တော်ဝင်သစ်ချောထည်စက်ရုံက အလုပ်သမားနှစ်ဦး ကျန်းမာရေးအခြေအနေ စိုးရိမ်နေရဆဲ

အင်းစိန်ဆေးရုံမှာ ဆေးကုသခံနေရတဲ့  ဒဏ်ရာရအလုပ်သမားတွေရဲ့ အခြေအနေတွေနဲ့ ပတ်သက်ပြီး  သူတို့ကို ကူညီပေးနေတဲ့ Action Labor Rights အဖွဲ့က ကိုကျော်မင်းက RFA ကိုအခုလိုပြောပါတယ်။

" တော်ဝင်ကအလုပ်သမားတွေအခြေအနေက နှစ်ယောက်ပဲစိုးရိမ်ရတဲ့အနေအထားမှာရှိပါတယ်၊ ကျန်တဲ့ လေးယောက်ကတော့ စိုးရိမ်စရာမရှိပါဘူး။"

မနေ့က အလုပ်ဝင်ဖို့လာတဲ့  အလုပ်သမားတွေကို စာချုပ်မှာ လက်မှတ်ထိုးခိုင်းတဲ့အတွက် အလုပ်သမားတွေက စက်ရုံ ဒါရိုက်တာနဲ့ တွေ့ဆုံစကားပြောဖို့ ကြိုးစားခဲ့ကြရာ ဒါရိုက်တာက အတွေ့မခံခဲ့ဘဲ   အလုပ်ရှင်ဘက်က ဝန်ထမ်းတွေနဲ့ ရုန်းရင်းဆန်ခတ်ဖြစ်ပွားခဲ့ကြတာလို့ ဆိုပါတယ်။

နေ့လည်ပိုင်းမှာ အလုပ်သမားရုံးက တာဝန်ရှိသူတွေရောက်လာပြီး လုပ်ငန်းရှင်နဲ့ ညှိနှိုင်းပြီး အလုပ်သမားတွေကို လုပ်ငန်းခွင်ပြန်ဝင်ဖို့ ပြောခဲ့တယ်လို့ ဆိုပါတယ်။

ဒီအခြေအနေတွေနဲ့ ပတ်သက်ပြီး အလုပ်ရှင်ဖက်ကတော့ အလုပ်သမားတွေဟာ ထမင်းစား အားလပ်ချိန်မှာ စက်ရုံဝင်းအတွင်း ခွင့်ပြုချက်မရပဲ အတင်းဝင်လာပြီး ပစ္စည်းတွေကို ဖျက်ဆီးသွားတယ်လို့ ပြောပါတယ်။

ဒီကနေ့ဟာ ခရစ္စမတ်နေ့ဖြစ်တဲ့အတွက် အလုပ်ပိတ်ထားကြောင်းနဲ့ ဆေးရုံက အလုပ်သမားတွေ အရေးကို ၈၈ မျိုးဆက်ကျောင်းသားများအဖွဲ့နဲ့ Action Labor Rights အဖွဲ့က ကူညီပေးနေကြောင်းလည်း သိရပါတယ်။