NUG နဲ့ တရားဝင်ဆက်ဆံဖို့ အာဆီယံကို မလေးရှားဝန်ကြီးဟောင်း တိုက်တွန်း

မြန်မာပြည်အရေး ဆောင်ရွက်မှုတွေမှာ ထင်ရှားလူသိများတဲ့ မလေးရှားနိုင်ငံခြားရေးဝန်ကြီးဟောင်း ဆိုင်ဖူဒင် အဗ္ဗဒူလာ Saifuddin Abdullah က စစ်ကောင်စီကို လက်မခံကြောင်းပြသတဲ့အနေနဲ့ တိတ်ဆိတ်ငြိမ်သက်ခြင်းသပိတ် ပါဝင်ဆင်နွှဲခဲ့တဲ့ မြန်မာပြည်သူတွေကို ချီးမွှမ်းလိုက်ပါတယ်။ ဒါ့ပြင် အာဆီယံအနေနဲ့ NUG အစိုးရကို တရားဝင်ဆက်ဆံဖို့ အချိန်တန်ပြီလို့လည်း ပြောလိုက်ပါတယ်။ မလေးရှား နိုင်ငံခြားရေးဝန်ကြီးဟောင်း ဆိုင်ဖူဒင် အဗ္ဗဒူလာကို RFA အဖွဲ့သား ဦးခင်မောင်စိုးက မလေးရှားနိုင်ငံ ကွာလာလမ်ပူမြို့မှာ ဖေဖော်ဝါရီလ ၇ ရက်နေ့က တွေ့ဆုံမေးမြန်းထားပါတယ်။

မေး။ ။ မြန်မာပြည်ရဲ့ လက်ရှိအခြေအနေကို ဘယ်လိုမြင်ပါသလဲ။

ဖြေ။ ။ စစ်တပ်အာဏာသိမ်းပြီး နှစ်နှစ်အကြာမှာ မြန်မာပြည်ရဲ့အခြေအနေတွေက တစ်နေ့တစ်ခြားပိုပြီး ဆိုးဝါးလာနေပါတယ်။ တိုက်ခိုက်မှု ၁၈,ဝဝဝ ကျော်ဖြစ်ပွားခဲ့ပြီး နေရပ်စွန့်ခွာထွက်ပြေးနေရတဲ့ ပြည်သူ ၁၂ သိန်းလောက် ရှိနေပြီဖြစ်သလို အသတ်ခံရသူနဲ့ ဖမ်းဆီးခံရတဲ့ လူဦးရေကလည်း ထောင်ပေါင်းများစွာရှိနေပါပြီ။ မြန်မာသမ္မတ ဦးဝင်းမြင့်နဲ့ ဒေါ်အောင်ဆန်းစုကြည်တို့ကိုလည်း နှစ်ရှည်ထောင်ဒဏ်တွေ ချမှတ်ထားပါတယ်။ သူတို့ကို ဒီလိုတရားမျှတမှုကင်းမဲ့တဲ့ စီရင်ချက်တွေ ချမှတ်ခဲ့တာကတော့ စစ်တပ်သြဇာခံ တရားရုံးဖြစ်ပါတယ်။

