ການແຂ່ງຂັນກິລາ ທີ່ ຈໍາປາສັກ
2008.10.31
ໃນຣະຫວ່າງ ວັນທີ 8-21 ເດືອນທັນວາ ແຂວງຈຳປາສັກ ໄດ້ຖືກມອບຫມາຍ ໃຫ້ເປັນ ເຈົ້າພາບ ຈັດການແຂ່ງຂັນກີລາ ແຫ່ງຊາດ ຂື້ນ ເປັນຄັ້ງທີ 8 ຊື່ງໃນເວລານີ້ ວຽກງານການກະກຽມ ກໍ່ສຳເຣັດ ໄປແລ້ວ 90% ດັ່ງທ່ານ ວີສົງຄາມ ບານທັມມະວົງ, ຫົວຫນ້າ ຜແນກກິລາ ປະຈຳແຂວງ ຈຳປາສັກ ເວົ້າວ່າ:
“ທຸກສີ່ງ ທຸກຢ່າງກຽມພອ້ມ ສະພາບລວມປະມານ 90% ແລ້ວ ທາງຣັຖບານ ມອບໃຫ້ແຂວງໃຊ້ຈ່າຍ ຈຳປາສັກ ເກມ 138 ຕື້ກີບ ເບີກບານ ມ່ວນຊື່ນ ໃຫ້ລື່ນການແຂ່ງຂັນ ກິລາ ແຫ່ງຊາດຄັ້ງທີ 7”.
ການກະຕຽມ ກໍ່ແມ່ນ ການປັບປຸງ ສນາມກີລາ ໃຫ້ໄດ້ມາຕຖານ, ສ້າງໂຄງຮ່າງ ພື້ນຖານ ໃນການແຂ່ງກີລາ ເຊັ່ນ ຖນົນບາງເຂດ ແລະ ບ້ານພັກ ນັກກີລາ ກໍ່ຕ້ອງໄດ້ປັບປຸງ ຍົກຣະດັບ ຕຣອດຮອດ ການທຳຄວາມສະອາດ ຕາມເຂດຕ່າງໆ ເພື່ອຮອງຮັບ ນັກກິລາ ຈາກທົ່ວປະເທດ ທີ່ຈະເດີນທາງ ມາແຂ່ງຂັນ.
ກິລາ ທີ່ຈະຄັດເລືອກ ເຂົ້າມາແຂ່ງຂັນ ໃນຈຳປາສັກເກມ ເທື່ອນີ້ ກໍ່ມີຢູ່ 24 ປະເພດ ໃນນັ້ນ ກໍ່ມີກິລາພື້ນເມືອງ ປະເພດ ຕີຫມາກຂ່າງ ຍີງຫນ້າ ແລະ ປະເພດອື່ນໆ ນອກຈາກ ກີລາສາກົນດັ່ງເຕະບານ ບວນບ້ວງ ແລະ ອື່ນໆ. ທາງການແຂວງ ຄາດວ່າ ຈະມີ ນັກກິລາກວ່າ 6 ພັນຄົນ ຈາກ 17 ແຂວງ 6 ກະຊວງ ແລະ 2 ອົງການ ເຂົ້າຮ່ວມ ການແຂ່ງຂັນເທື່ອນີ້. ກິລາ ແຫ່ງຊາດ ເປັນກີລາມະຫະກຳ ໃນລາວ ທີ່ຈັດຂື້ນ ໃນແຕ່ລະປີ ແລະ ກໍ່ມີການປ່ຽນກັນເປັນ ເຈົ້າພາບ ປີນີ້ ແມ່ນແຂວງຈຳປາສັກ.