ຈີນຈະດໍາເນີນການ ລົງໂທດໂບຊີລ່າຍ

ແຕ່ກ່ອນ ທ່ານໂບຊີລ່າຍ ເປັນກັມມະການ ກົມການເມືອງ ສູນກາງພັກ ຄອມມຸຍນິສຈີນ ເປັນ ເລຂາທິການພັກ ແລະ ເຈົ້າຄອງເມືອງຈ່ອງກິ່ງ ໃນພາກ ຕາເວັນຕົກສ່ຽງໃຕ້ ຂອງຈີນ. ເມື່ອປີກາຍ ນັກຊ່ຽວຊານ ການເມືອງໃນຈີນ ຄາດວ່າ ທ່ານໂບຊີລ່າຍ ຈະໄດ້ຂື້ນເປັນ ຜູ້ນຳ ທີ່ສຳຄົນຄົນນຶ່ງ ຂອງຈີນ ແຕ່ໃນເດືອນກ່ອນ ພັລຍາຂອງທ່ານ ໂບຊີລ່າຍ ຖືກຈັບດຳເນີນ ຄະດີຄາຕກັມ ນັກທຸຣະກິດ ຊາວອັງກິດ ແລະຖືກຕັດສິນ ຈຳຄຸກຕລອດຊີວິດ. ໃນຂນະດຽວກັນ ພັກຄອມມຸຍນິສຈີນ ກໍໄລ່ທ່ານ ໂບຊີລ່າຍ ອອກຈາກຕຳແໜ່ງ ທັງໝົດ ນອກຈາກຕຳແໜ່ງ ສະມາຊິກ ສະພາ ປະຊາຊົນຈີນ. ແຕ່ເມື່ອ ຄນະປະຈຳສະພາ ປະຊຸມກັນ ເມື່ອວັນພຣະຫັດ ຈື່ງໄດ້ຕົກລົງໄລ່ ທ່ານ ໂບຊີລ່າຍ ອອກຈາກສະພາ.

ໃນເມື່ອຖືກໄລ່ອອກ ຈາກສະພາ ທ່ານໂບຊີລ່າຍ ກໍບໍ່ມີສິດ ປົກປ້ອງແນວໃດ ອັຍການ ກໍຈະສາມາດ ຟ້ອງ ທ່ານໂບຊີລ່າຍ ໄດ້ໃນຄະດີ ໃຊ້ອຳນາດ ເກີນຂອບເຂດ ຮັບເງິນ ສິນບົນ ແລະ ມົ້ວສຸມນາຣີ ທີ່ເຫັນວ່າບໍ່ ເໝາະສົມ.

ຄນະຜູ້ນຳຈີນ ຊຸດປັດຈຸບັນ ຈະປະຊຸມປຶກສາ ຫາລືກັນເພື່ອ ເລືອກເອົາ ຄນະນຳຊຸດໃໝ່ ໃນວັນທີ່ 8 ພຶສຈິກາ 2012. ທ່ານ ຊີຈິ່ນພິ່ງ ປັດຈຸບັນ ເປັນຮອງ ປະທານປະເທດ ຄາດວ່າຈະຂື້ນ ເປັນປະທານປະເທດ ແລະ ຜູ້ນຳພັກ ຄອມມຸຍນິສຈີນ ຄົນໃໝ່ ສ່ວນ ທ່ານ ຮູ່ຈິ່ນຕ່າວ ປະທານປະເທດ ແລະ ທ່ານເວັນເຈັ່ຍປ່າວ ນາຍົກຣັຖມົນຕຣີ ປັດຈຸບັນ ກໍອາຈພົ້ນ ຕຳແໜ່ງໄປ.