တအာင်းပလောင်အမျိုးသား ပါတီခေါင်းဆောင်နှစ်ဦးကို RCSS/SSA တပ်က ဖမ်းဆီး

ရှမ်းပြည်နယ် မိုင်းကိုင်မြို့နယ် တအာင်းပလောင်အမျိုးသားပါတီဥက္ကဌ မိုင်အောင်ခမ်းနဲ့ အတွင်းရေးမှူးတို့ကို ရှမ်းပြည်တောင်ပိုင်းတပ်မတော် RCSS/SSA အမှတ် ၁၃၇ တပ်ရင်းက ပြီးခဲ့တဲ့ဇွန်လ ၂၀ရက်နေ့က ဖမ်းဆီးခေါ်ဆောင်သွားတယ်လို့ ပါတီတာဝန် ရှိသူတွေက ပြောပါတယ်။

မိုင်းကိုင်မြို့နယ်မှာ ပါတီရုံးဆိုင်းဘုတ်သွားတင်တာကို မကျေနပ်လို့ ခေါ်သွားတာ ဖြစ်ကြောင်း တအာင်းပလောင် အမျိုးသားပါတီ အထွေထွေအတွင်းရေးမှူး ကိုမိုင်းဝင်းထူး က ပြောပါတယ်။

"၂၀ ရက်နေ့ မနက် ၈ နာရီခွဲလောက်က ခေါ်သွားတာဖြစ်ပါတယ်၊ ခေါ်သွားပြီးမှ နောက်ဆုံးရထားတဲ့ အချက် အလက်ကတော့ မိုင်းကိုင်မြို့မှာ ပါတီဆိုင်းဘုတ်ထောင် တာကို မလိုလားဘူးပေါ့၊ ပြောမယ်ဆိုရင်တော့ မိုင်းကိုင်မြို့တောင်ပေါ်ဒေသမှာ သွားပြီးတော့မှ ဖြစ်တဲ့အခြေအနေတွေကို ဒေသခံတွေ၊ ဘုန်းကြီးတွေကို မှတ်တမ်းတင် သွားရိုက်တာကိုလည်း သူတို့သဘောမကျဘူး"

သူတို့နှစ်ဦး ဖမ်းဆီးခံရတာကို ပါတီတာဝန်ရှိသူတွေက ရှမ်းပြည်နယ်ဝန်ကြီးချုပ်နဲ့ တောင်ကြီးမြို့မှာရှိတဲ့ RCSS/SSA ရုံးထံ အကြောင်းကြားထားတယ်လို့ သိရပါတယ်။

မိုင်းကိုင်မြို့နယ်အနီးမှာ အခြေစိုက်တဲ့ အမှတ် ၃၃၇ တပ်ရင်းက ဒုတပ်ရင်းမှူး စစ်ဂျာန်ဟန် ဦးဆောင်တဲ့အဖွဲ့ က ခေါ်ဆောင်သွားတာဖြစ်တယ်လို့ သတင်းတွေ ထွက်နေပေမယ့် တောင်ကြီးမြို့မှာရှိတဲ့ RCSS/SSA ဆက်ဆံရေး ရုံး တာဝန်ရှိသူတစ်ဦးက ငြင်းဆိုထားပါတယ်။