བོད་ཀྱི་གཞོན་ནུ་ལྷན་ཚོགས་ཀྱི་འགན་འཛིན་ལྷན་ཚོགས་སྟེང་༧གོང་ས་མཆོག་གི་སྐུ་ཕྱྭ་སྲུང་སྐྱོབ་ཐད་སྔར་ལྷག་ལས་དོན་སྤེལ་ཕྱོགས་སྐོར་གྲོས་ཆོད།

ཕྱི་ཟླ་༡༠ཚེས་༡༢ཉིན་དབུས་བོད་ཀྱི་གཞོན་ནུ་ལྷན་ཚོགས་བཙུགས་ནས་ལོ་ངོ་ཧྲིལ་བོ་༥༠་འཁོར་བའི་དུས་དྲན་དང་གཞོན་ནུ་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་༥༠་པའི་ཚོགས་འདུའི་མཇུག་བསྡོམས་མཛད་སྒོ་ཚོགས་གནང་ཡོད་པ་དང་། ཐེངས་འདིའི་ཚོགས་འདུའི་སྟེང་༧གོང་ས་སྐྱབས་མགོན་ཆེན་པོ་མཆོག་གི་སྐུ་ཕྱྭ་སྲུང་སྐྱོབ་ཐད་སྔར་ལྷག་ལས་དོན་བྱེད་ཕྱོགས་དང་། བོད་ནང་གི་ཆབ་སྲིད་བཙོན་མ་རྣམས་ཀློད་གྲོལ་དགོས་པའི་ལས་འགུལ་སྤེལ་ཕྱོགས། འཆར་ལ་ཉེ་བའི་རྒྱ་ནག་གི་དགུན་དུས་ཨོ་རྩལ་འགྲན་ཚོགས་ཐད་ཛ་དྲག་གི་ལས་འགུལ་སྤེལ་ཕྱོགས་སོགས་གྲོས་གཞི་དོན་ཚན་༡༠་གཏན་འབེབ་གནང་ཡོད་པ་དང་།བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་འགྲུབ་ལགས་ནས་ཐེངས་འདིར་ཉིན་གྲངས་ལྔའི་རིང་གི་ཚོགས་འདུ་དེ་ལམ་ལྷུང་ཡག་པོ་བྱུང་སོང་བ་དང་། ཚོགས་འདུའི་སྟེང་གྲོས་གཞི་གྲོས་ཆོད་གལ་ཆེན་ཁག་ཅིག་འཇོག་ཐུབ་པ་སོགས་བྱུང་ཡོད་སྐོར་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་བྱུང་། འདི་གའི་སྐོར་གསར་འགོད་པ་སངས་རྒྱས་དཀོན་མཆོག་ཀྱིས་གནས་ཚུལ་ལ་གསན་རོགས་ཞུ།།

གསར་འགོད་པ། སངས་རྒྱས་དཀོན་མཆོག
རྩོམ་སྒྲིག་པ། བསྟན་འཛིན་འཕགས་སྒྲོན།
དྲ་ཐོག་སྤེལ་མཁན། བསྟན་འཛིན་འཕགས་སྒྲོན།