ໂຮງໝໍເມືອງລອງຂາດອຸປກອນ

ໂຮງໝໍ ເມືອງລອງ ແຂວງ ຫຼວງນ້ຳທາ ຍັງຂາດ ເຄື່ອງມື ການແພດ ຫຼາຍຢູ່ ຮ່ວມທັງ ຈຳນວນ ນາຍແພດ ແລະ ນາງ ພຍາບານ ກໍຈຳກັດ. ນາຍແພດ ທ່ານນື່ງ ກ່າວຕໍ່ ເອເຊັຽເສຣີ ວ່າປັດຈຸບັນ ມີ ພະນັກງານ ແພດ ພຽງແຕ່ 23 ຄົນ ເທົ່ານັ້ນ ແຕ່ ສີ່ງສຳຄັນ ກໍແມ່ນ ຂາດເຄື່ອງມື ການແພດ ດັ່ງປະເພດ ຜ່າຕັດ ແລະ ເຄື່ອງ X-RAY ຍ້ອນ ຂາດ ງົປມານ. ດັ່ງ ທ່ານ ກ່າວວ່າ:

"ທາງໂຮງ ພຍາບານ ຫມໍ ກະຍັງຂາດ ເຄື່ອງມື ການແພດ ຫຼາຍຢູ່ ເປັນຕົ້ນກະແມນ ເຄື່ອງມື ຜ່າຕັດອື່ນໆ ສາເຫດ ກໍແມ່ນບໍມີ ງົປມານ ໃນການຈັດຊື້ ເພາະ ສ່ວນຫຼາຍ ເຄືື່ອງມື ຈຳພວກນີ້ ກະແມ່ນ ຕ່າງປະເທດ ເປັນຜູ້ ໃຫ້ທຶນ ຊ່ອຍເຫລືອ ບໍ່ວ່າຈະຢູ່ ໂຮງຫມໍແຂວງ ໂຮງຫມໍໃຫຽ່ ຫຼາຍບ່ອນ".

ທ່ານກ່າວ ຕື່ມວ່າ ໃນ ກໍຣະນີ ມີຄົນເຈັບ ເກີນ ທີ່ໂຮງຫມໍ ຈະປິ່ນປົວ ກໍຈະສົ່ງໄປ ໂຮງພຍາບານ ແຂວງ ແຕ່ກໍຫຍຸຸ້ງຍາກ ໃນການ ຂົນສົ່ງ ຍ້ອນວ່າ ເສັ້ນທາງ ບໍ່ດີ ເຮັດໃຫ້ຜູ້ ປ່ວຍບາງຄົນ ເສັຽຊີວິດ ກາງທາງ ຍ້ອນການ ເດີນທາງ ຊັກຊ້າ.

ໂຮງຫມໍ ແຫ່ງນີ້ ແມ່ນຕັ້ງຢູ່ ຕົວເມືອງ ຊຶ່ງເປັນ ສະຖານທີ່ ຄັບແຄບ ແອອັດ ບໍ່ໄດ້ ມາດຕະຖານ ຊ້ຳຍັງຂາດ ອຸປກອນ ການແພດ ນຳອີກ ທາງໂຮງຫມໍ ຍັງລໍຖ້າ ການຊ່ອຍ ເຫລືອຈາກຕ່າງ ປະເທດ ຢູ່.

ຫຼາຍແຂວງ ໃນລາວ ໃນ ປັດຈຸບັນ ໂດຍສະເພາະ ໃນເຂດ ຊົນນະບົດ ຍັງບໍ່ມີ ສຸຂສາລາ, ບາງຄົນ ກໍອາສັຍ ຢາພື້ນເມືອງ. ການ ຊ່ອຍເຫລືອ ຈາກ ຕ່າງປະເທດ ກໍບໍ່ທົ່ວເຖິງ ແລະ ບາງເຂດ ຍັງມີການ ຮົ່ວໄຫລ ນຳອີກ. ປະຊາຊົນ ລາວ ຜູ້ທີ່ທຸກຍາກ ແຮງ ລຳບາກ ກວ່າເກົ່າ.