ທາງການຈີນ ເຂົ້າຊ່ວຍຍິງລາວ
2009.06.15
ທາງການຈີນ ຈາກ ແຂວງຍຸນນານ ໄດ້ຊ່ອຍເຫລືອ ແມ່ຍິງລາວ ຜູ້ນຶ່ງຊື່ຄຳລີ້ (ຊື່ສົມມຸດ) ທີ່ຖືກນາຍໜ້າ ຄ້າມະນຸດ ຊາວລາວ ແຂວງຫລວງນ້ຳທາ ຫລອກລວງໄປ ຂາຍບໍຣິການ ຊຶ່ງທາງການຈີນ ໄດ້ພໍ້ໂຕແລະ ກຳລັງຕິດຕໍ່ ຫາທາງສົ່ງກັບ ຄືນບ້ານ. ເຈົ້າໜ້າທີ່ ກ່ຽວຂ້ອງ ອະທິບາຍວ່າ:
"ຕາມພໍ່ມັນເລົ່າ ໃຫ້ຟັງວ່າກ່ອນ ເຂົາອອກໄປຫັ້ນ ເຂົາບໍ່ໄດ້ບອກ ພໍ່ບອກແມ່ ແລະກໍເວລາໄປ ກໍວ່າຈະເອົາໄປ ຂາຍເຄື່ອງ ໃຫ້ເປັນຜູ້ຂາຍ ເຄື່ອງແລ້ວໄລ່ ເງິນເດືອນ ໃຫ້ຕາມພໍ່ແມ່ ເພິ່ນແຈ້ງໃຫ້ຊາບ ວ່າເອົາໄປຂາຍ ເຄື່ອງຢູ່ຈີນ ແຕ່ວ່າໄປຮອດ ຈຸດຕ່າງໆ ເຂົ້າໄປໃນຈີນ ແລ້ວກໍຈຳນວນ ສາມຄົນ ເຫັນສະພາບມີ ການປ່ຽນແປງ ເຂົາກໍເລີຍ ໂຕນໜີສ່ວນນາງ ອັນນີ້ກໍເຂົາ ເອົາໄປເລີຍ."
ທ່ານ ແສງຄຳ ດວງດາຣາວົງ ເຈົ້າໜ້າທີ່ຂັ້ນສູງ ຈາກຫ້ອງການ ແຮງງານ ແຂວງອຸດົມໄຊ ໃຫ້ຂໍ້ມູນອີກ ວ່ານາງຄຳລີ້ ຖືກນາງແສງ (ຊື່ສົມມຸດ) ຊັກຈູງຕົ້ວະຍົ້ວະ ວ່າຈະພາໄປ ເຮັດການຮັບຈ້າງ ຢູ່ແຂວງຍຸນນານ ປະເທດຈີນ ໂດຍບອກວ່າມີ ວຽກດີເງິນດີ ຖືກຕ້ອງຕາມ ກົດໝາຍ ຈົນນາງຄຳລີ້ ແລະໝູ່ອີກ 4ຄົນ ຫລົງເຊື່ອຈຶ່ງພາ ກັນລັກໜີໄປ ຕອນພໍ່ແມ່ໄປ ເຮັດໄຮ່ເຮັດນາ. ແຕ່ເມື່ອເຖິງ ເມືອງຈີນແລ້ວ ແມ່ຍິງ 3ຄົນໂຕນໜີອອກ ມາໄດ້ກ່ອນ ສ່ວນນາງຄຳລີ້ ໄດ້ຖືກນາຍໜ້າ ຄ້າມະນຸດ ນຳເອົາ ໂຕໄປຂາຍ ບໍຣິການ ໃຫ້ຄົນຈີນ ອີກຕໍ່ນຶ່ງ. ເຫດການນີ້ເກີດ ຂື້ນຕັ້ງແຕ່ກາງ ປີ 2008. ຈົນຮອດເດືອນ ມີນາ 2009 ຄອບຄົວຂອງນາງ ຄຳລີ້ ຈຶ່ງຮູ້ວ່າຖືກ ນາງແສງ ຫລອກລວງ ສົ່ງໄປຂາຍ ບໍຣິການ ຢູ່ຈີນ. ຈຶ່ງຕິດຕໍ່ຫາ ທາງການລາວ ແລະອົງການເພື່ອ ສິດທິມະນຸດ ເອກກະຊົນແລ້ວກໍ ປະສານງານໄປ ຫາທາງການຈີນ ຈົນຫາ ໂຕພົບດັ່ງກ່າວ ແລະລໍຖ້າການ ສົ່ງກັບ. ສ່ວນນາງແສງ ປາກົດວ່າຖືກ ທາງການລາວ ແຂວງອຸດົມໄຊ ຈັບແລະໄດ້ ໃຫ້ການ ຮັບສາຣະພາບ. ດັ່ງເຈົ້າໜ້າທີ່ ເວົ້າວ່າ:
"ນາງອັນນີເປັນ ຄົນຫລວງນ້ຳທາ ແຕ່ວ່າມາຮອດ ອາທິດທີ່ແລ້ວ ປາກົດຕົວຢູ່ ທີ່ໄປຂາຍອັນນັ້ນ ເຂົ້າມາບ້ານເຮົາ ກໍເລີຍກັກຕົວ ທຳການສອບສວນ ກໍໄດ້ໃຫ້ ສາຣະພາບວ່າ ໄດ້ເອົາໄປ ຂາຍແທ້."
ສຳລັບຂະບວນ ການຄ້າມະນຸດ ໃນແຂວງ ຫລວງນ້ຳທາ ເຈົ້າໜ້າທີ່ ໃຫ້ຂໍ້ມູນວ່າ ມີຢູ່ແຕ່ບໍ່ຫລາຍ ໃນລັກສະນະ ຊັກຈູງຕົ້ວະຍົ້ວະ ແລ້ວເດັກນ້ອຍ ແລະຊາວໜຸ່ມທີ່ ຮູ້ເທົ້າບໍ່ເຖິງການ ກໍຫລົງເຊື່ອ ແລະເສັຍທ່າ.