ຣົດໄຟລາວ-ຈີນຄືບໜ້າ ຄ່າຊົດເຊີຍ ຄືບຄານ

ມາເຖິງປັດຈຸບັນ ການກໍ່ສ້າງທາງຣົດໄຟລາວ-ຈີນ ແຕ່ສະຖານີວຽງຈັນໃຕ້ ທີ່ນະຄອນ ຫຼວງວຽງຈັນ ໄປຫາດ່ານຊາຍແດນສາກົນ ບໍ່ເຕັນ ແຂວງຫຼວງນໍ້າທາ ຄືບໜ້າໄປແລ້ວ 93.82%, ຄາດວ່າຈະສໍາເຣັດ ແລະເປີດໃຊ້ໃນເດືອນທັນວາ ທີ່ຈະມາເຖິງນີ້ ອີງຕາມ ການຣາຍງານ ຂອງຄະນະຄຸ້ມຄອງໂຄງການ ກໍ່ສ້າງທາງຣົດໄຟ ລາວ-ຈີນ ໃນເດືອນສິງຫານີ້.

ແຕ່ເຣື່ອງການຊົດເຊີຍ ຄວາມເສັຍຫາຍໃຫ້ປະຊາຊົນ ທີ່ໄດ້ຮັບຜົລກະທົບນັ້ນ ເປັນໄປແບບຊັກຊ້າ, ຍັງບໍ່ທັນແລ້ວເທື່ອ ແລະບໍ່ໄດ້ ກໍານົດວ່າ ຈະຈ່າຍຄ່າຊົດເຊີຍນັ້ນ ໃຫ້ແລ້ວເມື່ອໃດ, ມີແຕ່ບອກວ່າ ໃຫ້ປະຊາຊົນລໍຖ້າ ດັ່ງຊາວບ້ານຜູ້ໄດ້ຮັບ ຜົລກະທົບຈາກ ໂຄງການທາງຣົດໄຟ ຢູ່ນະຄອນຫຼວງວຽງຈັນ ນາງນຶ່ງ ເວົ້າຕໍ່ວິທຍຸເອເຊັຍເສຣີ ໃນມື້ວັນທີ 18 ສິງຫາ ນີ້ວ່າ:

“ຍັງບໍ່ມີຫຍັງຄືບໜ້າເທື່ອ ຍັງບໍ່ໄດ້ແຈ້ງນ່າ ເຈົ້າ ຍັງລໍຖ້າຢູ່ກະຖາມຢູ່ແຕ່ເພິ່ນບອກໃຫ້ລໍຖ້າກ່ອນ ເພິ່ນກະສິໃຫ້ຢູ່ຕິເບາະ ຫຼືວ່າຈັ່ງໃດ ເພາະວ່າເພິ່ນກະເຮັດ ໃບອິຫຍັງໃຫ້ຄັກແນ່ເດ໋.”

ໃນຂນະດຽວກັນ ຊາວບ້ານອີກຄອບຄົວນຶ່ງ ຢູ່ນະຄອນຫຼວງວຽງຈັນ ທີ່ຍັງບໍ່ໄດ້ຮັບຄ່າຊົດເຊີຍ ຈາກທາງໂຄງການເທື່ອນັ້ນກໍເວົ້າ ໃນມື້ດຽວກັນນີ້ວ່າ ເມື່ອບໍ່ດົນມານີ້ ຕົນກໍໄດ້ຖາມໄປ ຍັງພາກສ່ວນທີ່ກ່ຽວຂ້ອງຂັ້ນເມືອງ ເຣື່ອງຄ່າຊົດເຊີຍ ແຕ່ໄດ້ຮັບຄໍາຕອບວ່າ ພາກສ່ວນທີ່ກ່ຽວຂ້ອງ ພວມດໍາເນີນການຢູ່ ຊຶ່ງຕົນກໍໄດ້ແຕ່ຫວັງວ່າ ຈະໄດ້ຮັບຄ່າຊົດເຊີຍ ນັ້ນໃນມໍ່ໆນີ້:

“ໜ້າຈະໄດ້ນ່າ ກະບໍ່ຫຼາຍກະຕາມເອກກະສານ ທີ່ເພິ່ນແຈ້ງມາຫັ້ນ ຄັນອັນນັ້ນກະຊົດເຊີຍໄວເທົ່າໃດກະແຫ່ງດີ.”

