ເງິນກີບມີຣາຄາ ສິນຄ້າສົ່ງອອກຕົກຕໍ່າ

ການສົ່ງອອກ ຂອງລາວ ຫລຸດລົງ ເພາະເງິນ ກີບ ມີຄ່າສູງຂື້ນ ເມື່ອທຽບໃສ່ ເງິນບາດ ຂອງໄທ ແລະ ເງິນດ່ອນລາ ຂອງ ສະຫະຣັຖ.

ພະນັກງານ ບໍຣິສັດ ສົ່ງອອກທີ່ ນະຄອນຫລວງ ວຽງຈັນ ເວົ້າວ່າ ຣາຍໄດ້ ຈາກ ການສົ່ງອອກ ຂອງ ບໍຣິສັດ ອາຈຫລຸດລົງ ປະມານ 2-3 ສ່ວນຮ້ອຍ ໃນປີນີ້, ເລົາ ອະທິບາຍ ເຖີງສາເຫດວ່າ:

“ປີນີ້ສິສົ່ງອອກ ຕ່າງປະເທດ ຄົງຈະບໍ່ດີ ປານໃດ ເພາະວ່າ ມີການເໜັງຕີງ (ຄ່າຂອງເງິນກີບ) ຕໍ່ໜ້າໄປ ການຊ່ວຍເຫລືອ ຫລື ນະໂຍບາຍ ຂອງ ຣັຖບານ ກໍຕ້ອງວາງ ນະໂຍບາຍ ຂອງ ການຊຸກຍູ້ ທາງ ດ້ານ ການຜລິດ ທາງດ້ານ ການຕລາດ.”

ໜັງສືິິພິມ ເສຖກິດ-ສັງຄົມ ຂອງລາວ ຣາຍງານວ່າ ທ່ານ ອ່ອນສີ ບຸດສີວົງສັກ ປະທານ ສະມາຄົມ ອຸດສາຫະກັມ ຕັດຫຍິບ ລາວ ກ່າວວ່າ ໃນຣະຍະ ນຶ່ງປີ ທີ່ຜ່ານມາ ບໍຣິສັດ ຕັດຫຍິບ ໄດ້ກຳໄຣ ບໍ່ເຖິງ 5 ສ່ວນຮ້ອຍ ຂອງມູນຄ່າ ການ ສົ່ງອອກ; ຖ້າເງິນກີບ ຍັງຈະມີຄ່າ ສູງສືບຕໍ່ໄປ ໂຮງງານ ຕັດຫຍິບ ຫລາຍແຫ່ງ ອາດຈະ ລົ້ມລະລາຍ.

ປັດຈຸບັນ ເງິນກີບ ມີຄ່າສູງຂື້ນ ເປັນ 7,600 ກີບ ຕໍ່ນຶ່ງ ດອນລ່າ ສະຫະຣັຖ ຂື້ນຈາກ 8,000 ກີບ ເມື່ອປີກ່ອນ; ເຊັ່ນດຽວກັນ ເມື່ອທຽບໃສ່ ເງິນບາດ ຂອງໄທ ເງິນກີບ ມີຄ່າ 256 ກີບ ຕໍ່ນຶ່ງບາດ ຂື້ນຈາກ 258 ກີບ ເມື່ອປີກາຍ. ນັກທຸຣະກິດ ລາວ ຫລາຍຄົນ ຢາກສເນີໃຫ້ ຣັຖບານ ຊ່ວຍເຮັດໃຫ້ ຄ່າຂອງເງິນກີບ ຕໍ່າລົງ ເພື່ອ ສົ່ງເສີມ ການສົ່ງອອກ.