ເດັກນ້ອຍຖອກທ້ອງຍ້ອນນໍ້າ ເປື້ອນ

ປັດຈຸບັນ ເດັກນ້ອຍ ອາຍຸ ຕ່ຳກວ່າ 5 ປີ ຫຼາຍໆຄົນ ຢູ່ ແຂວງ ຊຽງຂວາງ ເປັນພຍາດ ຖອກທ້ອງ ຊຶ່ງ ສ່ວນໃຫຍ່ ຍ້ອນ ກິນອາຫານ ແລະ ດື່ມນ້ຳ ບໍ່ສະອາດ. ໃນຊ້ວງ ຣະດູຮ້ອນ ອາຫານ ມັກບູດ ໄວ ເມື່ອ ເດັກນ້ອຍ ກິນ ກໍມັກເກີດ ພຍາດ ຖອກທ້ອງ ໄດ້ງ່າຍ. ດັ່ງ ເຈົ້າໜ້າທີ່ ສາທາຣະນະສຸຂ ແຂວງຊຽງຂວາງ ກ່າວຕໍ່ RFA ໃນ ວັນທີ 15 ເມສາ 2016 ນີ້ວ່າ:

"ສ່ວນຫຼາຍ ຈະແມ່ນ ເດັກນ້ອຍຫຼາຍ ເດັກນ້ອຍ ມີອາການ ຖອກທ້ອງ ມັນເປັນຣະດູ ຮ້ອນນໍ ສ່ວນຫຼາຍ ມັນຈະເປັນ ເດັກນ້ອຍ ລຸ່ມ 5 ປີ ມັນຮ້ອນ ອາກາດຮ້ອນ ເນາະ ໝາກໄມ້ບໍ໋ ພວກນໍ້າ ບໍ່ສະອາດບໍ໋ ເປັນປະເພດ ຊີ້ແຫຼະ".

ທ່ານເວົ້າວ່າ ຣະຍະນີ້ ເດັກນ້ອຍ ທີ່ເປັນພຍາດ ຖອກທ້ອງ ຖືກນຳໄປ ປິ່ນປົວ ຢູ່ໂຮງໝໍ ແຂວງ ແລະ ເມືອງຕ່າງໆ ເກືອບວ່າ ທຸກມື້ ຈົນໂຮງໝໍ ບາງແຫ່ງ ບໍ່ສາມາດ ຮັບໄດ້ ບໍ່ມີ ຕຽງນອນພໍ. ແຕ່ກໍຍັງ ເຫັນວ່າ ຍັງບໍ່ທັນ ມີຜູ້ໃດເຈັບ ຮຸນແຮງ, ເມື່ອມາປິ່ນປົວ 2-3 ມື້ ກໍຫາຍ.

ເພື່ອປ້ອງກັນ ພຍາດ ດັ່ງກ່າວ ທາງຜແນກ ສາທາຣະນະສຸຂ ແຂວງ ໄດ້ໄປ ໂຄສະນາ ໃຫ້ ປະຊາຊົນ ໃນເຂດຕ່າງໆ ໃຫ້ຣະມັດ ຣະວັງ ໃນເຣຶ່ອງ ອາຫານ ການກິນ, ອາຫານ ຕ້ອງເຮັດ ໃຫ້ສະອາດ, ບໍ່ກິນ ອາຫານ ທີ່ບໍ່ສຸກ, ໃຫ້ດື່ມນໍ້າ ສະອາດ ຫລື ນໍ້າຕົ້ມແລ້ວ ໃຫ້ລ້າງມື ກ່ອນກິນ ເຂົ້າ.