ນະຄອນຫຼວງວຽງຈັນ ຫ້າມຂຶ້ນລາຄາ ຊີ້ນ ແລະ ປາ
2019.12.26
ຊີ້ນໝູ ທີ່ ຈໍາໜ່າຍໃນຕລາດແຫ່ງນຶ່ງ ຢູ່ນະຄອນຫຼວງວຽງຈັນ
RFA/TS
ໃນໄລຍະ ງານເທສການ ສົ່ງທ້າຍປີເກົ່າ ຕ້ອນຮັບປີໃໝ່ 2020, ຜແນກອຸດສາຫະກັມ ແລະ ການຄ້າ ນະຄອນຫຼວງວຽງຈັນ ຫ້າມຜູ້ຂາຍຊີ້ນ ແລະ ປາ ຂຶ້ນລາຄາ ເກີນທີ່ກຳນົດໄວ້. ຊີ້ນໝູ ໃຫ້ຂາຍ ໃນລາຄາ 36,000 ກີບ ຕໍ່ກິໂລກຣາມ ແລະ ໝູສາມຊັ້ນ 34,000 ກີບ ຕໍ່ກິໂລກຣາມ.
ເຈົ້າໜ້າທີ່ ຜແນກອຸດສາຫະກັມ ແລະ ການຄ້າ ນະຄອນຫຼວງວຽງຈັນ ໄດ້ກ່າວຕໍ່ ເອເຊັຽເສຣີ ໃນວັນທີ 25 ທັນວາ ວ່າ:
“ບໍ່ໃຫ້ຂຶ້ນລາຄາ ຕາມລຳພັງໃຈ ມັນມີໂຄງສ້າງ ລາຄາໝູ ມັນກະມີເດ້ ປາກະມີນ່າ. ລະໃຫ້ຂາຍ ໃນລາຄາ ທີ່ຣັຖເຮົາ ກຳນົດໄວ້. ຫ້າມແລ້ວ ໄລຍະນີ້ ບໍ່ໃຫ້ປັ່ນປ່ວນ ລາຄາ ກໍວ່າໃນໄລຍະ ປີນີ້ແຫຼະ ມັນເປັນມາຕການ ທຸກປີ ເພາະວ່າ ຣະບຽບມັນຢູ່ ໃນດຳຣັຖ ຂອງການຄຸ້ມຄອງ ລາຄາສິນຄ້າ. ໄທເຮົາກໍເຕືອນ ເຂົາເຈົ້າຄືນ ຊື່ໆດອກເນາະ.”
ສະເພາະລາຄາ ປາກະຊັງ ແມ່ນ 20,000 ກີບ ຕໍ່ກິໂລກຣາມ, ຊີ້ນງົວ-ຄວາຍ 75,000 ກີບ ຕໍ່ກິໂລກຣາມ. ດັ່ງເຈົ້າໜ້າທີ່ ກ່າວຕື່ມອີກ ວ່າ:
“ດຳລັດ 474 ໄດ້ກຳນົດໄວ້ແຈ້ງ ວ່າ ຜູ້ໃດ ຂຶ້ນລາຄາ ຈາກຣັຖກຳນົດໃຫ້ ຄັນວ່າເຫັນ ຈະໄດ້ທັກ ໄດ້ທ້ວງ ບໍ່ໃຫ້ເຮັດອີກ. ຄັ້ງທີນຶ່ງ ຕັກເຕືອນ ສຶກສາອົບຮົມ, ຄັ້ງທີສອງ ຈະປັບໄໝ ທໍ່ໃດ ມັນມີຣະບຽບ ຂອງມັນ ໂຕນີ້ນະ.”
ປະຊາຊົນ ຊາວນະຄອນຫຼວງວຽງຈັນ ທ່ານນຶ່ງ ກ່າວວ່າ ປັດຈຸບັນ ຊີ້ນໝູ ຢູ່ຕາມຕລາດ ຂາຍຢູ່ປະມານ 35,000 ກີບ ຕໍ່ກິໂລກຣາມ.
“ເຄີຍຊື້ລາຄາ ຊີ້ນກ້ອນເນາະ 35,000. ຊີ້ນສາມຊັ້ນຫັ້ນ 30,000 ລາຄາ ປົກກະຕິ. ຊີ້ນໝູ ມັນຢູ່ຄົງທີ່ແລ້ວ ກະລາຄາາສ່ຳນັ້ນ. ມັນມີ ການຄວບຄຸມ ຂອງຣັຖບານພຸ້ນເດ້, ຖ້າຜູ້ໃດ ຂາຍເກີນ ກໍປັບໄໝເດ້.”
ຜແນກອຸດສາຫະກັມ ແລະ ການຄ້າ ນະຄອນຫຼວງວຽງຈັນ ໄດ້ອອກແຈ້ງການ ຫ້າມຂາຍເກີນລາຄາ ໃນວັນທີ 18 ທັນວາ 2019 ແລະ ໄດ້ບັນຍັດ ບົດລົງໂທສ ຕໍ່ຜູ້ທີ່ຂາຍ ສິນຄ້າ ເກີນລາຄາ ທີ່ທາງການ ກຳນົດເອົາໄວ້.
ນອກຈາກນີ້, ເຈົ້າໜ້າທີ່ ກົມລ້ຽງສັດ ແລະ ການປະມົງ ກໍຍັງສັ່ງຫ້າມ ນຳເຂົ້າຊີ້ນໝູ ຈາກປະເທດຈີນ, ວຽດນາມ ແລະ ກຳພູຊາ ເຂົ້າມາຂາຍ ຢູ່ປະເທດລາວ.