PR ဆန့်ကျင်ရေး လက်မှတ်ရေးထိုးလှုပ်ရှားမှုစတင်

PR ခေါ် အချိုးကျကိုယ်စားပြု ရွေးကောက်ပွဲစနစ်ကို ကန့်ကွက်တဲ့ လက်မှတ်တွေကို မြို့နယ် အသီးသီးမှာ ဒီနေ့ကစပြီး ၁၅ရက်ကြာ ကောက်ခံသွားမှာဖြစ်တယ်လို့ ဒီနေ့ သင်္ဃန်းကျွန်းမြို့နယ် "စိတ်တိုင်းကျ"ခန်းမက PR စနစ်ဟောပြောပွဲနဲ့ လက်မှတ်ကောက်ခံပွဲမှာ ပြည်သူ့ လှုပ်ရှားမှု မြှင့်တင်ရေးကွန်ရက် တာဝန်ရှိသူတွေ က ပြောပါတယ်။

မြို့နယ်အသီးသီးက တက်ကြွလှုပ်ရှားသူတွေကို အကူအညီတောင်းပြီး ကောက်ယူသွားမှာ ဖြစ်တယ် လို့ ပြည်သူ့လှုပ်ရှားမှု မြှင့်တင်ရေးကွန်ရက်က ကိုမြတ်ကျော်က  ပြောပါတယ်။

"ပီအာကို ကန့်ကွက်လက်မှတ်တွေ ရယူမယ်ဆိုတာဟာ မြို့နယ်အသီးသီးမှာ တက်ကြွလှုပ်ရှားသူတွေကို ကျနော်တို့ အကူအညီတောင်းခံပါမယ်၊ ပူးပေါင်းပါလို့ ဖိတ်ခေါ်ပါမယ်၊ တာဝန်သိစွာ ကောက်ခံလိမ့်မယ်လို့ မျှော်လင့်ပါတယ်၊ တစ်ယောက်လက်မှတ်ထိုးလည်း ပြည်သူ့ဆန္ဒပါ၊ နှစ်ယောက်လက်မှတ်ထိုးလည်း ပြည်သူ့ဆန္ဒပါ"

ပြည်သူ့လှုပ်ရှားမှုမြှင့်တင်ရေးကွန်ရက်အဖွဲ့ဝင်တွေနဲ့ နိုင်ငံရေးတက်ကြွလှုပ်ရှားသူတွေက စိတ်တိုင်း ကျခန်းမမှာ ဒီနေ့ လက်မှတ်ရေးထိုးခဲ့ကြပြီး ၁၅ရက်ကြာ ကောက်ယူရရှိတဲ့လက်မှတ်တွေကို လွှတ်တော်၊ အမျိုးသားဒီမိုကရေစီအဖွဲ့ချုပ် နဲ့ တိုင်းရင်းသားနိုင်ငံရေးပါတီတွေထံ ပေးပို့မှာဖြစ်ပါတယ်။

ပြီးခဲ့တဲ့လွှတ်တော်အစည်းအဝေးမှာ PR ခေါ် အချိုးကျကိုယ်စားပြုရွေးကောက်ပွဲစနစ်ကို အမျိုးသား ဒီမိုကရေစီအဖွဲ့ချုပ်နဲ့ တိုင်းရင်းသားနိုင်ငံရေးပါတီတွေက ကန့်ကွက်ခဲ့ကြပေမဲ့ အမျိုးသားလွှတ်တော်က အတည်ပြုခဲ့ပါတယ်။

ပြည်သူ့လွှတ်တော်မှာ မြန်မာနိုင်ငံနဲ့ ကိုက်ညီမယ့် ရွေးကောက်ပွဲစနစ် အကောင်အထည်ဖေါ်ရေး ကော်မရှင်ကို ဖွဲ့စည်းခဲ့ပါတယ်။