ບໍຣິສັດວຽດນາມ ມ້າງຖຽງນາ ຊາວບ້ານ
2021.10.12
ປະຕູຮົ້ວໜາມທີ່ບໍຣິສັດ ສຸກຮຸ່ງເຮືອງ ສ້າງຂຶ້ນໃນ ທີ່ດິນ ທີ່ຢູ່ໃນຄວາມຂັດແຍງ ລະຫວ່າງຊ້າວບ້ານ ອາສິງສະລີ ແລະ ບໍຣິສັດ
ນັກຂ່າວ ພົລເມືອງ
ຂໍ້ຂັດແຍ່ງທີ່ດິນ ລະຫວ່າງ ຊາວບ້ານອາສິງສະລີ ກັບ ບໍຣິສັດ ສຸກຮຸ່ງເຮືອງຈຳກັດ ທີ່ເປັນຂອງ ນັກລົງທຶນວຽດນາມ ຢູ່ ເມືອງນອງ ແຂວງ ສວັນນະເຂດ ຍັງຫາຂໍ້ ສລຸບບໍ່ທັນໄດ້ ແລະ ປັດຈຸບັນ ເຈົ້າໜ້າທີ່ເມືອງນອງ ກຳລັງລົງ ເກັບກຳຂໍ້ມູນ ເພື່ອແກ້ໄຂບັນຫາ.
ວິທຍຸເອເຊັຽເສຣີ ໄດ້ມີໂອກາດ ສັມພາດ ທ່ານ ນຳແກ້ວ ແສງໜູທອງ, ເຈົ້າເມືອງ ເມືອງນອງ, ກ່ຽວກັບຄວາມກະຈ່າງແຈ້ງ ຂັ້ນຕອນ ການແກ້ໄຂບັນຫາ.
ນັກຂ່າວ: ຢາກຂໍຮຽນຖາມ ເຈົ້າເມືອງແດ່ວ່າ ມີຊາວບ້ານ 10 ຄອບຄົວ ຢູ່ບ້ານອາສິງສະລີ ຫັ້ນນ່າ ຢູ່ເຂດເມືອງນອງ ທີ່ໄດ້ຮັບ ຜົລກະທົບ ຈາກການລົງທຶນ ດ້ານການກະເສດ ຂອງບໍຣິສັດ ສຸກຮຸ່ງເຮືອງ ປັດຈຸບັນນີ້ ມີການຊົດເຊີຽ ໃຫ້ເຂົາເຈົ້າ ແນວໃດແລ້ວ ເຣື່ອງຜົລ ເສັຽຫາຍ ທີ່ດິນຫັ້ນນ່າ ທ່ານ?
ເຈົ້າເມືອງ: ກະຍັງຢູ່ ໃນຂັ້ນຕອນ ການເອົາ ຂໍ້ມູນ ຂອງເຈົ້າໜ້າທີ່ຢູ່. ເຈົ້າໜ້າທີ່ ເຮົາລົງໄປ ປະຊາຊົນຈຳນວນນຶ່ງ ກະມີວຽກຫຼາຍ ຊຶ່ງໃນຣະດູ ການຜລິດ ເພິ່ນກະບໍ່ໄດ້ ເຂົ້າຮ່ວມ ຄົບຖ້ວນ ຈັ່ງຊັ້ນ ມັນກະໄດ້ ມື້ລະ 2-3 ຕອນ ຫັ້ນແຫຼ. ເຮົາກະໄດ້ປະສານ ບໍຣິສັດ ສຸກຮຸ່ງເຮື່ອງ ແລ້ວ. ເຂົາເຈົ້າ ກະໄດ້ໃຫ້ ການຮ່ວມມື ໃນການເຂົ້າຮ່ວມ ຫັ້ນນ່າ ລົງເອົາ ຂໍ້ມູນ ໂຕຈິງຫັ້ນ.
ນັກຂ່າວ: ທັງໝົດນີ້ ດິນເຂົາເຈົ້າ ປະມານ ເທົ່າໃດ ທ່ານເຈົ້າເມືອງ?
