ညစ်ညမ်းစာပေ စွပ်စွဲချက်နဲ့ စာအုပ်သုံးအုပ်ကို စစ်ကောင်စီ ပိတ်သိမ်း

• RFA Burmese
  2025-01-16

လိင်တူ ချစ်သူတွေအကြောင်း ရေးဖွဲ့ထားတဲ့ စာအုပ်သုံးအုပ်ကို ညစ်ညမ်းစာတွေ ပါဝင်တယ်ဆိုတဲ့ စွပ်စွဲချက်နဲ့ တရားမဝင် ထုတ်ဝေစာအဖြစ် သတ်မှတ်ပြီး ထုတ်ဝေသူတွေကိုလည်း အရေးယူထားကြောင်း စစ်ကောင်စီ ပြန်ကြားရေးဝန်ကြီးဌာနက ဇန်နဝါရီ ၁၅ ရက်နေ့မှာ ထုတ်ပြန်ပါတယ်။

ပိတ်သိမ်းခံရတဲ့ စာအုပ်တွေက စာရေးသူ ပိုးစုန်းကျူးရဲ့ “သခင်ကြင်လျှင် ပန်တော်မူ”၊ Suri Park ရဲ့ “အို … ဤ အချစ်များရယ် ဘာကြောင့်ဆုံဖို့ ခက်ရတယ်” နဲ့ Mirella-ve ရဲ့ “ရင်ခွင်ညှာရယ် ချစ်လွန်းပို၏” တို့ ဖြစ်ပါတယ်။

အဲဒီစာအုပ်တွေကို ထုတ်ဝေတဲ့ ပုံနှိပ်တိုက်နဲ့ ထုတ်ဝေသူတွေကိုလည်း ဇန်နဝါရီလထဲမှာပဲ လုပ်ငန်းလိုင်စင် ပိတ်သိမ်းတာနဲ့ ဥပဒေအရ အရေးယူတာတွေ လုပ်ဆောင်နေတယ်လို့ ဆိုပါတယ်။

၂၀၂၄ ခုနှစ် နိုဝင်ဘာနဲ့ ဒီဇင်ဘာအတွင်းမှာလည်း လိင်တူချစ်သူတွေအကြောင်း ရေးဖွဲ့ထားတဲ့စာအုပ် ခုနစ်အုပ်ကို စစ်ကောင်စီက ပိတ်သိမ်းအရေးယူခဲ့တာကြောင့် သုံးလအတွင်း ပိတ်သိမ်းခံရတဲ့ စာအုပ် ဆယ်အုပ်အထိ ရှိလာတာပါ။

အာဏာသိမ်းကာလအတွင်း လွတ်လပ်စွာ ထုတ်ဖော်ရေးသားခွင့် ချိုးဖောက်ခံရမှု အဆိုးရွားဆုံးအခြေအနေနဲ့ ရင်ဆိုင်နေရပြီး စာပေတိုက်တွေကိုလည်း အကြောင်းအမျိုးမျိုးပြ၊ ပိတ်သိမ်းခံနေရတယ်လို့ လုံခြုံရေးအရ အမည်မဖော်လိုတဲ့ စာအုပ်ထုတ်ဝေသူတစ်ဦးက RFA ကို ပြောပါတယ်။

“သူတို့ပိတ်ချင်ရင် နိုင်ငံရေး၊ ဘာသာရေး၊ လူမျိုးရေး၊ ညစ်ညမ်း၊ အဲဒီလို အကြောင်းအမျိုးမျိုးပြပြီးတော့ကို ပိတ်နေတာ”

စစ်တပ်အာဏာသိမ်းပြီးနောက်ပိုင်း စာပေမီဒီယာတိုက်တွေကို အကြောင်းအမျိုးမျိုးနဲ့ ပိတ်သိမ်းနေတာ အရေအတွက် သုံးဆယ်ထက်မနည်း ရှိနေပြီလို့ စာပေထုတ်ဝေသူတွေနဲ့ ဖြန့်ချိသူတွေက ပြောပါတယ်။