KIO ထိန်းချုပ်နယ်မြေထဲ ကျောင်းပြောင်းတက်သူတွေများလာ

ကချင်လွတ်မြောက်ရေးအဖွဲ့ (KIO) ဌာနချုပ် လိုင်ဇာမြို့အနီးက အလျဲန်ဘွမ်အထက်တန်းကျောင်းမှာ စစ်အာဏာသိမ်းပြီးနောက် မြို့ပေါ်က ကျောင်းသားတွေပါ လာရောက်ပညာသင်နေကြပါတယ်။

အခုစာသင်နှစ်မှာ အရင်ကျောင်းသား အရေအတွက်ထက် သုံးဆလောက် ပိုများလာတယ်လို့ လက်ထောက်ကျောင်းအုပ်ဆရာမ ဆိုင်းခေါန်ကပြောပါတယ်။

အရင်နှစ်တွေက ကျောင်းသား ၇ဝဝ လောက် အများဆုံး ရှိခဲ့ပေမဲ့ စစ်အာဏာသိမ်းပြီး ၂ဝ၂၁-၂ဝ၂၂ ပညာသင်နှစ်မှာ ကျောင်းသား ၂၄ဝဝ လောက်ရှိတယ်လို့ ဆိုပါတယ်။

ကျောင်းသားဦးရေ ၁၇၀၀ လောက်ဟာ မြို့ပေါ်က အစိုးရကျောင်းတွေကနေ ပြောင်းလာတဲ့ ကျောင်းသားတွေ ဖြစ်တယ်လို့ ပြောပါတယ်။

စစ်ကောင်စီရဲ့ ပညာရေးကို အယုံအကြည်မရှိတာ၊ လက်ရှိ နိုင်ငံရေးအခြေအနေတွေကြောင့် အစိုးရ ကျောင်းသွားမတက်ရဲတာ၊ မြို့ပေါ်က ကျောင်းတွေ ပုံမှန်ပြန်မဖွင့်နိုင်သေးတာရယ်ကြောင့် KIO ထိန်းချုပ်နယ်မြေထဲ ကျောင်းလာတက်ကြတာလို့ ဆိုပါတယ်။

KIO ဌာနချုပ် လိုင်ဇာမြို့အနီးက အလျဲန်ဘွမ်အထက်တန်းကျောင်းဟာ စစ်ဘေးဒုက္ခသည် ကျောင်းသူ ကျောင်းသားတွေအတွက် အဓိက ရည်ရွယ်ပြီး ၂ဝ၁၃ ခုနှစ်မှာ ဖွင့်လှစ်ထားတာ ဖြစ်ပါတယ်။