အခြေအနေတွေ အခုလို ဆိုးဝါးလာနေချိန်မှာ မြန်မာလူထုကိုတော့ ကျွန်တော်အလေးပြုရမှာဖြစ်ပါတယ်။ ဘာဖြစ်လို့လဲဆိုတော့ သူတို့ဟာ လွန်ခဲ့တဲ့ နှစ်နှစ်အာဏာသိမ်းချိန်ကနေ အခုထိ စစ်တပ်ကို အရှုံးမပေးဘဲ အစဉ်တစိုက် ဆန့်ကျင်တွန်းလှန်နေကြလို့ပါပဲ။ တကယ်တော့ အာဏာမသိမ်းမီ နှစ်ပေါင်းများစွာကတည်းက မြန်မာလူထုရဲ့ လှုပ်ရှားရုန်းကန်မှုတွေ ရှိခဲ့တာကိုလည်း ကျွန်တော်သိပါတယ်။ အခုလက်ရှိမှာ အမျိုးသားညီညွတ်ရေးအစိုးရနဲ့ အမျိုးသားညီညွတ်ရေး အတိုင်ပင်ခံကောင်စီတို့ရဲ့ ယုံကြည်မှုတည်ဆောက်ရေးလုပ်ငန်းစဉ်တွေ အင်မတန် အကျိုးဖြစ်ထွန်းနေတာ မြင်ရပါတယ်။ သူတို့ရဲ့ မရပ်မနားကြိုးပမ်းမှုတွေကြောင့် သက်ဆိုင်တဲ့အဖွဲ့အစည်းတွေအကြား ဆွေးနွေးပြောဆိုမှုတွေကလည်း အရင်ကထက် တိုးတက်လာနေပါတယ်။ PDF ပြည်သူ့ကာကွယ်ရေးတပ်ဖွဲ့တွေအပါအဝင် လက်နက်ကိုင်တော်လှန်ရေးအင်အားစုတွေနဲ့ ပြည်ပရောက်မြန်မာတွေအကြား မပြတ်ဆက်သွယ်ပြီး ကူညီထောက်ပံ့နေကြတာကလည်း ဒီနှစ်နှစ်အတွင်း ပိုမိုတိုးတက်လာနေတာမြင်ရပါတယ်။

“အာဆီယံ ဘုံသဘောတူညီချက်ငါးချက်နဲ့ ပတ်သက်ပြီး ထူးခြားတဲ့ရလဒ် မရခဲ့ဘူး”
- မလေးရှားနိုင်ငံခြားရေးဝန်ကြီး‌ဟောင်း ဆိုင်ဖူဒင် အဗ္ဗဒူလာ

မေး။ ။ အာဆီယံကိုရော ခင်ဗျားဘယ်လိုမြင်သလဲ။ အာဆီယံရဲ့ လုပ်ကိုင်ဆောင်ရွက်မှုတွေကနေ အခုအချိန်အထိ သိသာထင်ရှားတဲ့ တိုးတက်မှုတွေ မတွေ့ရပါဘူး။

ဖြေ။ ။ အာဆီယံက မြန်မာ့အရေးအတွက် ဘုံသဘောတူညီချက်ငါးချက် ချခဲ့ပါတယ်။ ဒါပေမဲ့ အခုအချိန်အထိ အဲဒီငါးချက်နဲ့ ပတ်သက်ပြီး ထူးခြားတဲ့ရလဒ် မရခဲ့ပါဘူး။ နောက်ဆုံး လူသားချင်းစာနာမှု အကူအညီတောင် မပေးနိုင်သေးပါဘူး။ ဒါပေမဲ့ ဒီနှစ်အလှည့်ကျ ဥက္ကဋ္ဌက အင်ဒိုနီးရှားနိုင်ငံဖြစ်ပါတယ်။ သမ္မတ ဂျိုကိုဝီဒိုဒို (Joko Widodo) နဲ့ နိုင်ငံခြားရေးဝန်ကြီး ရက်နို မာဆူဒီ (Retno Marsudi) တို့အနေနဲ့ ပိုမိုကြိုးစားဆောင်ရွက်ကြမယ်လို့ ကျွန်တော်အတော်ကိုမျှော်လင့်နေပါတယ်။ မာဆူဒီနဲ့ ကျွန်တော် အကြိမ်များစွာ ပြောဆိုခဲ့ပါတယ်။ အာဆီယံသဘောတူညီချက်တွေ လက်တွေ့အကောင်အထည်ဖေါ်ဖို့အတွက် သူ့အနေနဲ့ ဆထက်ထမ်းပိုး ကြိုးစားမယ်လို့ ကျွန်တော်ထင်ပါတယ်။