ເຈົ້າເມືອງ: ຕອນນີ້ ຫາກໍ່ໄດ້ 4-5 ຄອບຄົວ ກະຍັງບໍ່ທັນໄດ້ຮູ້ ໂຕຈິງ ຂອງດິນ ທຳການຜລິດ ຂອງປະຊາຊົນ ສ່ວນໃຫຍ່ ນີ້ກະແມ່ນ ເປັນໄຮ່ເກົ່າ ຂະເຈົ້າ ກະຮຽກຮ້ອງວ່າ ແມ່ນເນື້ອທີ່ ທຳການຜລິດ ຫັ້ນນ່າ ບາດໄປເບິ່ງ ໂຕຈິງ ລະກໍບໍ່ຢາກ ໃຫ້ຂໍ້ມູນ ພວກເຮົາ ລະອຽດປານໃດ ເບື້ອງປະຊາຊົນ.
ກະມີຄວາມ ຫຍຸ້ງຍາກຢູ່ ສ່ວນວ່າ ເນື້ອທີ່ໄຮ່ ທີ່ມີເຂົ້າຫັ້ນ ກະພວກເຮົາ ກໍໄດ້ເກັບກຳ ຈຳນວນນຶ່ງແລ້ວ ມັນກໍບໍ່ໄດ້ ຖ້ວມໝົດກໍໂຕໄຮ່ ເຂົາເຈົ້າຫັ້ນ ມັນກໍຖ້ວມ ຕາມແຄມຫັ້ນ.
ສ່ວນການແກ້ໄຂຫັ້ນ ເຮົາຫັ້ນ ກໍພຍາຍາມ ໃຫ້ການປະສານ ສົມທົບກັບ ບໍຣິສັດຫັ້ນ ກໍໄປເກັບກຳ ຂໍ້ມູນຮ່ວມກັນ ຫັ້ນແຫຼະ ແຕ່ວ່າ ປະຊາຊົນເຮົາ ກໍຈຳນວນນຶ່ງ ກໍເຂົ້າໄປທຳ ການຜລິດ ເຂດທີ່ເຂົາເຈົ້າ ສັມປະທານ ບໍ່ແມ່ນວ່າ ເຂົາເຈົ້າ ຫາກເຮັດ ແຕະຕ້ອງ ສິດຜົລປໂຍດ ຂອງປະຊາຊົນໄດ໋.
ປະຊາຊົນ ກໍຮູ້ເອງວ່າ ເນື້ອທີ່ດັ່ງກ່າວ ອຳນາດ ການປົກຄອງ ເປັນຜູ້ມອບໃຫ້ ທາງບໍຣິສັດ ໄດ້ສັມປະທານແລ້ວ ເຂົາເຈົ້າ ຍັງບໍ່ທັນ ໄດ້ທຳການຜລິດ ແຕ່ປະຊາຊົນ ເຮົາພັດເຂົ້າໄປ ທຳການຜລິດໃສ່. ມີຄວາມ ຊັບຊ້ອນຫຼາຍ ອັນຢູ່ ບາດເວລາ ເຂົາເຈົ້າ ຂຍາຍການ ຜລິດ ເຂົາເຈົ້າອອກ ມັນພັດໄປແຕະຕ້ອງ ຈຳນວນປະຊາຊົນ ທີ່ເຂົ້າໄປທຳການຜລິດ ຢູ່ຂ້າງ ໃນຫັ້ນນ່າ. ມີອັນສລັບສັບຊ້ອນຫຼາຍອັນ ພວກເຮົາ ກໍພຍາຍາມ ແກ້ໄຂ ໃຫ້ມີຜົລປໂຍດ ຮ່ວມກັນ ທັງສອງຝ່າຍ ຫັ້ນແຫຼະ. ຈະບໍ່ ໄດ້ເວົ້າເຖິງຝ່າຍນັ້ນ ຝ່າຍນີ້ ເປັນແນວໃດແນວ ນັ້ນດອກ.
ເຖິງແນວໃດກໍຕາມ, ພວກເຮົາ ກະຖື ຜົລປໂຍດ ຂອງປະຊາຊົນ ເຖິງແມ່ນວ່າ ເຂົາເຈົ້າ ມີການຜລິດ ຢູ່ພາຍໃນຂອບເຂດ ການສັມປະທານ ພວກເຮົາ ກໍຕ້ອງໄດ້ເບິ່ງການ ຊົດເຊີຽ ເຣື່ອງຜົລຜລິດໂຕຈິງ ຂອງເຂົາຫັ້ນ.
