ມວຍລາວຄວ້າຫລຽນຄໍາ ໄດ້ເກີນເປົ້າໝາຍ
2009.12.15
ສະຫະພັນມວຍລາວ ສ້າງຜົນງານ ໃນການແຂ່ງຂັນ ກິລາຊີເກມສ໌ ໄດ້ເກີນຄາດຫວັງເອົາໄວ້
ສະຫະພັນ ມວຍລາວ ສ້າງຜົນງານ ໃນການແຂ່ງຂັນ ກິລາເອເຊັຍຕາເວັນອອກສ່ຽງໃຕ້ ຫລື ຊີເກມສ໌ ໄດ້ ເກີນຄາດຫວັງ ເອົາໄວ້, ໂດຍສາມາດ ຍາດແຍ່ງເອົາ ຫລຽນຄໍາ ຈາກການແຂ່ງຂັນມາໄດ້ ທັງໝົດ 5 ຫລຽນ, ອີງຕາມຄໍາເວົ້າ ຂອງຫົວໜ້າຄຣູຝຶກ ນັກມວຍ.
ພ້ອມດຽວກັນນັ້ນ, ຮ້ອຍເອກ
ປາຖນາ ຟອງສມຸດ, ຫົວໜ້າ ຄຣູຝຶກມວຍລາວ ຊຸດຊີເກມສ໌, ຍັງໄດ້ຮຽກຮ້ອງ ໃຫ້ທຸກພາກສ່ວນ
ສົ່ງເສີມ ກິລາມວຍລາວ ໃຫ້ມີການພັທນາ ແລະ ຮັກສາມູນເຊື້ອ ໃນການແຂ່ງຂັນ ໃນຣາຍການຕໍ່ໄປ:
”ເປົ້າໝາຍ ທີ່ທາງສະຫະພັນ
ຕັ້ງໄວ້ວ່າ ແມ່ນ 4 ຫລຽນຄໍາ, ເຮົາຈະໃຫ້ໃນ ຊີເກມສ໌ ຄັ້ງນີ້ ແລະ ເຮົາກໍຈະເຮັດ
ຕາມຄາດໝາຍ ເກີນຄາດໝາຍມາ 1 ຫລຽນຄໍາ. ເຮົາກໍມີຄວາມຮູ້ສຶກດີໃຈຫລາຍ ວ່າ ຄັ້ງໜ້າ
ຄັນມີມວຍລາວ ເຂົ້າອີກ ເຮົາກໍຊິຕັ້ງໃຈ ກ່ວານີ້ ຍາດເອົາຫລຽນຄໍາຫລາຍກ່ວານີ້ຕື່ມ.”
ທິມມວຍລາວ ສາມາດຄ້ວາເອົາຫລຽນຄໍາ 5 ຫລຽນຄໍາ ໃນປະເພດຊາຍ 3 ຫລຽນ ໃນຮຸ່ນນໍ້າໜັກ ບໍ່ເກີນ 48, 51 ແລະ 54 ກິໂລກຣາມ, ແລະ 2 ຫລຽນຄໍາ ຈາກປະເພດຍິງ ຮຸ່ນນໍ້າໜັກ ບໍ່ເກີນ 48 ແລະ 57 ກິໂລກຣາມ. ນອກຈາກນີ້, ກໍຍັງຄ້ວາໄດ້ 3 ຫລຽນເງິນ ແລະ 1 ຫລຽນ ທອງແດງ, ຊຶ່ງຖືວ່າ ເປັນຜົນງານ ທີ່ດີທີ່ສຸດ ນັບຕັ້ງແຕ່ ສະຫະພັນ ມວຍລາວ ສົ່ງທິມ ເຂົ້າຮ່ວມການແຂ່ງຂັນມາ.
ເຖິງຢ່າງໃດ ກໍຕາມ,
ໃນຖານະ ຫົວໜ້າ ຄຣູຝຶກສອນ ທິມມວຍລາວ, ຮ້ອຍເອກ ປາຖນາ ມີຄວາມຫວັງ ທີ່ຈະຮັກສາມູນເຊື້ອ
ຂອງກິລາ ດັ່ງກ່າວໄວ້ ສໍາລັບ ການແຂ່ງຂັນ ຣາຍການອື່ນໆຕໍ່ໄປ ແລະ ຮຽກຮ້ອງ ທຸກພາກສ່ວນ
ໃຫ້ຄວາມສໍາຄັນ ກັບກິລາມວຍ ໃຫ້ຫລາຍຂຶ້ນ.
”ເຮົາຢາກໃຫ້ຮັກສາ ຣະດັບມວຍ ຂອງເຮົາ ໃຫ້ກ້າວໜ້າ ເຮົາຕ້ອງໃຫ້ ພັກ ແລະ ຣັຖ ແລະ ປະຊາຊົນ ຄົນລາວໝົດທຸກຄົນ ຂໍໃຫ້ ມາອຸປຖັມ ແລະ ຊຸກຍູ້ ມວຍລາວ ເພາະວ່າ ມວຍລາວ ຈັ່ງຄ່ອຍສິກ້າວໄກລໄປຕື່ມອີກ.”
ມວຍລາວ ໃນຊີເກມສ໌ ຄັ້ງນີ້ມີການຊິງໄຊ ທັງໝົດ 13 ຫລຽນຄໍາ, ເຖິງແມ່ນວ່າ ລາວ ຈະຄ້ວາໄດ້ ໜ້ອຍກ່ວາໄທ 1 ຫລຽນ, ແຕ່ມາຮອດ ປັດຈຸບັນ ສະຫະພັນ ມວຍລາວ ກໍເປັນສະຫະພັນ ທີ່ສາມາດ ຄ້ວາຫລຽນຄໍາ ຈາກຊີເກມສ໌ ຄັ້ງນີ້ ຫລາຍທີ່ສຸດ ຂອງປະເທດລາວ.