ဒါပေမဲ့ ကျွန်တော် အမျိုးသားညီညွတ်ရေးအစိုးရ (NUG) နိုင်ငံခြားရေးဝန်ကြီးနဲ့ တွေ့တုန်းကတော့ ဒီဘုံသဘောတူညီချက် ငါးချက်ဟာ မလုံလောက်ပါဘူးလို့ ကျွန်တော့်ကို သူက ယဉ်ယဉ်ကျေးကျေး ပြောပါတယ်။ သူတို့အတွက် ဒီအချက် ါးချက်လောက်နဲ့ မလုံလောက်ဘူးဆိုတာ ကျွန်တော်နားလည်ပါတယ်။ တကယ်တော့ ဒီသဘောတူညီချက်တွေ ချမှတ်ခဲ့တဲ့ကိစ္စမှာ NUG တို့ NUCC တို့အပြင် တခြားသက်ဆိုင်ရာအဖွဲ့အစည်းတွေနဲ့ တိုင်ပင်ခဲ့ခြင်းမရှိခဲ့သလို သူတို့ကလည်း ဒီငါးချက်အပေါ်မှာ ဘာမျှော်လင့်ချက်မှ မထားပါဘူး။ ဒါကြောင့် ဒီအချက်တွေကို အကောင်အထည်ဖော်တဲ့နေရာမှာ အာဆီယံအနေနဲ့ အချိန်ကာလသတ်မှတ်မှု အပါအဝင် အခုထက်ပိုပြီး အလေးထား ဆောင်ရွက်ဖို့လိုပါတယ်။ အဲဒီလို သတ်မှတ်ချက်မရှိဘူးဆိုရင် မြန်မာ့အရေးကို ဘယ်လိုမှ ဖြေရှင်းနိုင်မှာ မဟုတ်ပါဘူး။

မေး။ ။ အင်ဒိုနီးရှားနိုင်ငံအနေနဲ့ အဲဒီအာဆီယံမူငါးချက်ကို စစ်ကောင်စီက လက်ခံအောင် နားချနိုင်မယ်လို့ ခင်ဗျားထင်သလား။

ဖြေ။ ။ အာဆီယံအလှည့်ကျဥက္ကဋ္ဌ ဖြစ်တဲ့ အင်ဒိုနီးယားနိုင်ငံအနေနဲ့ တစ်စုံတစ်ရာ အတိုင်းအတာအထိတော့ လုပ်နိုင်မယ်လို့ ကျွန်တော်မျှော်လင့်ပါတယ်။ အခု မြန်မာစစ်ကောင်စီနဲ့ စကားပြောဖို့ သူတို့ ဗိုလ်ချုပ်တစ်ယောက်လွှတ်မယ်လို့ ကျွန်တော် နားလည်ထားတယ်။ ဘာအတွက်သွားမှာလဲ မသိပေမယ့် ကြိုးစားကြည့်ဖို့တော့ သင့်ပါတယ်။ ဒါပေမဲ့ တစ်ချိန်တည်းမှာပဲ အာဆီယံအနေနဲ့ NUG နဲ့ NUCC ကိုလည်း တရားဝင်ဆက်သွယ်ဖို့ လိုတယ်။ အာဆီယံက စစ်ကောင်စီတစ်ခုတည်းနဲ့ ဆက်သွယ်နေတာ နှစ်နှစ်ရှိပါပြီ။ ဘာမှ ဖြစ်မလာဘူးလေ။ အဲဒီတော့ ကျွန်တော်တို့ ကြိုက်သည်ဖြစ်စေ မကြိုက်သည်ဖြစ်စေ အာဆီယံအနေနဲ့ NUG နဲ့ NUCC ကို ထိတွေ့ဆက်ဆံဖို့ အချိန်တန်ပြီဖြစ်ပါတယ်။

မေး။ ။ အာဆီယံက အဲဒီလို လုပ်မယ်လို့ ခင်ဗျားထင်သလား။

ဖြေ။ ။ ကျွန်တော်သိသလောက်ပြောရရင် NUG နဲ့ NUCC အဖွဲ့ဝင်တွေကို ရက်နို မာဆူဒီ ဒါမှမဟုတ် သူ့ရဲ့ ကိုယ်စားလှယ်တွေက တွေ့ဆုံပြီးပါပြီ။ ဒါဟာ အစကောင်းတစ်ခုပဲလို့ ထင်ပါတယ်။

မေး။ ။ အဲဒီတော့ NUG ကို အာဆီယံက တရားဝင်ဆက်ဆံတော့မယ်လို့ ထင်ပါသလား။

ဖြေ။ ။ အာဆီယံအဖွဲ့ဝင်နိုင်ငံတွေထဲမှာ NUG နဲ့ NUCC ကို တရားဝင်ဆက်ဆံသင့်တယ်လို့ သဘောထားရှိတဲ့နိုင်ငံ သုံးနိုင်ငံ ရှိပါတယ်။ မလေးရှားနဲ့ အင်ဒိုနီးရှားနိုင်ငံတွေကတော့ လူသိရှင်ကြား ထုတ်ဖော်ပြောဆိုပြီးပါပြီ။ တတိယအဖွဲ့ဝင်နိုင်ငံအမည်တော့ ကျွန်တော် မပြောချင်ပါဘူး။ အဲဒီနိုင်ငံကိုယ်တိုင်ကပဲ ထုတ်ပြောပါစေတော့ဗျာ။

