ဝန်ကြီးဌာနများ ယူနီကုဒ် ဖောင့် အသုံးပြုရန် ဆုံးဖြတ်

မြန်မာနိုင်ငံ ကွန်ပြူတာ သုံးစွဲသူ အများစုအတွက် ယူနီကုဒ်နဲ့ ဇော်ဂျီ ဖောင့်နှစ်မျိုးရှိရာမှာ အစိုးရဝန်ကြီးဌာနတွေ အနေနဲ့ ယူနီကုဒ်ကိုသာ အသုံးပြုဖို့ ပညာရေးဝန်ကြီးဌာနက ဆုံးဖြတ်လိုက်ပါတယ်။

အရင်က စံသတ်မှတ်ချက်မရှိခဲ့ပေမယ့် အခု အစိုးရလုပ်ငန်းတွေအတွက် စံသတ်မှတ်လိုက်တာဖြစ်တယ်လို့ ပညာရေးဝန်ကြီးဌာန အမြဲတမ်းအတွင်းဝန် ဦးကျော်စွာစိုး က ပြောပါတယ်။

"ကျနော်တို့ ကွန်ပျူတာပေါ်မှာ မြန်မာစာ စာလုံးတွေ အသုံးပြုတဲ့အခါကျတော့ အရင်တုန်းကတော့ မြန်မာစာ စာလုံးတွေက စနစ်တစ်ခု မရှိတော့တဲ့အခါကျတော့ ကျနော်ပို့လိုက်တဲ့ စာတစ်စောင်က ဒီ့ပြင်လူဆီကို ရောက် သွားရင် စံတစ်ခုနဲ့ ဖွင့်လိုက်လို့ရှိရင် ဖတ်လို့မရတာတွေ ဖြစ်ကုန်တာပေါ့နော်၊ အဲ့ဒီဟာကို ကျော်လွှားနိုင်ဖို့ အတွက် စံသတ်မှတ်လိုက်တဲ့သဘောပါ"

တချို့ဝန်ကြီးဌာနတွေမှာ အရင်ကတည်းက ယူနီကုဒ်ကို သုံးစွဲနေပြီဖြစ်ပေမယ့် မသုံးကြသေးတဲ့ ဌာနတွေရှိနေ တယ်လို့လည်း ပြောပါတယ်။

ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာမျိုးသိမ်းကြီးနဲ့ ကွန်ပျူတာဖွံ့ဖြိုးရေး ကောင်စီအဖွဲ့ဝင်တွေဟာ ယူနီကုဒ်ကို တစ်နိုင်ငံလုံးအတိုင်းအတာနဲ့ အသုံးပြုနိုင်ရေးကို မနေ့က ဆွေးနွေးခဲ့ကြတာဖြစ်ပါတယ်။

ပြည်တွင်းမှာ တယ်လီဖုန်းနဲ့ ကွန်ပျူတာ အသုံးပြုသူတွေဟာ ယူနီကုဒ်ကို အသုံးပြုတာနည်းပြီး ဇော်ဂျီကိုသာ သုံးစွဲကြတာဖြစ်ပါတယ်။ မြန်မာ့ဆက်သွယ်ရေး၊ အူရီဒူး၊ တယ်လီနော စတဲ့ ဆက်သွယ်ရေးလုပ်ငန်းတွေကိုလည်း သုံးစွဲသူတွေထံ စာပေးပို့တဲ့အခါ ဇော်ဂျီဖောင့်နဲ့ ယူနီကုတ်ကို ရောပြီး ပေးပို့ဖို့လည်း တောင်းဆိုထားပါတယ်။