ເວົ້າເຣື່ອງຄ່າຊົດເຊີຍ ເຈົ້າໜ້າທີ່ທ່ານນຶ່ງ ທີ່ເຮັດວຽກກ່ຽວກັບການໄກ່ເກັ່ຍ ແລະການຊົດເຊີຍແກ່ຜູ້ໄດ້ ຮັບຜົລກະທົບຈາກໂຄງການ ກໍ່ສ້າງທາງຣົດໄຟ ລາວ-ຈີນ ຢູ່ແຂວງພາກເໜືອ ກ່າວຕໍ່ວິທຍຸເອເຊັຍເສຣີ ໃນມື້ວັນທີ 18 ສິງຫາ ນີ້ວ່າ ສໍາລັບຢູ່ເຂດເມືອງຂອງທ່ານ ມາຮອດມື້ນີ້ ກໍຍັງບໍ່ທັນໄດ້ຮັບ ງົບປະມານຈາກທາງຣັຖບານເທື່ອ ເພື່ອນໍາໄປເບີກຈ່າຍ ໃຫ້ຜູ້ໄດ້ຮັບ ຜົລກະທົບ ທີ່ຍັງລໍຖ້າການ ຊົດເຊີຍຢູ່, ແຕ່ເຖິງຢ່າງໃດກໍຕາມ ຕົນກໍຍັງເຊື່ອວ່າ ພາກສ່ວນທີ່ກ່ຽວຂ້ອງ ຈະມອບງົບປະມານ ນັ້ນໃຫ້ພາຍໃນປີນີ້:

“ເພິ່ນຍັງຄົ້ນຄວ້າເຣື່ອງເອກສານ ຍັງເຊັນບໍ່ທັນແລ້ວ ຄືສິບໍ່ກາຍ 2021 ດອກ ມີປະຊຸມຢູ່ນະຄອນຫຼວງວຽງຈັນ ກ່ຽວກັບການເຊັນ ເອກສານ ຝ່າຍນີ້ແຫຼະ.”

ປັດຈຸບັນ ບໍຣິສັດທາງຣົດໄຟ ລາວ-ຈີນ ຈໍາກັດ ໄດ້ເປີດຮັບເອົາພະນັກງານລາວ ໃນຕໍາແໜ່ງບໍາລຸງຮັກສາ ອຸປກອນຕ່າງໆຂອງ ຣົດໄຟ ແລະເປັນພະນັກງານ ໃນສະຖານີຣົດໄຟ ແຕ່ລະ ແຫ່ງຕື່ມອີກ 200 ຄົນ ຊຶ່ງກໍມີຫຼາຍຄົນສົນໃຈ ແລະ ສົ່ງໃບສມັກໄປ ຍັງບໍຣິສັດແລ້ວ ດັ່ງຊາວລາວຜູ້ນຶ່ງ ທີ່ສົນໃຈເຮັດວຽກນັ້ນ ເວົ້າຕໍ່ວິທຍຸເອເຊັຍເສຣີວ່າ:

“ສົນໃຈກ່ຽວກັບວຽກຕໍາແໜ່ງໃດຫວ່າງ ວ່າຊັ້ນເດ໋ ເປັນວຽກກ່ຽວກັບຊ່າງເຊື່ອມ ຫຼືວ່າໄຟຟ້າ ປົກກະຕິເຄີຍເຮັດວຽກກ່ຽວກັບພວກ ໄຟຟ້າ ນີ້ ໄດ້ເຫັນຂະເຈົ້າສົນໃຈຫຼາຍຄົນ.”

