ສະຫະພັນມວຍສາກົລ ພາກພູມໃຈນຳຜົລງານ

ສະຫະພັນມວຍສາກົລ ສມັກຫລິ້ນ ພາກພູມໃຈນຳຜົລງານ ຂອງນັກກິລາມວຍສາກົລ ແມ່ຍິງລາວ ທີ່ສາມາດຄວ້າຫລຽນເງິນໄດ້ 1 ຫລຽນ ແລະຫລຽນທອງແດງ 3 ຫລຽນ ໃນກາຣແຂ່ງຂັນ ໃນມື້ວັນພຸດທີ່ 16 ທັນວານີ້ ແລະໃນຂນະດຽວກັນ ກໍສນັບສນູນ ໃຫ້ກຳລັງໃຈ ແກ່ນັກກິລາມວຍ ປະເພທຊາຍຂອງທີມລາວ ທີ່ມີກຳໜົດແຂ່ງໃນມື້ວັນທີ່ 17 ທັນວານີ້ອີກ 2 ຣຸ້ນໃນຈຳນວນ 4 ຣຸ້ນທັງໝົດ, ດັ່ງທ່ານສີສຸພັນ ແສງສວັນ ຮອງປະທານສະຫະພັນ ມວຍສາກົລສມັກຫລິ້ນວ່າ:

“ໃຊ້ໄດ້ດີໃນຣະດັບ ໜ້າພໍໃຈ ເພາະວ່ານັກມວຍຜູ້ຍິງເຮົາ ປະເທສລາວກໍເຣີ່ມຝຶກມາ ບໍ່ໄດ້ຫລາຍປີ ຜ່ານເຂົ້າມາເຖິງຮອບຊິງ ໃນຣຸ້ນໜຶ່ງ ເຖິງວ່າຈະເສັຽ ໃຫ້ຟີລິປປິນສ໌ ກໍຖືວ່າສູ້ສຸດໆແລ້ວ”.

ສຳຫລັບມວຍສາກົລ ແມ່ຍິງລາວ ທີ່ສາມາດຜ່ານເຂົ້າຮອບຊິງ ຫລຽນຄຳ ໃນຣຸ້ນນ້ຳໜັກ 48 ກິໂລກຼາມຄັ້ງນີ້ ຄືນາງມີວະດີ ຫົງຟ້າ ນັກກິລາມວຍຫລຽນຄຳ ຈາກກິລາແຫ່ງຊາຕປີ 2008 ແຕ່ເສັຽຄະແນນ 4 ຕໍ່ 15 ໃຫ້ແກ່ນາງ Alice Apparri ຈາກຟີລິປປິນສ໌ ເຈົ້າຂອງຫລຽນເງິນ ຈາກຊີເກມສ໌ຄັ້ງ ທີ່ 24 ທີ່ໂຄຣາຊ.

ນອກນັ້ນ ນັກມວຍແມ່ຍິງລາວ ຍັງໄດ້ຫລຽນທອງແດງອີກ 3 ຫລຽນ ຈາກຣຸ້ນນ້ຳໜັກ 46, 51 ແລະ 54 ກິໂລກຼາມ. ສຳຫລັບກາຣແຂ່ງຂັນ ປະເພທຊາຍ ທາງສະຫະພັນກໍຫວັງ ຈະໃຫ້ໄດ້ຫລຽນຄຳໃນ 2 ຣຸ້ນດ້ວຍກັນ ດັ່ງທ່ານສີສຸພັນ ໄດ້ກ່າວເພີ່ມວ່າ:

“ພວກປະເພທຊາຍ ຕັ້ງເປົ້າໄວ້ 1 ຫລຽນ ຖ້າໂຊຄດີດີກໍ (ຈະ) ໄດ້ 2 ຫລຽນ ກໍຕັ້ງເປົ້າໄວ້ຣຸ້ນ 64 ກິໂລກຼາມ ກັບ 45 ກິໂລກຼາມ ເຂົ້າຊິງ 4 ຣຸ້ນ”.

ທ່ານສີສຸພັນ ໄດ້ກ່າວຢ້ຳວ່າ ສຳຫລັບມວຍສາກົລ 2 ຣຸ້ນທີ່ນັກກິລາລາວ ຜ່ານເຂົ້າຊິງໃນມື້ວັນ ພຣະຫັດນີ້ນັ້ນ ແມ່ນຣຸ້ນນ້ຳໜັກ 51 ແລະ 69 ກິໂລກຼາມ ຢູ່ສນາມກິລາ ທີ່ດົງໂດກແຕ່ບ່າຍ 2:00 ໂມງເປັນຕົ້ນໄປ.