ຫັຖກັມຕໍ່າສີ້ນບ້ານໜອງແຮດ ຕ້ອງການ ຕລາດ

ພໍ່ບ້ານໜອງແຮດແຂວງຊຽງຂວາງເວົ້າວ່າ ແມ່ຍິງໃນໝູ່ບ້ານແລະບ້ານໃກ້ຄຽງ ໄດ້ປະກອບອາຊີບໃຫມ່ເພື່ອຫາລາຍໄດ້ມາຊ່ອຍຄອບຄົວຫລັງ ຈາກການກະສີກັມແລ້ວ ກໍຄືການຕໍ່າສີ້ນຂາຍ ແຕ່ໃນປັດຈຸບັນ ຜລິຕພັນສີ້ນ ຂອງພວກຂະເຈົ້າ ຖືກພໍ່ຄ້າຄົນກາງເອົາຣັດເອົາປຽບ ດ້ວຍການ ບຸບຣາຄາລົງ ຈື່ງຕ້ອງການຢາກໃຫ້ທາງການ ອອກມາຊ່ອຍຫາຕລາດໃຫ້:

"ຜູ້ຍິງຢູ່ບ້ານນອກນີ້ເຂົາບໍ່ເຄີຍໄປຕລາດໃຫຍ່ ບ່ອນມັນຂາຍຫັ້ນເດມີແຕ່ຂະເຈົ້າມາເອົາເອງ ບາງເທື່ອເຂົາກໍວ່າບໍ່ເອົາແລ້ວມັນແບບກົ່ງຣາຄາ ຫັ້ນນາ ເຮັດໃຫ້ຣາຄາສີ້ນບໍ່ຄົງທີ່ ຈື່ງເວົ້າວ່າຢາກໃຫ້ຂັ້ນເທີງນັ້ນ ຊ່ອຍເຣື້ອງຕລາດ ຮອງຮັບກ່ຽວກັບສີ້ນປະເພດສິນຄ້ານີ້".

ທ່ານກ່າວຕໍ່ໄປວ່າ ຊາວບ້ານປະມານ 70 ຄອບຄົວໃນນັ້ນ 60% ມີລາຍໄດ້ໂດຍສະເລັ່ຽຫລາຍກວ່າ 9 ແສນກີບ ຕໍ່ຄອບຄົວຕໍ່ເດືອນ ແລະມີ ລາຍໄດ້ເພີ້ມຈາກການຕໍ່າສີ້ນຂາຍ ຄອບຄົວລະ 2 ແສນກວ່າກີບຕໍ່ເດືອນ ນອກຈາກການກະເສດ ຈົນເຮັດໃຫ້ຫລາຍຄອບຄົວ ພົ້ນຈາກເກນ ຄວາມທຸກຍາກ ຂອງຣັຖບານ ໂດຍສະເພາະກຸ່ມແມ່ຍິງ ທີ່ມີອາຊີບເສີມດ້ວຍການຕໍ່າສີ້ນຂາຍ ຊື່ງໃນປັດຈຸບັນໃນຫມູ່ບ້ານຂອງລາວມີ 70 ກວ່າກີ່ ສາມາດຜລິດສິ້ນໄດ້ ໂດຍສະເລັ່ຽເດືອນລະ 150 ຜຶນ.

ພໍ່ບ້ານທ່ານນີ້ ກ່າວເພີ້ມວ່າ ແມ່ຍິງທີ່ຕໍ່າສີ້ນໃນຫມູ່ບ້ານຂອງລາວ ສ່ວນຫລາຍ ເລີ້ມຕົ້ນຫາທຶນດ້ວຍການກູ້ຢືມທະນາຄານຫາກຖືກກົດຣາຄາ ສີ້ນລົງ ຫລາຍກວ່ານີ້ພວກຂະເຈົ້າກໍຈະບໍ່ສາມາດສົ່ງເງິນຄືນໃຫ້ແກ່ທະນາຄານໄດ້ຈື່ງຕ້ອງການ ຢາກໃຫ້ຣັຖບານເຂົ້າມາຊ່ອຍຫາຕລາດໃຫ້.