ວຽດນາມ ຈະປູກຢາງພາຣາ ຢູ່ໃຕ້ ຂອງລາວ

ຣັຖບານລາວ ໃຫ້ບໍຣິສັດ ຂອງວຽດນາມ ເຊົ່າທີ່ດິນຈຳນວນ ດັ່ງກ່າວເພື່ອແລກປ່ຽນ ກັບການສ້າງຫໍພັກ ນັກກິລາ ທີ່ມີມູນຄ່າ ປະມານ 10ລ້ານດອນລ້າ ສະຫະຣັຖ ຊຶ່ງປັດຈຸບັນ ວຽດນາມ ກຳລັງສ້າງຢູ່ ແລະຄົງຈະສຳເຣັດ ກ່ອນງານມະຫາກັມ ກິລາຊີເກມ ຢູ່ລາວ ຢ່າງແນ່ນອນ.

ອົງການຂ່າວສານ ທາງການຂອງວຽດນາມ ແຈ້ງອີກວ່າ ຣັຖບານລາວ ມີໂຄງການຈະໃຫ້ ຕ່າງປະເທດ ເຊົ່າທີ່ດິນ ປູກຢາງພາຣາ ທັງໝົດໃນທົ່ວ ປະເທດເຖິງ 3 ແສນເຮັກຕາຣ໌. ຈີນຮັບເໝົາລົງທຶນ ປູກຢາງພາຣາ ຢູ່ພາກເໜືອ: ເຊັ່ນຢູ່ແຂວງ ຫລວງນ້ຳທາ ອຸດົມໄຊແລະ ບໍ່ແກ້ວ ວຽດນາມ ປູກຢູ່ພາກໃຕ້ ເຊັ່ນຢູ່ແຂວງ ຈຳປາສັກ ສາຣະວັນ ແລະອັຕປື. ສ່ວນຢູ່ພາກກາງ ທາງການລາວກໍ ກຳລັງຂຍາຍ ການປູກ ຢາງພາຣາ ຢູ່ແຂວງ ບໍຣິຄຳໄຊ ຄຳມ່ວນແລະ ສວັນນະເຂດ.

ການປູກຢາງພາຣາ ຢູ່ພາກໃຕ້ກວ້າງ ກວ່າທຸກໆແຫ່ງ ຄືກວ້າງເຖິງ 40ສ່ວນຮ້ອຍ ການພື້ນທີ່ປູກ ຢາງພາຣາ ທັງໝົດໃນທົ່ວ ປະເທດລາວ. ບໍຣິສັດ Hoang Anh Gia Lai ຂອງວຽດນາມ ຍັງມີແຜນ ຈະສ້າງໂຮງງານ ຢາງພາຣາ ຢູ່ໃນພື້ນທີ່ ທີ່ແຂວງອັຕປື ນັ້ນນຳ. ນອກຈາກບໍຣິສັດ Hoang Anh Gia Lai ບໍຣິສັດ ຂອງ ວຽດນາມ ອີກສອງບໍຣິສັດ ກໍກຳລັງຂຍາຍ ການປູກ ຢາງພາຣາ ຢູ່ພາກໃຕ້ ຂອງລາວ ເປັນຢູ່ແຂວງ ຈຳປາສັກ ສາຣະວັນ ແລະເຊກອງ. ເມື່ອບໍ່ດົນຜ່ານມາ ນັກວິທຍາສາດ ຈາກສິງກະໂປ ຈີນແລະ ສະຫະຣັຖ ໄດ້ອອກປະກາດ ເຕືອນປະເທດ ໃນເອເຊັຍຕາເວັນ ອອກສ່ຽງໃຕ້ວ່າ ການປູກ ຢາງພາຣາ ຈະທຳຣາຍສະພາບ ແວດລ້ອມ ປ່າໄມ້ຕົ້ນໄມ້ ສັດປ່າແລະເຮັດໃຫ້ ດິນເສັຍ ຄຸນນະພາບ.