ကမ္ဘာ့အပူဆုံးမြို့တွေထဲ ချောက်နဲ့ မကွေးမြို့ ပါဝင်လာ

• RFA Burmese
  2025-03-17

မကွေးတိုင်း ချောက်မြို့နဲ့ မကွေးမြို့တို့ဟာ ကမ္ဘာ့အပူဆုံး ၁၅ မြို့စာရင်းထဲမှာ ပါဝင်လာကြောင်း ကမ္ဘာ့အပူချိန်နဲ့ မိုးရေချိန်တွေကို အချိန်နဲ့အလိုက် ထုတ်ပြန်နေတဲ့ အယ်ဒိုရာဒို (eldorado) ၀ဘ်ဆိုက်စာမျက်နှာက မတ်လ ၁၇ ရက်နေ့ မနက်ပိုင်းမှာ ဖော်ပြပါတယ်။

ချောက်မြို့ရဲ့ အမြင့်ဆုံးအပူချိန်ဟာ ၄၄ ဒသမ ၃ ဒီဂရီ ဆဲလ်စီးယပ် (၁၁၁ ဒသမ ၂ ဒီဂရီဖာရင်ဟိုက်) အထိရှိနေပြီး ကမ္ဘာ့အပူချိန်အမြင့်ဆုံး မြို့တွေထဲ ဒုတိယနေရာမှာ ရှိနေပါတယ်။

မကွေးမြို့ကလည်း အမြင့်ဆုံးအပူချိန် ၄၃ ဒသမ ၂ ဒီဂရီ ဆဲလ်စီးယပ် (၁၀၉ ဒသမ ၇၆ ဒီဂရီဖာရင်ဟိုက်) အထိရှိ နေပြီး အဆင့် ၁၃ မှာ ရှိနေပါတယ်။

စစ်ကောင်စီ မိုးလေဝသနဲ့ ဇလဗေဒညွှန်ကြားမှု ဦးစီးဌာနရဲ့ မတ်လလယ် (မတ်လ ဒုတိယ ၁၀ ရက်) အတွက် ခန့်မှန်းချက်အရ မကွေးတိုင်းအပါအဝင် တိုင်းနဲ့ပြည်နယ် ရှစ်ခုထက်မနည်းမှာ မတ်လရဲ့ ပျမ်းမျှအပူချိန်ထက် ၁ ဒသမ ၅ ဒီဂရီ ဆဲလ်စီးယပ် (၃၄ ဒသမ ၇ ဒီဂရီဖာရင်ဟိုက်) အထက် ပိုနိုင်တယ်လို့ ထုတ်ပြန်ထားပါတယ်။

၂၀၂၄ ခုနှစ် နွေရာသီကတုန်းကလည်း အားအနည်းငယ် ပြင်းထန်တဲ့ အယ်လ်နီညို အပူလှိုင်းကြောင့် မြန်မာနိုင်ငံအလယ်ပိုင်းက ပူပြင်းခြောက်သွေ့တဲ့ ချောက်မြို့နယ်အပါအဝင် မကွေးတိုင်းနဲ့ မန္တလေးတိုင်းတို့မှာ လူသေဆုံးထိခိုက်မှုတွေ ရှိခဲ့ပါတယ်။