မြန်မာစစ်တပ်ကိုပံ့ပိုးနေတဲ့ တရုတ်လေယာဉ်ကုမ္ပဏီကို ဖိအားပေးရေး Burma Campaign UK တောင်းဆို

• RFA Burmese
  2025-01-27

တရုတ်နိုင်ငံပိုင် လေယာဉ်ကုမ္ပဏီ AVIC အနေနဲ့ မြန်မာစစ်တပ်ကို လက်နက်တပ်ဆင်ပေးနေတာ ရပ်မလား၊ ဒါမှမဟုတ် စီးပွားရေးလက်တွဲလုပ်နေတာ ဖြုတ်မလားဆိုတဲ့အကြောင်း သူ့မိတ်ဖက်ဖြစ်တဲ့ ပြင်သစ်အခြေစိုက် Airbus ကုမ္ပဏီရဲ့ အမှုဆောင်အရာရှိချုပ်ကို စာရေးသားဖိအားပေးဖို့ ဗြိတိန်အခြေစိုက် မြန်မာ့အရေး လှုပ်ရှားမှုအဖွဲ့ (Burma Campaign UK) က ဒီမိုကရေစီအင်အားစုတွေကို ဒီနေ့ တိုက်တွန်းလိုက်ပါတယ်။

တရုတ် AVIC ကုမ္ပဏီဟာ ပြီးခဲ့နှစ်အတွင်းမှာပဲ မြန်မာစစ်တပ်ကို လေယာဉ်အသစ် ရှစ်စင်း ရောင်းချပေးခဲ့တယ်လို့ ဆိုပါတယ်။

ဒီလေယာဉ်တွေကို အရပ်သားတွေ သတ်ဖြတ်ရာမှာ အသုံးပြုမယ်ဆိုတာသိသိနဲ့ ရောင်းလိုက်တာဖြစ်ပြီး အရပ်သားတွေကို ရည်ရွယ်ချက်ရှိရှိ ပစ်မှတ်ထားတိုက်ခိုက်တာဟာ နိုင်ငံတကာဥပဒေကို ချိုးဖောက်တာ ဖြစ်တယ်လို့ Burma Campaign UK က ဖော်ပြပါတယ်။

လေကြောင်းအင်အားဟာ မြန်မာစစ်တပ် လွတ်မြောက်ဖို့အတွက် အဓိကဖြစ်နေပြီး အာဏာသိမ်းပြီးကတည်းက အရပ်သားတွေအပေါ်ဗုံးကြဲတိုက်ခိုက်ခဲ့တာကြောင့် လူ လေးသန်းနီးပါး နေရပ်စွန့်ခွာ ထွက်ပြေးခဲ့ရတယ်လို့လည်း ဆိုပါတယ်။

Airbus ကုမ္ပဏီဟာ တရုတ်ရဲ့ AVIC အတွက် အဓိက နိုင်ငံတကာမိတ်ဖက်ကုမ္ပဏီ ဖြစ်ပါတယ်။

ဒါကြောင့် AVIC က မြန်မာစစ်တပ်ကို စစ်လက်နက်မရောင်းချအောင် တိုက်တွန်းဖို့ Airbus အမှုဆောင်အရာရှိချုပ်အနေနဲ့ သူ့ဩဇာကို အသုံးပြုနိုင်တယ်လို့ Burma Campaign UK ရဲ့ ညွှန်ကြားရေးမှူး Mark Farmaner က ပြောပါတယ်။

လူ့အသက်တွေကို ကယ်တင်မလား ဒါမှမဟုတ် နိုင်ငံတကာဥပဒေတွေ ချိုးဖောက်မှုမှာ ပတ်သက်နေတဲ့ ကုမ္ပဏီနဲ့ စီးပွားရေးမိတ်ဖက်အဖြစ် ဆက်ပြီး လက်တွဲမလားဆိုတာ Airbus အမှုဆောင်အရာရှိချုပ် Guillaume Faury မှာ ရွေးချယ်ခွင့်ရှိနေတယ်လို့လည်း ပြောလိုက်ပါတယ်။