ຈະໄດ້ຕາມໃຈ ທີ່ປະຊາຊົນ ຮຽກຮ້ອງນີ້ ອາດຈະເປັນໄປ ບໍ່ໄດ້ ຫຼືວ່າ ຈະໄດ້ຕາມໃຈ ຂອງບໍຣິສັດ ທີ່ວ່າ ໂອ້ອັນນີ້ ແມ່ນເຂດ ຂອງຂ້ອຍ ສັມປະທານແລ້ວ ພວກເຈົ້າ ມາຜລິດໃສ່ ກະພວກເຮົາ ກະບໍ່ຢາກໃຫ້ອອກ ແບບຮູບນັ້ນ ມັນກໍ ບໍ່ງາມປານໃດ. ຢາກໃຫ້ ທຸກຝ່າຍ ມີຜົລປໂຍດ ຮ່ວມກັນ ຫັ້ນແຫຼວ.
ນັກຂ່າວ: ມີປະມານ ຈັກຄອບຄົວນີ້ ທ່ານເຈົ້າເມືອງ?
ເຈົ້າເມືອງ: ໂຕນີ້ນິ ເບື້ອງຕົ້ນ ປະຊາຊົນ ກໍວ່າ ມີຫຼາຍຄອບຄົວ ບາດໄປເອົາ ໂຕຈິງແທ້ໆ ກໍມັນເວົ້າແຕ່ ສຽງຊື່ໆ ບາດໄປຫາຄອບຄົວ ຕົວຈິງແທ້ໆ ກໍຜູ້ນັ້ນກໍບໍ່ຢູ່ ຜູ້ນີ້ກໍບໍ່ຢູ່ ໄດ້ເດືອນປາຍລະ ທີ່ພວກເຮົາ ລົງໄປເກັບກຳ ຂໍ້ມູນນີ້ ຍັງບໍ່ທັນໄດ້ ສໍາເຣັດ ໂຕນີ້ນິ ຊິຕອບ ທ່ານ ໃຫ້ມັນຊັດເຈນ ວ່າ ຈັກຄອບຄົວແທ້ໆນີ້ ຍັງບໍ່ສາມາດ ຕອບໄດ້ ເພາະວ່າ ເຮົາຕ້ອງເອົາຕົວຈິງ.
ນັກຂ່າວ: ກຳນົດ ການຊົດເຊີຽນີ້ ລາຄາເຮົາຊິຕັ້ງ ໄວ້ທໍ່ໃດນີ້ທ່ານ?
ເຈົ້າເມືອງ: ໂຕນີ້ນິ ມັນມີກົດໝາຍ ທີ່ຣັຖບານ ເພິ່ນໄດ້ ອອກມາແລ້ວ. ເພິ່ນໄດ້ມີກົດໝາຍ ວ່າດວ້ຍ ການຊົດເຊີຽແລ້ວ ພວກເຮົາ ຈະບໍ່ໄດ້ ເປັນຝ່າຍກຳນົດ ຫຼື ບໍຣິສັດ ຈະບໍ່ໄດ້ເປັນຝ່າຍ ກຳນົດ ປະຊາຊົນ ກໍຈະບໍ່ໄດ້ ເປັນຝ່າຍກຳນົດ ຕ້ອງໄດ້ ປະຕິບັດ ຕາມກົດໝາຍຫັ້ນ ທີ່ກົດໝາຍ ກຳນົດແລ້ວ ຈະຕ້ອງໄດ້ຄົ້ນຄວ້າ ໃຫ້ ເອກພາບກັນ.
ນັກຂ່າວ: ໂຕນີ້ຈະເອົາຕາມ ດຳຣັຖ 84 ເບາະ ຫຼື ຈະເອົາຕາມ ກົດໝາຍ ວ່າດ້ວຍທີ່ດິນ?
ເຈົ້າເມືອງ: ທີ່ດິນນີ້ ມັນເປັນໄປບໍ່ໄດ້ ເພາະວ່າ ທີ່ດິນນີ້ ມັນຕົກ ຢູ່ໃນ ເຂດສັມປະທານ ຂອງເຂົາເຈົ້າ. ຈັ່ງຊັ້ນ ພວກເຮົາ ຈະໄດ້ເວົ້າການ ຊົດເຊີຽຜົລຜລິດ ບໍ່ແມ່ນຊົດເຊີຽ ເຣື່ອງທີ່ດິນ.
ນັກຂ່າວ: ໂຕທີ່ດິນນີ້ ຈະບໍ່ມີການ ຊົດເຊີຽແມ່ນບໍ່?