မေး။ ။ အဲဒီလိုဆိုတော့ မလေးရှားနိုင်ငံရဲ့ မြန်မာနိုင်ငံဆိုင်ရာ သဘောထားကို ဘယ်လိုပြောမလဲခင်ဗျ။

ဖြေ။ ။ လက်ရှိနိုင်ငံခြားရေးဝန်ကြီးနဲ့ ကျွန်တော် မဆွေးနွေးဖြစ်သေးဘူးဗျ။ ဒါပေမဲ့ ကျွန်တော်တို့ မလေးရှားရဲ့ နိုင်ငံခြားရေးမူဝါဒက တည်ငြိမ်ပါတယ်။ အရင်ကရှိပြီးသားလမ်းအတိုင်း ဆက်ပြီး လျှောက်လေ့ရှိပါတယ်။ ဒါကြောင့် လက်ရှိသမ္မတနဲ့ နိုင်ငံခြားရေးဝန်ကြီးတွေကလည်း ကျွန်တော်တို့ ရှေးကလုပ်ခဲ့တဲ့အတိုင်း ဆက်လုပ်မှာပဲလို့ မျှော်လင့်ပါတယ်။ တစ်ဘက်မှာ ကျွန်တော်ကိုယ်တိုင်လည်း နိုင်ငံခြားရေးဝန်ကြီးဟောင်းတစ်ဦးအနေနဲ့ မိတ်ဆွေတွေကို ဆက်သွယ်ပြောဆို ဆွေးနွေးတာတွေ လုပ်နေပါတယ်။

မေး။ ။ မြန်မာပြည်မှာ စစ်တပ်က အာဏာသိမ်းပြီးနောက်ပိုင်း မြန်မာနိုင်ငံသားထောင်ပေါင်းများစွာ မလေးရှားကို နယ်စပ်ဖြတ်ပြီး ဝင်ရောက်လာကြပါတယ်။ တရားမဝင် ရောက်လာသူတွေလည်း ပါနိုင်ပါတယ်။ အဲဒီလူတွေထဲကတချို့ကို မလေးရှားအစိုးရက ဖမ်းဆီးပြီး မြန်မာပြည်ပြန်ပို့တယ်လို့ ကျွန်တော်တို့ သတင်းတွေ ရနေပါတယ်။ ဒီမြန်မာနိုင်ငံသား အလုပ်သမားတွေကိစ္စကို မလေးရှားအစိုးရအနေနဲ့ ဘယ်လိုကိုင်တွယ်ဖြေရှင်း သင့်တယ် ထင်ပါသလဲ။

ဖြေ။ ။ အချက် နှစ်ချက်ရှိပါတယ်။ ပထမအချက်က မလေးရှားနိုင်ငံဟာ ဒုက္ခသည်များဆိုင်ရာ နိုင်ငံတကာပဋိညာဉ်ကို လက်မှတ်ထိုးထားတဲ့နိုင်ငံ မဟုတ်ပါဘူး။ ဒါပေမဲ့ ဒုက္ခသည်ပြဿနာကို တတ်နိုင်သမျှ ဆောင်ရွက်နေပါတယ်။ ကျွန်တော်တို့နိုင်ငံမှာ မြန်မာနိုင်ငံသား တစ်သိန်းရှစ်သောင်းလောက် ရှိပါတယ်။ အများစုက ရိုဟင်ဂျာတွေပါ။ ဒါပေမဲ့ ရိုဟင်ဂျာမဟုတ်သူတွေလည်း ရှိပါတယ်။ ကျွန်တော် သေချာမသိပေမဲ့ ပြန်ပို့ခံရသူတွေရှိတယ်ဆိုတာ ကြားရလို့ စိတ်မကောင်းပါဘူး။ ဒီကိစ္စကို ကိုင်တွယ်ဖြေရှင်းရတဲ့ အဖွဲ့အစည်းတွေက အတော်များတော့ ကျွန်တော်မသိလိုက်တာ ဖြစ်နိုင်ပါတယ်။ ဒါမှမဟုတ် ကျွန်တော် ဝန်ကြီးမဟုတ်တဲ့ကာလမှာ ဖမ်းဆီးခံရတာလည်း ဖြစ်နိုင်ပါတယ်။

