດຍຣົຖບັນທຸກຂອງບໍຣິສັດຈະຂົນຊາຍ ແລະ ອຸປະກອນຕ່າງໆ ເພື່ອເຂົ້າໃນພື້ນທີ່ ບໍລະເວນບ້ານນາຄໍາເຊິ່ງເປັນທີ່ຕັ້ງຂອງບໍຣິເວນຂຸດແຮ່.

ຂາວບ້ານຢູ່ບ້ານດົງຂວາງ ເມືອງໜອງບົກ ແຂວງຄໍາມ່ວນ ໄດ້ກ່າວວ່າ:

“ຖນົນລູກລັງ ແຕ່ພໍໄປໄດ້ມາໄດ້ ຊາວບ້ານເຂົາກໍທຽວກັນຢູ່ ໄປນາຄໍານັ້ນ ເປັນຂີ້ຝຸ່ນເນະາ ຣົຖຈີນແລ່ນຫຼາຍ ຣົຖໃຫຍ່ມັນແລ່ນຫຼາຍ ແຕ່ລະມື້ ແກ່ຫີນແກ່ຊາຍ ແກ່ອຸປະກອນເຄື່ອງ ເຂົ້າເຮັດງານຫັ້ນລະ.”

ຣົຖບັນທຸກຈະແລ່ນຜ່ານ ເສັ້ນທາງທີ່ເຊື່ອມກັນ ຕັ້ງແຕ່ເທດສະບານໜອງບົກ ໄປທາງເມືອງເຊບັ້ງໄຟ ລວມໄລຍະທາງ ປະມານ 18 ກິໂລແມັດ ແຕ່ທາງທີ່ໃຊ້ຫຼາຍ ເພື່ອໄປໂຮງງານນັ້ນ ໄລຍະທາງ 8 ກິໂລແມັດ ແລ່ນຜ່ານ 4 ເຂດບ້ານທີ່ກ່າວ.

ຊາວບ້ານນາຄໍາ ໄດ້ກ່າວວ່າ:

“ມັນຊິອອກທາງເຊບັ້ງໄຟແດ່ ຣົຖຈີນ ແລ້ວກໍມັນຊິອອກໜອງບົກ ແດ່ຫັ້ນນ່າ ກະປະມານ 18 ກິໂລແມັດ ກໍໂຕສະເພາະທີ່ໃຊ້ມາກກວ່າແລ້ວ ແມ່ນຢູ່ໃນປະທານ 8 ກິໂລ ທາງເຂົ້າມາໂຮງງານຫັ້ນນ່າ 8 ກະໂລ ຫາ ໂນນຈິກ ເພາະວ່າ ມັນເປັນອຸໂມງເນາະຢູ່ໜອງຈິກຫັ້ນ.​”

ຊາວບ້ານກ່າວຄືກັນວ່າ ທີ່ຜ່ານມາ ທາງບໍຣິສັດ ໄດ້ເຮັດການສ້ອມແປງທາງ ໂດຍເອົາດິນຜາ ຫຼື ດິນທີ່ບໍຣິສັດຣະເບີດຕາມພູເປັນກ້ອນໆ ມາປູກໃສ່ຖນົນຢູ່ ແຕ່ກໍຍັງມີຂີ້ຝຸ່ນໄງ່ ຍ້ອນວ່າ ຣົຖໃຫຍ່ແລ່ນຜ່ານທຸກມື້ ແລະ ເພື່ອແກ້ບັນຫາຂີ້ຝຸ່ນໄງ່ ບໍຣິສັດ ກໍຫົດນໍ້າໃສ່ຖົນຢູ່ ແຕ່ກໍໄດ້ຢຸດຫົດນໍ້າມາແລ້ວປະມານ 1 ເດືອນ ຍ້ອນນໍ້າບໍ່ພຽງພໍ ເພາະແຫ້ງແລ້ງຫຼາຍ.​

ເສັ້ນທາງດັ່ງກ່າວ ມີແຜນການປູຢາງ ໃນເດືອນ ພຶສຈິກາ  ຂອງປີ 2023 ຍ້ອນເປັນຊ້ວງ ທີ່ບໍຣິສັດ ຄາດການວ່າ ຈະມີລາຍຮັບ ແລະ ກໍາໄລ ແລ້ວ ໂດຍຈະປູຢາງ 8 ກິໂລແມັດ ເທົ່ານັ້ນ.

ເຈົ້າໜ້າທີ່ກ່ຽວຂ້ອງ ຜູ້ທີ່ບໍ່ປະສົງອອກຊື່ ແລະ ຕໍາແໜ່ງ ໄດ້ກ່າວວ່າ:

“ເດືອນ 11, 2023 ເຂົາຈະເຣີ່ມລົງຢາງ ມັນເປັນງົບຂອງບໍຣິສັດ ງົບຂອງຣັຖບານ ແບ່ງສ່ວນ ອອກມາຈາກພາສີລາຍຮັບ ບໍ່ ມີແຕ່ 7-8 ໂລນີ້ ແຫຼະ ທີ່ຂະເຈົ້າປູ ສະເພາະໂຮງງານມາເຖິງນີ້ແຫຼະ ທີ່ຈໍາເປັນ.​”

ວິທຍຸ ເອເຊັຽ ເສຣີ ໄດ້ພະຍາມຕິດຕໍ່ໄປຍັງບໍ່ຣິສັດ ຊິໂນອາກຣີໂປຕາສ ຈໍາກັດ ແລະ ຜແນກໂຍທາທິການ ແລະ ຂົນສົ່ງ ເມືອງໜອງບົກ ເພື່ອສອບຖາມຂໍ້ມູນເພີ່ມເຕີມ ແຕ່ບໍ່ສາມາດຕິດຕໍ່ໄດ້.​

ໃນ​ປີ 2022 ທີ່​ຜ່ານ​ມາ ບໍ​ຣິ​ສັດ ຊິ​ໂນ-ອາກ​ຣີ​ໂປ​ຕາ​ສ ຈຳ​ກັດ ໄດ້​ເຮັດ​ໂຄງ​ການ​ຂຸດ​ຄົ້ນ ແຮ່ເກືອ​ໂປ​ຕາ​ສ ຫຼື ເກືອ​ກາ​ລີ ຢູ່​ເມືອງ​ໜອງ​ບົກ ແຂວງ​ຄຳ​ມ່ວນ ແລະ ໄດ້​ບຸກ​ເບີກ​ທີ່​ດິນ ​ທຳ​ການ​ກະ​ສິ​ກັມ ​ຂອງ​ຊາວ​ບ້ານ ເປັນ​ຕົ້ນ ບ້ານ ດົງ​ບູນ, ບ້າ​ນາ​ຄຳ, ບ້ານ​ນາ​ຫຼຸບ, ບ້ານ​ປ່າ​ຕິ້ວ ແລະ ບ້ານ​ຊຽງ​ຫວາ, ແຕ່ ບໍ​ຣິ​ສັດດັ່ງ​ກ່າວ ພັດ​ຈ່າຍ​ຄ່າ​ຊົ​ດ​ເຊີຍ​ ໃຫ້​ຊາວ​ບ້ານບໍ່​ເໝາະ​ສົມ ແລະ ບາງ​ຄອບ​ຄົວ ກໍ​ຍັງ​ບໍ່​ທັນ​ໄດ້​ຮັບ​ຄ່າ​ຊົດ​ເຊີຍ​ເທື່ອ.