ເຈົ້າເມືອງ: ເພາະວ່າ ທາງບໍຣິສັດ ໄດ້ສັມປະທານແລ້ວ ເຂົາກະຊົດເຊີຍໃຫ້ ປະຊາຊົນ ໄປກ່ອນແລ້ວ ການສັມປະທານ ຂອງບໍຣິສັດນີ້ ມັນກໍ ມັນກໍໄດ້ມີການ ຍິນຍອມ ແລະ ການມອບໂອນ ໃຫ້ອົງການ ປົກຄອງຂັ້ນບ້ານ ແລະ ເຂົາມັນມີ ເນື້ອທີ່ ທໍ່ໃດຂອງບ້ານ.
ເຂົາກໍ ຊົດເຊີຽ ເນື້ອທີ່ ຂອງບ້ານ ໄປຕາມການ ຮຽກຮ້ອງ ມີກ່ອນແລ້ວ, ແຕ່ວ່າ ການຜລິດ ຂອງປະຊາຊົນນີ້ ເຂົ້າໄປຜລິດໃນເຂດ ສັມປະທານ ຂອງເຂົາເຈົ້າ. ເຂົາເຈົ້າ ຈະຊົດເຊີຽ ແຕ່ຜົລຜລິດ ຖ້າຫາກວ່າ ແມ່ນກັມສິດ ປະຊາຊົນໄດ້ ຄອບຄອງດິນຫັ້ນ ຕາມກັມສິດ ທີ່ຣັຖໄດ້ມອບໝາຍ ໃຫ້ແມ່ນຈະໄດ້ຊົດເຊີຽ ທາງດ້ານທີ່ດິນພ້ອມ.
ນັກຂ່າວ: ທີ່ດິນ ຂອງປະຊາຊົນ ທີ່ວ່າ ບໍຣິສັດ ສັມປະທານນີ້, ໂຕທີ່ດິນໂຕນີ້ ເຂົາເຈົ້າມີ ໃບຕາດິນຖາວອນຫວະ ຫຼືວ່າ ມີແຕ່ໃບຕາຊົ່ວຄາວ, ການໃຊ້ສິດ ທີ່ດິນຊື່ໆ?
ເຈົ້າເມືອງ: ໂຕນີ້ ແມ່ນອີງໃສ່ ຊົນບົດແລ້ວ ໃນໂຕຈິງ ຂອງຊົນ ບາດແລ້ວ ມັນຈະບໍ່ມີຫຍັງເລີຍ ໃນການຄອບຄອງ ກັນແບບປະເພນີ ມັນບໍ່ແມ່ນ ຄອບຄອງ ຕາມກົດໝາຍ ຈັ່ງຊັ້ນຄັນ ຄອບຄອງ ຕາມປະເພນີຫັ້ນ. ເຂົາເຈົ້າຫັ້ນ ກະມີແຕ່ວ່າ ເນື້ອທີ່ແຕ່ປູ່ ແຕ່ຍ່າ ຂ້ອຍເຮັດໄຮ່ ຂ້ອຍກໍສືບທອດມາ ກໍນັ້ນນ່າ ຄື ບໍ່ທັນມີ ແຕ່ວ່າ ສ່ວນວ່າ ຊິເອີ້ນ ປະຊາຊົນ ໄປເຮັດ ພນັກງານ ເຮົາລົງໄປເຮັດ ໜັງສືທີ່ດິນ ໃຫ້ປະຊາຊົນ ໂອ້ ກະເປັນການ ຍາກຫຼາຍຢູ່.
ນັກຂ່າວ: ແຕ່ວ່າ ມີຈຸດນຶ່ງ ທີ່ໜ້າສົນໃຈ ທ່ານເຈົ້າເມືອງ ກໍຄືວ່າ ໂຕສິດ ນຳໃຊ້ ທີ່ດິນ ຕາມຮີດຄອງ ປະເພນີ ຂອງປະຊາຊົນ ນີ້ນ່າ ເພິ່ນໄດ້ບັນຈຸ ໃສ່ກົດໝາຍທີ່ດິນ ສບັບປັບປຸງ ລະໄດ໋ ທ່ານເຈົ້າເມືອງ, ແຕ່ວ່າ ໂຕນີ້ນິ ມັນຊິມີ ຜົລບັງຄັບ ໃຊ້ບໍ່ ໃນເຂດບ້ານເຮົານີ້?
ເຈົ້າເມືອງ: ອ້າວ ກໍນຳໃຊ້ຕາມນັ້ນແຫຼວ ເຂົາເຈົ້າມອບ ໂອນການນຳ ໃຊ້ທີ່ດິນ ຂອງບ້ານ ໃຫ້ບໍຣິສັດ ສັມປະທານ ຫັ້ນເນາະ ເຂົາເຈົ້າກະມອບ ທີ່ດິນ ການຄອບຄອງ ທີ່ດິນ 8 ປະເພດຫັ້ນແຫຼວ.
