ຊາວບ້ານຫຍຶບ ປະຕິເສດ ການຊ່ອຍເຫຼືອ

ຊາວບ້ານ ຫຍຶບ ແຂວງເຊກອງ ບໍ່ຍອມຮັບ ການຊ່ວຍເຫລືອ ຂອງ ທາງການ ລາວ ທີ່ ບໍ່ຖືກຕ້ອງ ຕາມເປົ້າໝາຍ ຫາລ້ຽງຊີພ ຂອງ ພວກຂະເຈົ້າ.

ພາຍຫລັງທີ່ ວິທຍຸເອເຊັຽເສຣີ ໄດ້ຣາຍງານ ໂດຍອິງຕາມ ຄໍາເວົ້າ ຂອງ ເຈົ້າໜ້າທີ່ ກະຊວງ ກະສິກັມ ແລະປ່າໄມ້ ຂອງລາວ ທີ່ວ່າ ໄດ້ແກ້ໄຂ ບັນຫາຂັດແຍ່ງ ເຣື່ອງທີ່ດິນ ຂອງຊາວບ້ານ ໃນບ້ານຫຍຶບ ເມືອງທ່າແຕງ ແຂວງເຊກອງ ໄດ້ຮຽບຮ້ອຍ ແລ້ວ ໂດຍຈັດສັນ ທີ່ດິນ ປະມານ 100 ເຮັກຕາ ໃຫ້. ແຕ່ຕໍ່ມາ ມີຂ່າວຈາກ ຜູ້ບໍ່ປະສົງ ອອກຊື່ ຈາກ ແຂວງເຊກອງ ທ່ານນຶ່ງວ່າ ການແກ້ໄຂ ຂອງ ຣັຖບານ ນັ້ນ ຊາວບ້ານ ຍັງບໍ່ພໍໃຈ ເຮັດໃຫ້ ພວກເຂົາເຈົ້າ ຈໍານວນນຶ່ງ ບໍ່ຍອມຮັບເອົາ ການຊ່ວຽເຫລືອ ດັ່ງກ່າວ. ທ່ານວ່າ:

"ບໍ່ສາມາດ ຕອບສນອງ ບໍ່ສາມາດ ແກ້ໄຂ ຄວາມທຸກຍາກ ມັນບໍ່ ສົມເຫດສົມຜົລ ກັບສິ່ງທີ່ ເຂົາສູນເສັຽໄປ ເຂົາກໍບໍ່ ຮັບຮອງເນາະ ອີກຢ່າງໜຶ່ງ ທາງ ເຈົ້າໜ້າທີ່ຣັຖ ກໍມາຈັບ ຊາວບ້ານ ໄປໃສ່ ຂັງຄຸກ ຂັງຕລາງ ຊີ່ໃຫ້ເຂົາ ຍອມງ່າຍໆ ເຂົາກໍບໍ່ຍອມ ຫັ້ນນະ".

ທ່ານ ໃຫ້ຂໍ້ມູນ ຕື່ມອີກວ່າ ການກົດດັນ ຂອງຣັຖບາລ ໃຫ້ຊາວບ້ານ ຮັບເອົາການ ຊ່ວຍເຫລືອນັ້ນ ເຮັດໃຫ້ເກີດ ມີຄວາມຂັດແຍ່ງ ຂຶ້ນໃນໝູ່ບ້ານ. ຊາວບ້ານ ແບ່ງອອກ ເປັນສອງກຸ່ມ ຄືກຸ່ມ ທີ່ຍອມຮັບເອົາ ເຖິງແມ່ນ ຈະບໍ່ພໍໃຈ ຍ້ອນຢາກໃຫ້ ບັນຫາ ນັ້ນຈົບລົງ ແລະ ກຸ່ມທີ່ ບໍ່ຍອມຮັບເອົາ.

ການຮຽກຮ້ອງ ທີ່ດິນ ທໍາມາຫາກິນ ຂອງ ຊາວບ້ານ ຫຍຶບ ຍ້ອນທີ່ດິນ ຂອງພວກຕົນ ຖືກ ທາງການ ຍຶດເອົາໄປ ໃຫ້ໂຄງການ ຂອງ ຕ່າງປະເທດ ແມ່ນເລີ່ມມາ ແຕ່ຕົ້ນປີ 2008 ຫລັງຈາກ ຣັຖບານ ໄດ້ອະນຸມັດ ທີ່ດິນ ຈໍານວນ 100 ເຮັກຕາ ໃຫ້ ບໍຣິສັດ ເອກກະຊົນ ວຽດນາມ ປູກຢາງພາລາ ແລະ ບັນຫາ ຍິ່ງຮຸນແຮງ ຂຶ້ນ ຍ້ອນວ່າ ເຈົ້າໜ້າທີ່ ທາງການລາວ ຈັບຊາວບ້ານ ທີ່ຮຽກຮ້ອງ ສິດທິ ໃນທີ່ດິນ ຂອງຕົນ ຕໍ່ອໍານາດ ການປົກຄອງ ບ້ານເມືອງ.