ဖြစ်သင့်တာကတော့ မလေးရှားနိုင်ငံအနေနဲ့ ဒုက္ခသည်တွေအတွက် ပိုမိုကောင်းမွန်တဲ့ နည်းစနစ်တွေချမှတ်ဖို့ တကယ်လိုအပ်နေပါတယ်။ မလေးရှား အမျိုးသားလုံခြုံရေးကောင်စီက ဒုက္ခသည်ဆိုင်ရာ လမ်းညွန်ချက်တွေကို ပြင်ဆင်တိုးချဲ့ဖို့ အခုဆောင်ရွက်နေပါတယ်။ အဲဒီတိုးချဲ့ပြင်ဆင်ချက်တွေကို အလျင်အမြန် အတည်ပြုပြဋ္ဌာန်းပြီးရင် ဒုက္ခသည်တွေ ခိုလှုံခွင့်လျှောက်ထားတဲ့ကိစ္စကို ကုလသမဂ္ဂဒုက္ခသည်များဆိုင်ရာ မဟာမင်းကြီးရုံးနဲ့ လက်တွဲပူးပေါင်းပြီး မလိုအပ်ဘဲ ပြန်ပို့ခံရသူတွေ ထပ်မံပေါ်ပေါက်ခြင်းမရှိအောင် တားဆီးကာကွယ်နိုင်မယ်လို့ ကျွန်တော် မျှော်လင့်ပါတယ်။

“မြန်မာပြည်သူတွေဟာ အင်မတန်ရဲရင့်ပြီး အင်မတန်စွန့်စား၊ အင်မတန် ကြံ့ကြံ့ခိုင်နိုင်တဲ့သူတွေပါပဲ”
- မလေးရှားနိုင်ငံခြားရေးဝန်ကြီး‌ဟောင်း ဆိုင်ဖူဒင် အဗ္ဗဒူလာ

မေး။ ။ အခုဖေဖော်ဝါရီလ ၁ ရက်နေ့မှာ စစ်ကောင်စီကို အံတုဆန့်ကျင်တဲ့အနေနဲ့ မြန်မာပြည်သူတွေ တိတ်ဆိတ်ငြိမ်သက်ခြင်းသပိတ်ကို နိုင်ငံအနှံ့အပြားမှာ ပါဝင်ဆင်နွဲခဲ့ကြတာကိုရော ဘယ်လိုမြင်လဲဗျ။

ဖြေ။ ။ သူတို့ကို ကျွန်တော် တကယ်အလေးပြုပါတယ်ဗျာ။ အင်မတန်ရဲရင့်ပြီး အင်မတန်စွန့်စားကြ၊ အင်မတန် ကြံ့ကြံ့ခိုင်နိုင်ကြတဲ့ သူတွေပါပဲ။ တိတ်ဆိတ်ခြင်းသပိတ်ဟာ စစ်ကောင်စီကို သူတို့မကြောက်ဘူး၊ ဆက်လက် ဆန့်ကျင်တော်လှန်မယ်ဆိုတာကို ပြသလိုက်တဲ့ တကယ့်နည်းလမ်းသစ်တစ်ခုပါပဲ။ ဒါကြောင့်လည်း ကျွန်တော်က အာဆီယံနဲ့ နိုင်ငံတကာကို မြန်မာပြည်သူတွေအပေါ် တာဝန်ကျေဖို့ အစဉ်တစိုက် ပြောဆိုနေတာဖြစ်ပါတယ်။ မြန်မာလူထုဟာ စွန့်လွှတ်စွန့်စားရဲသူတွေဖြစ်သလို အဲဒီလိုလုပ်ကိုင်လိုစိတ် ထက်သန်သူတွေလည်း ဖြစ်ပါတယ်။ ဒါကြောင့် ကျွန်တော်တို့ဘက်ကလည်း စိတ်အားထက်သန်စွာနဲ့ သူတို့ကို ကူညီဖို့လိုပါတယ်။