ນັກຂ່າວ: ທັງໝົດ ທີ່ວ່າ ເຂົາເຈົ້າ ສັມປະທານ ຈັກພັນ ເຮັກຕ້າຣ໌ ນີ້?
ເຈົ້າເມືອງ: ເຂົາເຈົ້າ ສັມປະທານ ທັງໝົດ 3,500 ເຮັກຕ້າຣ໌ ແຕ່ເຂົາເຈົ້າ ເຮັດໂຕຈິງ ປັດຈຸບັນນີ້ ກະເຮັດໄດ້ແຕ່ 2,080 ເຮັກຕ້າຣ໌. ປະຊາຊົນ ໃນຂອບເຂດ ບ້ານນັ້ນແຫຼ ເປັນຜູ້ໄປ ອອກແຮງງານ ໃຫ້ເຂົາເຈົ້າ.
ນັກຂ່າວ: ແຕ່ດຽວນີ້ ຍັງບໍ່ມີຕົວເລກ ສຣຸບຄັກແນ່ ເນາະວ່າ ມີຈັກຄອບຄົວ ທີ່ໄດ້ຮັບ ຜົລກະທົບ ແລະ ຈະຕ້ອງຈ່າຍ ຄ່າຜົລກະທົບ ທໍ່ໃດ?
ເຈົ້າເມືອງ: ນີ້ແຫຼ ຄືບັນຫາທີ່ ທ່ານ ໄດ້ຮັບ ຈາກແຫຼ່ງຂ່າວ ນີ້ອາດຈະ ປະມານແມ່ນບໍ່?
ນັກຂ່າວ: ຢ່າງໜ້ອຍ 10 ຄອບຄົວ ເທົ່າທີ່ຖາມນຳ ຊາວບ້ານຫັ້ນນ່າ ກະເລີຍວ່າ ຢາກມາຖາມ ໂຕຈິງ ນຳທ່ານ ເຈົ້າເມືອງວ່າ ມັນເປັນຈັ່ງ ໃດກັນແທ້ ຫັ້ນນ່າ.
ເຈົ້າເມືອງ: ດີແທ້ຫັ້ນນ່າ ເຂົ້າມາຖາມ ເຈົ້າເມືອງໂລດ ເພາະວ່າ ອົງກອນທີ່ ໄປຖາມຊາວບ້ານ ໄດ້ຂໍ້ມູນ ບໍ່ຊັດເຈນ ແລະ ກໍໄປເວົ້າທົ່ວທີບ ທົ່ວແດນຫັ້ນນ່າ.
ບາດນີ້ຄື ເອົາບໍຣິສັດ ຮ່ວມງານ ໄປນຳກັນ ອ້າວ ທີ່ຕ້ອງຊົດເຊີຽ ມີທ້າວໃດແດ່ ມີຈັກຄອບຄົວ ເນື້ອທີ່ ເຈົ້າທໍ່ໃດ ເຈົ້າປູກຫຍັງຢູ່ຫັ້ນ ແລະ ກໍຫຼົບໆ ຫຼີກໆ ກໍບໍ່ໃຫ້ຂໍ້ມູນຫັ້ນນ່າ ກໍຍ້ອນວ່າ ເຂົາເຈົ້າ ໃຫ້ຂໍ້ມູນບໍ່ຖືກ.
ໂຕນີ້ ເຮົາ ກໍບໍ່ໄດ້ຖິ້ມ ຄວາມຮັບຜິດຊອບ ໃສ່ປະຊາຊົນໂຕນີ້ ຈັ່ງໃດກໍຕາມ ພວກເຮົາ ຕ້ອງໄດ້ເອົາ ຂໍ້ມູນ ໃຫ້ຊັດເຈນ ໃຫ້ເວລາ ຊົດເຊີຽ ໃຫ້ມັນຖືກຕ້ອງ.
ເອີ ຄັນວ່າ ປະມານ ບາດເຮົາ ຕົກລົງ ກັບບໍຣິສັດ ແລ້ວລະ ພັດມີຫຼາຍກວ່າ ຫັ້ນມາ ຫັ້ນນ່າ ເຮົາຈະເອົາ ຢູ່ໃສ ໄປຊົດເຊີຽ.