ແລະຊາວລາວອີກນາງນຶ່ງ ທີ່ສົນໃຈເຮັດວຽກຄືກັນນັ້ນ ກໍເວົ້າວ່າ ນາງໄດ້ສົ່ງໃບສມັກເຮັດວຽກ ເຖິງບໍຣິສັດແລ້ວ ແຕ່ບໍ່ໄດ້ຣະບຸ ຕໍາແໜ່ງວຽກ ທີ່ຕົນສົນໃຈຢາກເຮັດ ລໍຖ້າໃຫ້ທາງ ບໍຣິສັດ ພິຈາຣະນາຕາມຄວາມເໝາະສົມ:

“ນ້ອງໄດ້ສົ່ງເອກສານໄປ ອີແມວ ໄປແຕ່ວ່າເຂົາຍັງບໍ່ຕອບເທື່ອ ນ້ອງນີ້ກໍເໝາະສົມ ຢູ່ສາຂາໃດກະສິເຮັດຫັ້ນນ່າ ຄັນມີຂແນງໃດ ທີ່ນ້ອງເຮັດໄດ້ຫັ້ນນ່າ ບໍ່ຕ້ອງການກະບໍ່ເປັນຫຍັງ.”

ກ່ຽວກັບເຣື່ອງນີ້ ເຈົ້າໜ້າທີ່ ປະຈໍາບໍຣິສັດທາງຣົດໄຟ ລາວ-ຈີນ ທ່ານນຶ່ງ ທີ່ບໍ່ປະສົງອອກຊື່ແລະສຽງ ເວົ້າວ່າ ເຣື່ອງການຮັບສມັກ ພະນັກງານໃນເທື່ອນີ້ ແມ່ນຈະເອົາແຕ່ ພະນັກງານ ທີ່ເປັນຄົນລາວ ເພດຊາຍ ແລະ ຮູ້ຈັກພາສາຈີນ, ຈະໄດ້ຮັບການ ພິຈາຣະນາ ເປັນພິເສດ ສໍາລັບຜູ້ສມັກ ທີ່ໄດ້ຜ່ານການສັກວັກຊິນ ປ້ອງກັນໂຄວິດ-19 ຄົບ 2 ເຂັມແລ້ວ ແລະ ຈະເປີດຮັບສມັກ ໄປຮອດມື້ວັນທີ 30 ກັນຍາ 2021 ນີ້.

ເຣື່ອງການທົດລອງ ແລ່ນຣົດໄຟລາວ-ຈີນ ທາງໂຄງການຣົດໄຟ ໄດ້ເຍີ້ນແຜນທົດລອງແລ່ນ ແຕ່ນະຄອນຫຼວງວຽງຈັນ ຫາຊາຍແດນ ລາວ-ຈີນ ບໍ່ເຕັນ ແຂວງຫຼວງນໍ້າທາ ຈາກແຜນເດີມ ທີ່ວ່າຈະທົດລອງ ໃນເດືອນ ສິງຫາ ນີ້ ໄປໃສ່ເດືອນຕຸລາ ຍ້ອນຫົວລາກຣົດ ແລະ ອຸປກອນຕ່າງໆ ຈາກປະເທດຈີນ ຍັງບໍ່ທັນຂົນມາຮອດລາວ, ແຕ່ກໍຄາດວ່າຈະມາຮອດ ໃນເດືອນ ກັນຍາ ທີ່ຈະມາເຖິງນີ້ ອີງຕາມຣາຍງານ ຂອງ ໜັງສືພິມວຽງຈັນທາຍ ວັນທີ 18 ສິງຫາ 2021.

ໂຄງການກໍ່ສ້າງທາງຣົດໄຟ ລາວ-ຈີນ ຕັ້ງແຕ່ນະຄອນຫລວງວຽງຈັນ ຫາຊາຍແດນລາວ-ຈີນ ບໍ່ເຕັນ ແຂວງຫລວງນໍ້າທາ ຍາວ 422.4 ກິໂລແມັຕ ມູນຄ່າ ການກໍ່ສ້າງ 5.9 ຕື້ ໂດລາ ສະຫະຣັຖ. ໃນນັ້ນ ມີສະຖານີຣົດໄຟ ທັງໝົດ 32 ແຫ່ງ ຄືສະຖານີຂົນສົ່ງ ຜູ້ໂດຍສານ 10 ແຫ່ງ ແລະ ສະຖານີຂົນສົ່ງ-ເຄື່ອນຖ່າຍ ສິນຄ້າ 22 ແຫ່ງ ຊຶ່ງມີກໍານົດເປີດນໍາໃຊ້ ໃນມື້ວັນທີ 2 ທັນວາ 2021 ກົງກັບວັນສ້າງຕັ້ງ ສາທາຣະນະຣັຖ ປະຊາທິປະໄຕ ປະຊາຊົນລາວ.