ငလျင်ကြောင့် ဒေသသုံးခုမှာ ၁၄၄ ဦးသေဆုံးပြီး ၇၀၀ ကျော်ဒဏ်ရာရကြောင်း စစ်ကောင်စီဥက္ကဋ္ဌပြော

• RFA Burmese
  2025-03-28

မြေငလျင်ကြောင့် နေပြည်တော်ကောင်စီနယ်မြေမှာ ၉၆ ဦး၊ စစ်ကိုင်းမြို့မှာ ၁၈ဦး၊ ကျောက်ဆည်မှာ ၃၀ ဦး သေဆုံးခဲ့တယ်လို့ စစ်ကောင်စီဥက္ကဋ္ဌက မတ်လ ၂၈ ရက်ညမှာ နိုင်ငံပိုင်မီဒီယာကတစ်ဆင့် ပြောပါတယ်။

ဒီအပြင် နေပြည်တော်မှာ ဒဏ်ရာရသူ ၄၃၂ ဦး၊ စစ်ကိုင်းမှာ ၃၀၀ ဦးဒဏ်ရာရခဲ့တယ်လို့ ဆိုပါတယ်။

“သေဆုံးမှုနဲ့ ဒဏ်ရာရမှုက ဒီထက်တိုးလာစရာရှိပါတယ်။ တချို့နေရာတွေမှာလည်း တိုက်တွေ ပြိုကျတဲ့အတွက် ကယ်ဆယ်ရေးလုပ်ငန်းတွေ ကျွန်တော်တို့လုပ်နေဆဲဖြစ်ပါတယ်”

ပြည်ပအကူအညီတွေရဖို့လည်း လမ်းဖွင့်ထားပြီး လက်ရှိမှာ အိန္ဒိယ နဲ့ အာဆီယံလူသားချင်းစာနာမှုဆိုင်ရာ အကူအညီပေးရေး စင်တာ (AHA Centre) တို့က အကူအညီတွေပေးဖို့ ကမ်းလှမ်းလာတယ်လို့ စစ်ကောင်စီဥက္ကဋ္ဌက ပြောပါတယ်။

မန္တလေးမြို့ အရှေ့မြောက်ဘက် ၁၂ မိုင်အကွာကို ဗဟိုပြုပြီး မတ်လ ၂၈ ရက်က ပြင်းအား ၇ဒသမ၇ ရှိတဲ့ မြေငလျင်လှုပ်ခတ်ခဲ့ပါတယ်။

ငလျင်ကြောင့် ထိခိုက်ပျက်စီးမှုများတဲ့ မန္တလေးတိုင်း၊ စစ်ကိုင်းတိုင်း၊ မကွေးတိုင်း၊ ပဲခူးတိုင်း၊ ရှမ်းပြည်နယ် အရှေ့မြောက်ပိုင်းနဲ့ နေပြည်တော်ကောင်စီနယ်မြေတွေကို စစ်ကောင်စီရဲ့ အမျိုးသားသဘာ၀ဘေးအန္တရာယ်ဆိုင်ရာ စီမံခန့်ခွဲမှုကော်မတီက အရေးပေါ်အခြေအနေ ကြေညာခဲ့ပါတယ်။