ဦးရွှေမန်းကော်မရှင် သက်တမ်းတိုးရေး မဲခွဲရာမှာ ကန့်ကွက်မဲများလို့ ရှုံးနိမ့်

သူရဦးရွှေမန်း ဥက္ကဋ္ဌအဖြစ်ဆောင်ရွက်တဲ့ ပြည်ထောင်စုလွှတ်တော် ဥပဒေရေးရာနဲ့ အထူးကိစ္စရပ်များ လေ့လာ ဆန်းစစ်သုံးသပ်ရေးကော်မရှင်ကို မတ်လ ၁ ရက်နေ့ကစပြီး ရုပ်သိမ်းကြောင်း ပြည်ထောင်စုလွှတ်တော်နာယက ဦးတီခွန်မြတ်က ဒီနေ့ ရက်စွဲနဲ့ ထုတ်ပြန်လိုက်ပါတယ်။

တနှစ်တစ်ကြိမ် ထပ်မံသက်တမ်းတိုးဖို့ ဒီနေ့ ပြည်ထောင်စုလွှတ်တော်ရဲ့ သဘောထားရယူရာမှာ ကန့်ကွက်မဲ ၅၅၅ မဲ၊ ထောက်ခံမဲ ၂၀ မဲသာရရှိခဲ့တဲ့အတွက် အခုလို ရုပ်သိမ်းစာထုတ်ပြန်လိုက်တာဖြစ်ပါတယ်။

အဲဒီ ကော်မရှင်ကို အစဉ်တစိုက်ကန့်ကွက်ခဲ့တဲ့ တပ်မတော်သားကိုယ်စားလှယ်တွေတင်မဟုတ်ဘဲ အမျိုးသား ဒီမိုကရေစီအဖွဲ့ချုပ် NLD ပါတီ ကိုယ်စားလှယ်တွေကပါ ဒီနေ့ ကန့်ကွက်မဲပေးခဲ့တာပါ။

လာမယ့် မတ်လ ၁ ရက်နေ့ကစပြီး အဲဒီကော်မရှင်ဖွဲ့စည်းမှုကို ရုပ်သိမ်းလိုက်ကြောင်း ပြည်ထောင်စုလွှတ်တော် နာယက ဦးတီခွန်မြတ်လက်မှတ်နဲ့ ဒီနေ့ ထုတ်ပြန်တဲ့ အမိန့်ကြေညာစာမှာ ပါရှိပါတယ်။

ဒေါ်အောင်ဆန်းစုကြည်နဲ့ နီးကပ်တဲ့ ဆက်ဆံရေးရှိတဲ့ သူရဦးရွှေမန်းနဲ့ ကော်မရှင်အဖွဲ့ဝင်တချို့ဟာ ပြည်ထောင် စုကောင်းကျိုးဆောင်ပါတီ ဆိုတဲ့ အမည်နဲ့ နိုင်ငံရေးပါတီ တည်ထောင်ဖို့ ဒီလ ၅ ရက်နေ့က ရွေးကောက်ပွဲကော်မရှင် မှာ လျှောက်ထားခဲ့ပါတယ်။

၂၀၁၅ ခုနှစ်၊ သြဂုတ်လမှာ ကြံ့ခိုင်ရေး ပါတီဥက္ကဋ္ဌအဖြစ်ကနေ ဖယ်ရှားခံရတဲ့အပြင် ၂၀၁၅ အထွေထွေ ရွေးကောက်ပွဲမှာပါ ရှုံးနိမ့်ခဲ့တဲ့ သူရဦးရွှေမန်းကို လွှတ်တော်က ကော်မရှင်ဖွဲ့စည်းပြီး ဥက္ကဋ္ဌအဖြစ် ဆောင်ရွက်ဖို့ တာဝန်ပေးခဲ့တာလည်းဖြစ်ပါတယ်။

RFA သတင်းထောက် ကိုဝင်းကိုကိုလတ် ပေးပို့တာပါ။