ຫວ່າງມໍ່ໆມານີ້ ທາງສຳນັກງານ ພັທນາ ສັງຄົມ ແລະ ຄວາມໝັ້ນຄົງ ຂອງມະນຸສ ແຂວງມຸກດາຫາຣ ຂອງໄທຽ ໄດ້ຈັດກອງປະຊຸມ ຮ່ວມກັບ ສຳນັກງານແຮງງານ ແລະ ສວັດດີກາຣສັງຄົມ ແຂວງສວັນນະເຂຕ ເພື່ອພິຈາຣະນາ ຫາວິທີທາງ ແກ້ໄຂ ບັນຫາ ແລະ ຕໍ່ຕ້ານ ກາຣຄ້າມະນຸສ ຊື່ງກໍຮວມທັງ ກາຣປ້ອງກັນບໍ່ໃຫ້ ເດັກນ້ອຍ ແມ່ຍີງ ຫລື ຜູ້ຊາຍ ຖືກຫລອກລວງ ອອກຈາກ ຄອບຄົວ ໄປສູ່ ວົງກາຣ ທີ່ໄຮ້ມະນຸສຍະທັມ ດັ່ງກ່າວນີ້ ແຕ່ຢ່າງໃດ.
ໃນຂະນະດຽວກັນນັ້ນ ທາງກອງປະຊຸມ ຍັງໄດ້ ພິຈາຣະນາ ທາງດ້ານ ໃຫ້ຄວາມຄຸ້ມຄອງ ຜູ້ທີ່ໄດ້ຮັບຄວາມເສັຽຫາຍ ໂດຽອາສັຍ ຫລັກອະນຸສັນຍາ ທາງດ້ານສິທທິ ຂອງແມ່ຍີງ ແລະ ເດັກ ນ້ອຍ ຕລອດຮອດກາຣຕິດຕາມ ນຳຫາ ຜູ້ກະທຳຜິດ ໄປດຳເນີນຄະດີ ຕາມກົດໝາຍ ຂອງແຕ່ລະ ປະເທສຢ່າງເຂັ້ມງວດ.
ພ້ອມດຽວກັນ ກໍໃຫ້ມີ ກາຣສົ່ງເສີມ ຝຶກອົບຮົມ ເບີ່ງແຍງ ແລະ ຈັດໃຫ້ມີ ໂຄງກາຣ ຝຶກແອບ ໃຫ້ຜູ້ຖືກຫລອກລວງ ໄປນັ້ນ ກັບຄືນມາ ມີວິຊາອາຊີພ ຕ່າງໆ ໂດຽອາສັຍ ຄວາມຄວາມມື ຈາກທຸກພາຄສ່ວນ ດັ່ງທີ່ ທ່ານພິເຊຕພົງ ບຸນງອກ ຫົວໜ້າ ສຳນັກງານ ພັທນາ ສັງຄົມ ປະຈຳ ມຸກດາຫາຣ ໄດ້ກ່າວວ່າ:
"ໃນເວລາດຽວກັນ ເຮົາກໍເອົາຂໍ້ມູລ ຈາກດ່ານ ກວດຄົນເຂົ້າເມືອງ ທາງຕຳຣວຈ ທາງເມືອງ ທີ່ເປັນເຄືອຂ່າຍຣາຍງານ ຜົລວ່າ ມີເຫຕກາຣເກີດຂື້ນ ຢູ່ເຂຕໃດ ເປັນເຫຕກາຣ ທີ່ເຂົ້າໃນ ລັກສນະ ກາຣຄ້າມະນຸສ ຫລືບໍ? ຖ້າຈັບ ຜູ້ທີ່ຕ້ອງສົງສັຍນັ້ນ ໄດ້ກໍຄວນ ທີ່ຈະສົ່ງໄປ ເຂົ້າຮ່ວມ ກັບໂຄງກາຣ ທີ່ວ່າ 'ສະຫະ ວິຊາຊີພ' ນັ້ນ"
ເຖີງຢ່າງໃດກໍຕາມ ທາງໜ່ວຍງານ ກ່ຽວຂ້ອງ ທັງສອງຝ່າຍ ໂດຽສະເພາະ ຈາກແຂວງສວັນນະເຂຕ ແລະ ມຸກດາຫາຣ ດັ່ງກ່າວ ແມ່ນໄດ້ ປະສານງານ ແລະ ຮ່ວມມືກັນ ເປັນປະຈຳ ໂດຽສະເພາະ ແຕ່ປີ 2004 ຜ່ານມາ ພາຍຫລັງ ທີ່ມີກາຣລົງນາມ ເພື່ອຄວາມເຂົ້າໃຈ ຣະຫວ່າງກັນ ເພື່ອກຳຈັດ ແລະ ສກັດກັ້ນ ຊື່ງທາງກາຣ ສປປລາວ ກໍຮັບຮູ້ວ່າ ມີບັນຫາ ກາຣຄ້າມະນຸສ ທີ່ແພ່ຫລາຍ ໃນປັຈຈຸບັນນີ້ ນັ້ນເຊັ່ນກັນ.