ທຸຣະກິຈຄ້າໄມ້ ປະສົພບັນຫາ

ກາຣຄ້າໄມ້ ໃນພາຄໃຕ້ ຂອງລາວ ພວມປະສົບ ກັບບັນຫາ ທີ່ມີຈຳນວນ ຫລຸດໜ້ອຍລົງ ຍ້ອນທາງ ຣັຖບາລຈຳກັດ ແລະ ໃຫ້ປະຕິບັຕ ຕາມກົດໝາຍ ຢ່າງເຂັ້ມງວດ ພ້ອມກັບບັນຫາ ທີ່ໄມ້ດີໆ ກໍບໍ່ຄ່ອຍຈະມີ ເພາະຖືກຕັດໄປ ເກືອບໝົດແລ້ວ ສະນັ້ນ ພໍ່ຄ້າໄມ້ ຊາວລາວ ກໍປ່ຽນໄປ ປະກອບອາຊີພ ອື່ນເປັນສ່ວນໃຫຍ່ ແລ້ວປ່ອຍໃຫ້ ບໍຣິສັທ ຕ່າງຊາຕ ທີ່ຜລິຕເຄື່ອງ ເຮືອນ ຫລື ເຟີຣ໌ນີເຈີຣ໌ (Furniture) ສຳຫລັບກາຣ ສົ່ງອອກເທົ່ານັ້ນ ດັ່ງນັກ ທຸຣະກິຈ ຄ້າໄມ້ລາວ ທ່ານໜຶ່ງ ໄດ້ກ່າວ:

“ສ່ວນວຽກອື່ນໆ ຣັຖບາລມີ ກາຣຫວງຫ້າມ ໂດຽສະເພາະໄມ້ ປັຈຈຸບັນກໍ ຖືວ່າ ອອກບໍ່ໄດ້ ມີແຕ່ຜລິຕ ສຳເຣັຈຮູບ ເປັນເຟີຣ໌ນີເຈີຣ໌ ຄັນເປັນ ເຟີຣ໌ນີເຈີຣ໌ ລາວເຮົາສິ ບໍ່ສາມາດ ແຂ່ງຂັນກັບ ຕ່າງປະເທສໄດ້ ກໍມີບັນຫາຍາກ ເຖິງຄຳສັ່ງໄມ້ ຕົວນີ້”.

ນັກທຸຣະກິຈລາວ ທ່ານນີ້ ໃຫ້ກາຣ ອະທິບາຍ ເພີ່ມວ່າ ກົດໝາຍ ດ້ານກາຣຕັດໄມ້ ກາຣຂຸດຄົ້ນໄມ້ ຫລືກາຣ ປະກອບ ອາຊີພໄມ້ ທຸກຢ່າງ ຈຳເປັນຕ້ອງ ໄດ້ຮັບ ອະນຸຍາຕ ຈາກຣັຖບາລ ເປັນ ກໍຣະນີໄປ ອັນເປັນສາເຫຕ ເຮັດໃຫ້ ທຸຣະກິຈ ຄ້າໄມ້ ຫລາຍກຸ່ມ ທີ່ບໍ່ມີເສັ້ນ ມີສາຍກັບ ສະມາຊິກ ພັກ-ຣັຖ ໃນລາວ ເຣີ່ມມີກາຣ ປ່ຽນແປງທິສທາງ ໄປຫາອາຊີພ ອື່ນ. ສະເພາະເຣື່ອງກາຣ ຂຸດຄົ້ນ ແລະຕັດໄມ້ ທີ່ຫວງຫ້າມນັ້ນ ກໍຍັງມີ ກາຣດໍາເນີນ ກັນຢູ່ຄືເກົ່າ ແຕ່ຫລຸດຈຳນວນ ລົງແດ່ ຫນ້ອຍໜຶ່ງ ໃນຣະຫວ່າງ ບໍ່ເທົ່າໃດປີ ຜ່ານມານີ້.

ເຖີງຢ່າງໃດ ກໍຕາມ ສື່ມວລຊົນ ຕ່າງປະເທສ ໄດ້ຣາຍງານວ່າ ສະພາບປ່າໄມ້ ຢູ່ເມືອງລາວ ໃນປີ 1992 ມີຄວາມໜາແໜ້ນ ຄິດເປັນ ສັດສ່ວນເຖິງ 48% ຂອງພື້ນທີ່ ທັງໝົດ ແຕ່ໄດ້ຫລຸດລົງ ເປັນ 41% ໃນປີ 1998 ແລະຫລ້າສຸດ ມີກາຣຢືນຢັນ ຈາກທາງກາຣ ລາວວ່າ: ປ່າໄມ້ໃນເມືອງ ລາວ ຄົງຍັງມີ ຄວາມໜາແໜ້ນ ເຫລືອຢູ່ພຽງ 35% ເທົ່ານັ້ນ ໃນປັຈຈຸບັນນີ້.