ཨོསི་ཊརེ་ལི་ཡའི་གྲོས་ཚོགས་འཐུས་མི་ཞིག་གིས་བོད་མིའི་རང་དབང་སྒེར་ལངས་ལ་གདུང་སེམས་མཉམ་སྐྱེས་གནང་།

དེ་ཡང་ཕྱི་ཟླ་གསུམ་པའི་ཚེས་༨ཉིན་ཨོསི་ཊརེ་ལི་ཡའི་(Australia)་གྲོས་ཚོགས་གོང་མའི་ནང་། གྲོས་ཚོགས་འཐུས་མི་ལྕམ་(Janet Rice)་མཆོག་གིས་གཏམ་བཤད་གནང་སྐབས། བོད་མི་ཚོས་ཟླ་གསུམ་པའི་ཚེས་༡༠ཉིན་འདི་བཞིན་རང་དབང་སྒེར་ལངས་ཀྱི་ཉིན་མོ་སྲུང་བརྩི་ཞུ་དགོས་པའི་རྒྱབ་ལྗོངས་ལོ་རྒྱུས་སྙིང་བསྡུས་ཤིག་ངོ་སྤྲོད་དང་འབྲེལ། ད་ལྟའང་རྒྱ་ནག་གཞུང་གིས་བོད་ནང་གི་བོད་མི་ཚོས་ཞི་བའི་ལས་འགུལ་སྤེལ་བའི་སྐབས་འཛིན་བཟུང་དང་སྡུག་སྦྱོང་མནར་གཅོད་གཏོང་རྒྱུ་མཚམས་འཇོག་བྱས་མེད་པ་རེད་ཅེས་གསུངས་པ་དང་ཆབས་ཅིག ཨོསི་ཊརེ་ལི་ཡའི་ངོས་ནས་རྒྱ་ནག་ལ་ལངས་ཕྱོགས་གསལ་བོ་བཟུང་ནས། ང་ཚོས་མ་འོངས་པར་༧གོང་ས་ཏཱ་ལའི་བླ་མའི་༧སྐུའི་ཡང་སྲིད་དེ་བཞིན་བོད་མི་ཚོས་ངོས་འཛིན་ཞུས་པ་དེར་མ་གཏོགས་གཞན་ལ་ངོས་ལེན་ཞུ་རྒྱུ་མིན་པ་སྐྱར་ནན་གནང་འདུག
ད་དུང་ཁོང་གིས་མུ་མཐུད་དུ། ངས་རྒྱ་ནག་གཞུང་ལ་བོད་ནང་གི་བོད་མི་ཚོའི་ཐོག་དྲག་གནོན་བྱེད་རྒྱུ་མཚམས་འཇོག་བྱེད་དགོས་པ་དང་། ཡང་ཨོསི་ཊརེ་ལི་ཡའི་གཞུང་གི་ངོས་ནས་བོད་ནང་གི་བོད་མི་ཚོའི་འགྲོ་བ་མིའི་ཐོབ་ཐང་དང་། རང་དབང་ཆེད་ཚད་མཐོ་པོའི་ཐོག་ནས་རྒྱབ་སྐྱོར་དང་ཞུ་སྐུལ་གནང་དགོས་པའི་འབོད་སྐུལ་ཞུ་གི་ཡོད་ཅེས་གསུངས་འདུག དེ་དང་ཕྱོགས་མཚུངས་ཁོང་གིས་པཎ་ཆེན་རིན་པོ་ཆེ་གར་ཡོད་ཙམ་ཡང་ཤེས་རྟོགས་མེད་པའི་གནས་སྟངས་སོགས་ལུང་འདྲེན་གནང་ཏེ་ཁོང་གི་ངོས་ནས་གསུམ་བཅུ་དུས་དྲན་གྱི་ཉིན་མོར་བོད་མི་ཚོར་གདུང་སེམས་མཉམ་སྐྱེས་ཡོད་པ་བསྐྱར་ནན་གནང་འདུག

གསར་འགོད་པ། རིག་འཛིན་ཆོས་སྒྲོན།
རྩོམ་སྒྲིག་པ། བཀྲ་ཤིས་དབང་ཕྱུག
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།