ຣະດົມ ປະຊາຊົນ ໃຫ້ໃຊ້ ນໍ້າສະອາດ ພາຍຫລັງ ນໍ້າຖ້ວມ
2008.08.30
ຫລັງຈາກ ສະພາບນ້ຳຖ້ວມ ໄດ້ບົກແຫ້ງລົງ ເປັນປົກຕິ ແລ້ວນັ້ນ ທາງກາຣ ກ່ຽວຂ້ອງ ຂອງລາວ ກໍສືບຕໍ່ ແນະນຳ ໃຫ້ປະຊາຊົນ ໄດ້ໃຊ້ ແຕ່ນ້ຳທີ່ສະອາດ ແລະ ເຖີງແມ່ນວ່າ ນ້ຳໃຊ້ນັ້ນ ຈະເປັນ ນ້ຳບາດາລ ບໍ່ນ້ຳສ້າງ ນ້ຳຂອງ ຫລື ຕາມແມ່ນ້ຳສາຂາ ຕ່າງໆກໍຕາມ ຄວນຈະ ແກວ່ງຫີນສົ້ມ ໃຫ້ໃສເສັຽກ່ອນ ພ້ອມຄວນຕົ້ມ ໃຫ້ຟົດ ແລະ ສຸກຕາມ ມາຕຖານ ກ່ອນຈະນຳໄປ ບໍຣິໂພຄ ດັ່ງເຈົ້າໜ້າທີ່ ຈາກກະຊວງສາທາຣະນະສຸຂ ຜູ້ໜື່ງ ໄດ້ກ່າວວ່າ:
“ຂໍໃຫ້ ຣະມັດຣະວັງ ຂໍໃຫ້ດື່ມ ນ້ຳສະອາດ ກາຣຊອກຫາ ນ້ຳສະອາດ ກໍແມ່ນ ນ້ຳດື່ມບໍຣິສຸທ ຖ້າວ່າບໍ່ມີນ້ຳດື່ມ ກໍໃຊ້ນ້ຳຂອງ ຫລື ນ້ຳຝົນ ແຕ່ວ່າ ຕ້ອງໃຫ້ໄດ້ ມັນໃສ”
ເຈົ້າໜ້າທີ່ລາວ ດັ່ງກ່າວ ໄດ້ເນັ້ນວ່າ: ຖ້າປະຊາຊົນ ຫາກນຳເອົານ້ຳຈ າກແມ່ນ້ຳລຳຄອງ ຕ່າງໆ ມາໃຊ້ນັ້ນ ກໍຢາກໃຫ້ ກວດສອບ ເບີ່ງວ່າ ສະອາດພຽງພໍ ຫລືບໍ ແລະ ໂດຽສະເພາະ ຖ້າຈະເອົາມາ ດື່ມມາກິນກໍຄວນ ຈະຕົ້ມໃຫ້ຟົດໆ ເພື່ອຂ້າເຊື້ອໂຣຄ ຫລື ແບຄທີເຣັຽ ຕ່າງໆ ທີ່ອາຈຈະ ກໍ່ໃຫ້ເກີດ ໂຣຄທີ່ຮ້າຍແຮງຂື້ນມາ ໄດ້ ໂດຽສະເພາະ ໃນເຂຕພື້ນ ທີ່ຕາມແຂວງຕ່າງໆ ທີ່ຢາກໃຫ້ ປະຊາຊົນ ເອົາໃຈໃສ່ ເພື່ອປ້ອງກັນ ເປັນພິເສດ ດັ່ງທີ່ທ່ານ ໄດ້ກ່າວ ຢ້ຳອີກວ່າ:
“ຣະຍະນີ້ ກໍອາຈຈະຂາດເຂີນ ເປັນນ້ຳ ທາງແຜນກ ສາທາຣະນະສຸຂ ຢາກຈະ ຂໍແນະນຳ ໃຫ້ປະຊາຊົນ
ຢູ່ບ່ອນທີ່ ມີນ້ຳຖ້ວມນັ້ນ ເອົາໃຈໃສ່ ເຣື່ອງກາຣປ້ອງ ກັນຮັກສາ ສຸຂພາບ”
ເຖີງຢ່າງໃດກໍຕາມ ເຊື້ອໂຣຄ ຕ່າງໆ ທີ່ທາງເຈົ້າໜ້າທີ່ ວ່າ ມັກຈະມາກັບ ນ້ຳສົກປົກ ຫລື ມາກັບນ້ຳຖ້ວມນັ້ນ ກໍປະກອບດ້ວຍເຊື້ອໂຣຄ ຕາແດງ ຖອກທ້ອງ ອະຫິວາ ຍ່ຽວໜູ ຕີນມືເປື່ອຽ ແລະ ອື່ນໆຫລາຍຊນິດນຳດ້ວຍ.