ປະຊາຊົນລາວ ຕາມບໍຣິເວນ ແຄມແມ່ນ້ຳຂອງ ເມືອງສີໂຄຕຕະບອງ ຊື່ງເປັນເຂຕໜື່ງ ທີ່ໄດ້ຮັບຄວາມເສັຍຫາຍ ຈາກພັຍນ້ຳຖ້ວມປີນີ້ ກຳລັງ ລໍຖ້າ ຄວາມຊ່ວຍເຫລືອ ຕ່າງໆ ຈາກທາງພາຄສ່ວນ ຣັຖບາລ ຫລື ໜ່ວຍງານ ກ່ຽວຂ້ອງ ດັ່ງຊາວບ້ານ ຜູ້ໜື່ງ ໄດ້ກ່າວວ່າ:
" ຍັງ ບໍ່ມີ ຣັຖບາລຊ່ວຍຫາອີຫຍັງ ຍັງບໍ່ມີ ມີແຕ່ຂະເຈົ້າ ຈະຊ່ວຍປັ່ນນ້ຳ ຢູ່ທາງໃຫຍ່ພູ້ນ ຂະເຈົ້າ ຈະບໍ່ໃຫ້ນ້ຳຄອງອອກໄປ ແຖວໃນເມືອງ ອອກໄປຫົນທາງ ແຕ່ວ່າ ຖ້າເປັນພວກ ຢູ່ທາງທ່າ ທາງຝັ່ງນ້ຳ ຂະເຈົ້າ ຍັງບໍ່ໄດ້ຊ່ວຍ ຫຍັງເລີຽ ເຫັນເພີ່ນເວົ້າສິຊ່ວຍຢູ່ ບໍ່ເຫັນມາປານນີ້"
ຊາວລາວ ເມືອງສິໂຄຕຕະບອງ ດັ່ງກ່າວໄດ້ແຈ້ງ ເພີ່ມວ່າ ເຣື່ອງກາຣຊ່ວຍເຫລືອນັ້ນ ໄດ້ຂ່າວວ່າຊາວບ້ານອື່ນ ທີ່ໄດ້ປະສົບກັບ ເຫຕກາຣ ນ້ຳຖ້ວມເຊັ່ນກັນນັ້ນ ກໍໄດ້ຮັບກາຣຊ່ວຍເຫລືອແລ້ວ ແຕ່ວ່າໝູ່ບ້ານ ຂອງຕົນນັ້ນ ຍັງບໍ່ໄດ້ຮັບຫຍັງ ເທື່ອເລີຽ ສະນັ້ນ ຈື່ງຫວັງວ່າ ທາງກາຣຣັຖບາລ ແລະ ໜ່ວຍງານກ່ຽວຂ້ອງ ຄົງຈະໃຫ້ ຄວາມຊ່ວຍເຫລືອ ພວກຕົນ ໃນໄວໆນີ້ ດັ່ງທີ່ ນາງໄດ້ກ່າວຢ້ຳວ່າ:
"ກໍຍາກແບບໃຫ້ມາຊ່ວຍ ຂົນເຄື່ອງມາຫຍັງໃຫ້ ແລະກໍມາຊ່ວຍອາຫາຣແບບເຂົ້າສາຣ ເພາະວ່າເຮົາອອກໄປຊື້ຢູ່ນອກ ເຮົາກໍອອກໄປຊື້ຍາກ ເພາະວ່າມັນຢູ່ໃນ ກໍຍັງບໍ່ມາທັນຊ່ວຍທີ່ເດືອດຮ້ອນ"
ເຖີງຢ່າງໃດກໍຕາມ ສະຖານະກາຣ ນ້ຳຖ້ວມ ໃນປັຈຈຸບັນນີ້ ຍີ່ງເຮັດໃຫ້ປະຊາຊົນ ມີຄວາມວິຕົກກັງວົນຫລາຍເພີ່ມຂື້ນ ຍ້ອນຣະດັບນ້ຳ ຍັງບໍ່ທັນມີ ວິແວວ ຈະຫລຸດລົງ ພ້ອມກັບຍັງ ມີຝົນຕົກ ຢ່າງຕໍ່ເນື່ອງ ທີ່ຈະຍີ່ງ ເຮັດໃຫ້ປະຊາຊົນ ໄດ້ຮັບຄວາມລຳບາກ ທີ່ບໍ່ສາມາດ ທີ່ຈະປະກອບ ອາຊີພ ດ້ານກາຣຄ້າຂາຍໄດ້ແຕ່ຢ່າງໃດ ເນື່ອງຈາກຫ້າງ ຮ້ານຕາມແຄມ ແມ່ນ້ຳຂອງ ໃນບາງບ່ອນ ກໍຖືກນ້ຳຖ້ວມ ເຖີງຊັ້ນ 2 ແລ້ວ ກໍມີ.