གོ་ལའི་འཕྲོད་བསྟེན་དང་སྙིང་རྗེའི་ནུས་པ།

འདས་པའི་བདུན་ཕྲག་འདིའི་ནང་ཨ་རིའི་འཇོར་ཇི་ཡ་མངའ་སྡེའི་ཨེཊ་ལེན་ཊཱ་གྲོང་ཁྱེར་ནང་ཆགས་པའི་ཨེ་མོ་རི་གཙུག་ལག་སློབ་ཆེན་དུ་བོད་ཀྱི་བདུན་ཕྲག་ཀྱི་དུས་སྟོན་ཚོགས་ཤིང་།  དེ་དང་བསྟུན་གོ་ལའི་འཕྲོད་བསྟེན་བསྟི་གནས་ཀྱིས་གོ་སྒྲིག་འོག་འཕྲོད་བསྟེན་དང་ནད་ཡམས་དཔྱད་རིག་སོགས་ཀྱི་བགྲོ་གླེང་ཚོགས་འདུའི་ཐོག་བསྟན་འཛིན་རྒྱ་མཚོའི་སློབ་ཡོན་བཞེས་མྱོང་མཁན་གྱི་ནང་པའི་དགེ་བཤེས་ཁག་ཅིག་གདན་ཞུས་ཀྱིས་འཕྲོད་བསྟེན་གྱི་ནང་དུ་སྙིང་རྗེ་གོང་འཕེལ་གཏོང་རྒྱུའི་ཕན་ནུས་སྐོར་བགྲོ་གླེང་གནང་ཡོད་པ་དང་།   དགེ་བཤེས་ཚོས་གཉེར་པའི་ཉམས་ཞིབ་ཀྱི་གྲུབ་དོན་ཁག་ངོ་སྤྲོད་ཀྱིས་སྙིང་རྗེས་ནི་མིའི་ལུས་སེམས་ཀྱི་འཕྲོད་བསྟེན་ལ་ཕན་རླབས་སྒྲུབ་པའི་ཆ་རྐྱེན་ལྡན་ཡོད་པ་ཚན་རིག་གི་ཞིབ་འཇུག་ཚད་འཕེར་གྱི་ཐོག་ནས་ངོ་སྤྲོད་གནང་འདུག  གནད་དོན་གླེང་མོལ་གྱི་ལས་རིམ་ནང་།  ཨེ་མོ་རི་གཙུག་ལག་སློབ་ཆེན་གྱི་བགྲོ་གླེང་ཐོག་ཕེབས་ཞུགས་གནང་མཁན་སེར་བྱེས་དགེ་བཤེས་ཐབས་མཁས་བློ་གྲོས་ལགས་དང་།  དགའ་ལྡན་བྱང་རྩེ་དགེ་བཤེས་བློ་གྲོས་བཟང་པོ་ལགས།  འབྲས་སྤུངས་བློ་གསལ་གླིང་གི་ཚན་རིག་དང་ལྟ་སྒྲུབ་ཀྱི་སློབ་དཔོན་དགེ་བཤེས་དགེ་ལེགས་རྒྱ་མཚོ་ལགས་བཅས་དང་ལྷན་ཨེ་ཤེ་ཡ་རང་དབང་རླུང་འཕྲིན་ཁང་གི་བོད་སྐད་སྡེ་ཚན་གྱི་འགན་འཛིན་གཞོན་པའི་ལས་ཚབ་བཀྲིས་དབང་ཕྱུག་ལགས་ཀྱིས་གླེང་མོལ་ཞུས་པར་གསན་རོགས་གནང་།། 

གསར་འགོད་པ། བཀྲིས་དབང་ཕྱུག

རྩོམ་སྒྲིག་པ། རྡོ་རྗེ་དགྲ་འདུལ།

དྲྭ་ཐོག་སྤེལ་མཁན། ནོར་སྡེ་སྒྲོལ་མ།