ຫວຍຫຼາຍປະເພດ ຈະຖືກຍົກເລີກ

ຫ້ອງວ່າການ ສຳນັກງານນາຍົກຣັຖມົນຕຼີ ໄດ້ອອກແຈ້ງການວັນທີ 17 ສິງຫາ ໃຫ້ຍົກເລີກ ການອອກຫວຍຫຼາຍປະເພດ ແລະ ຫຼຸດຜ່ອນ ການອອກຫວຍພັທນາ ເພື່ອບໍ່ໃຫ້ເກີດ ຄວາມວຸ້ນວາຍ ໃນສັງຄົມ. ແຈ້ງການດັ່ງກ່າວ ໄດ້ລະບຸວ່າ ໃຫ້ຫຼຸດ ການອອກຫວຍ ພັທນາ ຈາກ 2 ເທື່ອ ຕໍ່ອາທິດ ມາເປັນ 1 ເທື່ອ ຕໍ່ອາທິດ, ໃຫ້ຍົກເລີກຫວຍມີຖື, ຍົກເລີກຫວຍປິງໂກ້, ຍົກເລີກຫວຍໂລໂຕ້ ແລະ ຈຳກັດ ການອອກ ຫວຍຂູດ ໃຫ້ຢູ່ໃນປະລິມານຈຳກັດ. ສາເຫດ ກໍຍ້ອນວ່າ ການຫຼິ້ນຫວຍ ເປັນອັນຕະລາຍ ແລະ ສົ່ງຜົລກະທົບ ຕໍ່ສັງຄົມ, ດັ່ງເຈົ້າໜ້າທີ່ ຂັ້ນສູງ ກະຊວງປ້ອງກັນ ຄວາມສະຫງົບ ທ່ານນຶ່ງ ໄດ້ກ່າວ ໃນວັນທີ 21 ສິງຫາ ວ່າ:

"ເພິ່ນໃຫ້ເຊົາໝົດ ອັນໃດ ກະມະໂຍະມະຍະ ມັນຈະເປັນອັນຕະລາຍ ອັນໃດເພິ່ນກະຄົ້ນຄ້ວາ ເຫັນວ່າ ມັນຈະເປັນຜົລກະທົບ ຕໍ່ສັງຄົມ ເພິ່ນກະ ໃຫ້ເລີກໃຫ້ເຊົາ ໝົດຫັ້ນແລ້ວ ສັ່ງລົບລ້າງໃຫ້ໝົດຫັ້ນແຫລະ."

ແຕ່ຣາຍຣະອຽດ ໃນການຈັດຕັ້ງ ປະຕິບັດ ຍັງບໍ່ທັນໄດ້ກຳນົດ ຢ່າງຣະອຽດວ່າ ຈະປະຕິບັດເມືອງໃດ. ທ່ານ ສີລາ ວຽງແກ້ວ ຮອງຣັຖມົນຕຼີ ກະຊວງການເງິນ ໄດ້ກ່າວຕໍ່ ເອເຊັຽ ເສຣີ ເມື່ອວັນທີ 21 ສິງຫາ ວ່າ: ຣາຍຣະອຽດໃນການປະຕິບັດ ກໍຕາມແຈ້ງການນັ້ນ ແຕ່ວ່າ ຍັງບໍ່ທັນ ໄດ້ກຳນົດມື້ຶ້ ລົງມື້ປະຕິບັດເທື່ອ ເພາະວ່າ ມັນຕ້ອງມີປະຊຸມ ສະພາ ບໍຣິຫານ ຂອງເຂົາກ່ອນ [ໝາຍເຖິງສະພາບໍຣິຫານຫວຍພັດທະນາ].

ທ່ານ ກ່າວຕື່ມວ່າ: ໃນສ່ວນ ຂອງພວກເຮົາ ໝາຍເຖີງ [ກະຊວງການເງິນ] ກະມີແຕ່ ປະຕິບັດ ຕາມທິດນຳ ຂອງຣັຖບານ ກະຖືວ່າ ເໝາະສົມ ແລ້ວ ກະດີ ບໍ່ເປັນຫຍັງ ໃນການດຳເນີນ ນະໂຍບາຍ ຂອງຣັຖບານ ຖ້າວ່າ ອັນໃດເຫັນວ່າ ບໍ່ເໝາະສົມ ພວກເຮົາກໍປັບປຸງ. ທີ່ຜ່ານມາ ມີການ ອອກຫວຍ ອາທິດລະ 3 ເທື່ອ ແລະ ຫຼຸດລົງມາ ເປັນ ເຫຼືອພຽງ 2 ເທື່ອ ຕໍ່ອາທິດ ໃນທ້າຍປີ 2016 ຫຼັງຈາກ ທີ່ມີຫາງສຽງ ສັງຄົມວິຈານວ່າ ມີການລ໊ອກເລກ ຍ້ອນວ່າ ອອກເລກຊໍ້າກັນ ຫຼາຍງວດ.

ກ່ຽວກັບ ເລື້ອງນີ້ ທ່ານ ສີລາ ວຽງແກ້ວ ກໍຢືນຢັນວ່າ: ເລື້ອງໂປ່ງໄສ ມັນບໍ່ມີບັນຫາຫຍັງ ເພາະວ່າ ເຂົາມີຄະນະກຳມະການ ມາຈາກ 7 ພາກສ່ວນ ມີແຕ່ບາງຄົນຊື່ໆ ເວົ້າວ່າ ບໍ່ໂປ່ງໄສ ມັນບໍ່ມີຄວາມຈິງດອກ ອັນນັ້ນມັນກະໂປ່ງໄສ ຫັ້ນແຫລະ ມັນບໍ່ມີຫຍັງດອກ ໂປ່ງໄສໝົດ ຫັ້ນແຫລະ. ດຽວນີ້ມັນ ສາມາດກວດສອບໄດ້ ໃນຄະນະກຳມະການຈາກ 7 ພາກສ່ວນ ບໍ່ມີບັນຫາດອອກ ອັນນັ້ນ.

ພວກເຮົາ ມະຫາພາກ ປະຕິບັດຕາມ ຈິດໃຈນະໂຍບາຍ ຂອງຣັຖບານ ຫັ້ນແຫລະ ບໍ່ມີບັນຫາຫຍັງວ່າຊັ້ນ, ຄັນວ່າມື້ໃດຊິຈັດຕັ້ງປະຕິບັດ ກະຊິໃຫ້ໄວ ເທົ່າທີ່ຈະໄວ້ ໄດ້ຫັ້ນແຫລະ ເພາະວ່າ ໃຫ້ສະພາ ບໍຣິຫານ ຂອງຫວຍ ເຂົາຕົກລົງກັນກ່ອນ ເຂົາຍັງຄົງຈະປຶກສາຫາລືກັນກ່ອນ ເພາະວ່າ ເຂົາເຈົ້າ ຈະຕົກລົງກັນວ່າ ຈະກຳນົດເອົາມື້ໃດ: ທ່ານ ສີລາ ວຽງແກ້ວ ກ່າວ.