ເສຖກິດ ສປປ ລາວ ປີ 2013

ໃນປີ 2013 ນີ້ ການເຕີບໂຕ ຂອງ ເສຖກິດ ສປປ ລາວ ອາຈຫລຸດລົງ.

ເຈົ້າໜ້າທີ່ ກະຊວງ ແຜນການ ແລະ ການລົງທຶນ ເວົ້າວ່າ ການເຕີບໂຕ ຂອງ ເສຖກິດ ສປປ ລາວ ໃນປີ 2013 ນີ້ ອາຈຫລຸດລົງ ຍ້ອນວ່າ ຫລັງຈາກ ຣັຖບາລ ປະກາດໂຈະ ການໃຫ້ ສັມປະທານ ທີ່ດິນ ເພື່ອ ການກະສິກັມ ແລະ ຂຸດຄົ້ນ ບໍ່ແຮ່ ຊຶ່ງເປັນຂແນງ ເສຖກິດ ສໍາຄັນ ພວກນັກລົງທຶນ ຕ່າງປະເທດ ກໍຫລຸດລົງ ກວ່າປີກ່ອນ ແລະ ລາວເອງ ກໍມີໂຄງຮ່າງ ພື້ນຖານ ທີ່ຈໍາກັດ ສໍາລັບ ຮອງຮັບ ການລົງທຶນ ຂອງ ຕ່າງປະເທດ:

"ແມ່ນລະ 8% ກວ່າໜ້ອຍນຶ່ງ ວຽກງານ GDP ຫັ້ນແມ່ນ ຕາມແຜນ ພວກເຮົາ ຢາກໄດ້ນັ້ນ 10 ແຕ່ວ່າມັນ ອາຈບໍ່ໄດ້ ຕາມແຜນ ເພາະເຮົາເປັນ ປະເທດທີ່ວ່າ ບໍ່ໄດ້ມີການ ດຶງດູດ ການລົງທຶນ ທີ່ນີ້ ເຣື່ອງພື້ນທີ່ ອີ່ຫຍັງບໍ່ ທ່າແຮງ ອີ່ຫຍັງບໍ່ ເຂົາບໍ່ໄດ້ ກຽມໄວ້ສໍາລັບ ຮອງຮັບ ການລົງທຶນ".

ຄວາມເຫັນ ຂອງເຈົ້າໜ້າທີ່ ລາວ ສອດຄ່ອງ ກັບ ບົດຣາຍງານ ຂອງ ທະນາຄານ ພັທນາ ເອເຊັຍ ຫລື ADB ທີ່ຄາດວ່າ ໃນປີ 2013 ນີ້ ການເຕີບໂຕ ຂອງ ເສຖກິດລາວ ອາຈຫລຸດລົງ ເຫລືອພຽງ 7.7% ຈາກ 7.9% ເມື່ອປີ 2012 ຍ້ອນໂຄງການ ພັທນາ ຂອງຣັຖ ບໍ່ມີຫລາຍ.

ໃນປີ 2012 ທີ່ຜ່ານມາ ລວມຍອດມູນຄ່າ ຜລິຕພັນ ພາຍໃນ ຫລື GDP ຂອງລາວ ມີ 9,150 ລ້ານ ໂດລາ ສະຫະຣັດ ຄື ຫລາຍກວ່າປີ 2011 8.3% ຍ້ອນຂແນງ ກະສິກັມ, ພະລັງງານ ແລະບໍ່ແຮ່. ແຕ່ຣາຍໄດ້ ໃນປີນີ້ ອາດມາຈາກ ພາກສ່ວນ ພະລັງງານ ຍ້ອນຣັຖບາລ ສຸມໃສ່ ການກໍ່ສ້າງ ເຂື່ອນ ຜລິດກະແສ ໄຟຟ້າ ຫລາຍແຫ່ງ ຮວມທັງການ ກໍ່ສ້າງ ສາຍສົ່ງໄຟຟ້າ ນໍາດ້ວຍ.