မေး။ ။ NUG အစိုးရကို အကြံပေးချင်တာများ ရှိသလား။

ဖြေ။ ။ မရှိပါဘူး။ NUG အနေနဲ့ သူတို့ ဘာလုပ်ရမယ်ဆိုတာသိတယ်လို့ ကျွန်တော်ထင်ပါတယ်။ မြန်မာပြည်သူတွေရဲ့ ဒီမိုကရေစီလှုပ်ရှားမှုကို မြန်မာလူထုကပဲ ဦးဆောင်ရမယ်လို့ ကျွန်တော် အမြဲယုံကြည်တယ်။ NUG ဟာ မြန်မာပြည်သူတွေရွေးချယ်ထားတဲ့ အစိုးရပါပဲ။

မေး။ ။ ကုလသမဂ္ဂရဲ့ လုပ်ဆောင်ချက်တွေကရော မြန်မာနိုင်ငံအတွက် လုံလောက်ပြီလား။

ဖြေ။ ။ ကုလသမဂ္ဂအတွင်းရေးမှူးချုပ်က မြန်မာနိုင်ငံဆိုင်ရာ အထူးကိုယ်စားလှယ်အဖြစ် ဒေါက်တာနိုလင်းဟေဇာကို ခန့်ထားပြီးပါပြီ။ သူ့အနေနဲ့ အကောင်းဆုံး ကြိုးစားနေတယ်လို့ ထင်ပါတယ်။ နိုင်ငံပြင်ပရောက်နေတဲ့ မြန်မာဒုက္ခသည်တွေ ပိုမိုကောင်းမွန်တဲ့ပညာတွေ သင်ယူနိုင်ရေးအတွက် သူ အခု အစီအစဉ်သစ်တစ်ခု လုပ်နေပါတယ်။ ပညာသင်ပေးရေး ကူညီလုပ်ဆောင်မယ့် အစိုးရမဟုတ်တဲ့အဖွဲ့တွေကို ထောက်ပံ့နိုင်ဖို့လည်း သူဆောင်ရွက်နေပါတယ်။ တစ်ပြိုင်နက်မှာ နိုင်ငံတကာအသိုက်အဝန်းအနေနဲ့လည်း ကုလသမဂ္ဂဖြစ်စေ တခြားနေရာတစ်ခုခုကဖြစ်စေ ပိုပြီးလုပ်ဆောင်ဖို့လိုတယ်။ စစ်တပ်ပိုင်ဆိုင်မှုတွေကို ပိတ်ဆို့အရေးယူရေး၊ စစ်တပ်ကို လက်နက်နဲ့ လောင်စာဆီရောင်းချမှုတွေ ရပ်ဆိုင်းရေး စတာတွေ ဆောင်ရွက်ဖို့လည်း လိုပါတယ်။ စစ်ကောင်စီလေယာဉ်တွေ ပျံသန်းနိုင်နေသမျှ ကျောင်းတက်နေတဲ့ ကလေးသူငယ်တွေ အပါအဝင် မြန်မာပြည်သူတွေကို စစ်တပ်က ဗုံးကြဲနေမှာပါပဲ။

မေး။ ။ မြန်မာပြည်သူတွေကို နောက်ဆုံးအနေနဲ့ တစ်ခုခု နှုတ်ဆက်စကား ပြောချင်တာ ရှိသေးလားခင်ဗျ။

ဖြေ။ ။ မြန်မာပြည်သူတွေဟာ တကယ့်ကို ကြံ့ကြံ့ခံရင်ဆိုင်ရဲသူတွေ ဖြစ်ပါတယ်။ အင်မတန်ရဲရင့်ပြီး စိတ်ဆန္ဒပြင်းပြသူတွေဖြစ်သလို စွန့်လွှတ်စွန့်စားသူတွေလည်း ဖြစ်ပါတယ်။ မှောင်မိုက်တဲ့ ဥမင်လှိုဏ်ခေါင်းရဲ့ အဆုံးမှာ အလင်းရောင်ဆိုတာရှိနေတယ်လို့ ကျွန်တော် ခိုင်ခိုင်မာမာ ယုံကြည်ပါတယ်။   ။