ເວທີສົນທະນາຊັພຍາກອນນໍ້າ ຫລົ້ມ ຢູ່ໄທຍ໌

ລາຍງານຈາກ ແຂວງອຸບົນຣາຊທານີ ຂອງໄທ ຣະບຸວ່າເຄືອຂ່າຍຊຸມຊົນຮັກແມ່ນໍ້າຂອງ ແຂວງອຸບົນບໍ່ສົນໃຈສະແດງຄວາມເຫັນຮ່ວມ ເວທີ ທີ່ກົມຊັພຍາກອນນໍ້າຈັດຂຶ້ນ ກຸ່ມດ່ັງກ່າວເວົ້າວ່າກົມຊັພຍາກອນນໍ້າ ເປັນຂະບວນການຍຸຕິທັມ ແຕ່ບໍ່ແກ້ໄຂບັນຫາແທ້ຈີງຈື່ງພາກັນຍ່າງອອກ ຈາກຫ້ອງປະຊຸມ.

ແຕ່ສໍານັກງານບໍຣິຫານ ຈັດການລຸ່ມແມ່ນໍ້າຂອງ ເຫັນວ່າເປັນການເສັຽໂອກາດ ຂອງຊາວບ້ານ ທີ່ຢາກສເນີບັນຫາຜົລກະທົບຕໍ່ສີ່ງແວດລ້ອມ ທີ່ຈະເກີດກັບຊຸມຊົນໃຫ້ເປັນຂໍ້ມູນແລະບັນຫາໃນການຕ້ານການສ້າງເຂື່ອນອື່ນໆ ຕາມລໍາແມ່ນໍ້າ ຂອງໃນອະນາຄົດ.

ສໍານັກງານສາທາຣະນະຊົນ ທີ່ເມືອງຂົງຈຽມແຂວງອຸບົນຣາຊທານີ ໃນມື້ວັນທີ 9 ຕຸລາເວົ້າວ່າ ເຄືອຂ່າຍຊາວບ້ານ ຮັກແມ່ນໍ້າຂອງປະມານ 150 ຄົນ ໄດ້ພາກັນຍ່າງປະທ້ວງຕາມຖນົນວ່າ ບໍ່ຕ້ອງການເຂື່ອນໄຊຍະບູຣີແລະເຂື່ອນອື່ນໆທີ່ ກໍາລັງຈະສ້າງຂື້ນຕາມລໍາແມ່ນໍ້າຂອງເກືອບ 10 ເຂື່ອນ ພ້ອມທັງອ່ານຖແລງ ການວ່າຈະບໍ່ເຂົ້າຮ່ວມເວທີແລກປ່ຽນ ຄວາມຄິດເຫັນການໃຊ້ພລັງງານໄຟຟ້າ ຈາກພລັງນໍ້າໃນແມ່ນໍ້າຂອງ.

ນາງຄໍາປີ່ນອັກສອນ ແກນນໍາຂອງເຄືອຂ່າຍຣະບຸເຖິງສາເຫດບໍ່ເຂົ້າຮ່ວມເວທີແລກປ່ຽນຄວາມເຫັນ ທີ່ສໍານັກບໍຣິຫານຈັດການລຸ່ມແມ່ນໍ້າຂອງ ກົມຊັພຍາກອນນໍ້າ ກະຊວງຊັພຍາກອນທັມມະຊາດ ແລະສີ່ງແວດລ້ອມຈັດຂື້ນວ່າ ບໍ່ຕ້ອງການ ໄປຮັບເອົາຄວາມຊອບທັມ ຂອງໜ່ວຍງານ ທີ່ສນັບສນູນ ການສ້າງເຂື່ອນກັ້ນນໍ້າຂອງ ເນື່ອງຈາກເຖິງແມ່ນວ່າ ເຂື່ອນໄຊຍະບູຣີ ຈະສ້າງຢູ່ລາວ ແຕ່ຜູ້ສ້າງແລະຜູ້ລົງທຶນນັ້ນ ກໍເປັນນັກ ລົງທຶນ ຈາກປະເທດໄທ.