ການຄ້າສັດປ່າຢູ່ ລາວ ເພີ້ມຂຶ້ນ

ສປປລາວ ເປັນເມືອງ ທີ່ນໍາໜ້າ ຫຼືເມືອງເອກ ຂອງ ການຄ້າສັດປ່າ ພ້ອມທັງ ເປັນຕົ້ນທາງ ແລະ ທາງຜ່ານ ຊຶ່ງ ນັບມື້ນັບ ເພິ້ມຂຶ້ນ. ພວກຄ້າສັດປ່າ ມັກລັກຂົນສົ່ງ ສັດປ່າ ເປັນຕົ້ນລິ່ນ ເຕົ່າ ເສືອ ແລະຊ້າງ ຈາກ ສປປລາວ ຫລື ຜ່ານ ສປປລາວ ອອກໄປ ຈີນ ແລະ ວຽດນາມ. ການຄ້າສັດປ່າ ເພິ້ມຂຶ້ນ ຢູ່ ສປປລາວ ກໍເພາະວ່າ ການບັງຄັບໃຊ້ ກົດໝາຍ ຍັງອ່ອນແອ; ທາງການລາວ ບໍ່ເຄີຍຈັບ ແລະ ລົງໂທດ ພວກຄ້າ ສັດປ່າ ຈັກເທື່ອ ນັບແຕ່ປີ 2012 ເປັນຕົ້ນມາ.

ນັ້ນແມ່ນ ເນື້ອໃນໃຈຄວາມຫຍໍ້ໆ ຂອງ ບົດຣາຍງານ ຂອງ ອົງການ ຮັກສາ ສັດປ່າ ທີ່ເຜີຍແຜ່ ຕໍ່ກອງປະຊຸມ ໃຫຍ່ ກ່ຽວກັບ ການຮັກສາ ສັດປ່າ ເມື່ອວັນສຸກ ທີ່ ຜ່ານມາ ທີ່ປະເທດ ອາຟຣິກາ ໃຕ້ ຊຶ່ງ ຈະດຳເນີນ ຕໍ່ໄປເປັນ ເວລາ 12 ມື້.