ນັກຂ່າວ: ມັນເປັນໄປ ໄດ້ບໍ່ ຊາວບ້ານ ເຂົາເຈົ້າ ອາດຈະຢ້ານບໍ່ ຢ້ານອຳນາດ ການປົກຄອງເບາະ?
ເຈົ້າເມືອງ: ບໍ່ມີການ ນາບຂູ່ ຫຍັງໝົດ ແມ່ນໄປນີ້ ແມ່ນອຳນາດ ການປົກຄອງ ເປັນຜູ້ເຕົ້າໂຮມເນາະ ແລະ ພາໄປເບິ່ງ ຈຸດທຳການຜລິດ ຂອງເຂົາເຈົ້າເອງ, ແຕ່ ນາຍບ້ານ ສເນີມາ ກໍມີແຕ່ວ່າ ປະມານທໍ່ນັ້ນ ປະມານທໍ່ນີ້ ແລະ ຖາມເນື້ອທີ່ ນັ້ນປູກຫຍັງ ປູກຢູ່ໃສ ກໍບໍ່ຮູ້ ຫັ້ນນ່າ. ມີແຕ່ເອົາ ຄວາມເຫັນຂອງຊາວ ບ້ານ ອັນນີ້ ກໍເປັນບັນຫາ ຍາກ ທີ່ພວກເຮົາ ຈະແກ້ໄຂ. ພວກເຮົາ ກໍຈະໄດ້ແກ້ໄຂ ຄື ໄດ້ເວົ້າມາ ເບື້ອງຕົ້ນຫັ້ນ ເຖິງແມ່ນວ່າ ເຂົາຈະ ທຳການ ຜລິດ ໃນຂອບເຂດ ສັມປະທານ ກໍຕາມ, ແຕ່ວ່າ ເຮົາຕ້ອງ ຊົດເຊີຽ ຜົລຜລິດ ຂອງເຂົາເຈົ້າຫັ້ນ ຕ້ອງໄດ້ໃຫ້ ເປັນທັມຫັ້ນນ່າ.
ໃນຂນະທີ່ ຊາວບ້ານ ກໍໃຫ້ ເຫດຜົລວ່າ ບໍຣິສັດ ຍັງບໍ່ທັນຈ່າຍ ຄ່າຊົດເຊີຽດິນນາ ໃຫ້ເຂົາເຈົ້າ. ຊາວບ້ານ ຜູ້ເສັຽຫາຍ ທ່ານນຶ່ງ ກ່າວຕໍ່ ວິທຍຸເອເຊັຽເສຣີ ໃນວັນທີ 30 ກັນຍານີ້ວ່າ:
“ເຂົາເວົ້າວ່າ ຂອງບໍຣິສັດ ບໍ່ແມ່ນຂອງເຈົ້າ ວ່າຖຽງນາ ຂ້ອຍ ກະວ່າ ຂອງບໍຣິສັດ ຂ້ອຍເຮັດ ແຕ່ຂອບເຂດດິນຂ້ອຍ ຫັ້ນ ຮູ້ຢູ່ ຢູ່ກາງສວນບໍຣິສັດ ບໍຣິສັດປັນໃຫ້ ແລ້ວເດ້ ເຂົາສໍາຣວດແລ້ວ 3 ເຮັກຕ້າຣ໌ 30 ແມັດ ດິນນາຫັ້ນ ນ່າ.”
ໃນປີ 2017, ບໍຣິສັດ ສຸກຮຸ່ງເຮືອງ ຂອງວຽດນາມ ເຂົ້າມາ ສັມປະທານ ເນື້ອທີ່ດິນ ທັງໝົດ 2,080 ເຮັກຕ້າຣ໌ ຢູ່ ເຂດ ບ້ານນາລົງເກົ່າ ທີ່ຕິດກັບ ບ້ານອາສິງສະລີ ເພື່ອປູກກ້ວຍຫອມ ເປັນຫຼັກ ແຕ່ຍ້ອນປະສົບ ບັນຫານໍ້າ ບໍ່ພຽງພໍ ຕໍ່ການຜລິດ ຈຶ່ງເຮັດໃຫ້ ຫັນມາປູກ ກວ້ຍນໍ້າ ແລະ ພືດອື່ນໆ ແທນເປັນຕົ້ນ ໝາກມີ້, ໝາກນາວ, ໝາກມ່ວງ ແລະ ໄມ້ວິກ ພ້ອມທັງ ໄດ້ສ້າງຝາຍ ກັ້ນນໍ້າ ເພື່ອກັກເກັບນໍ້າ.