ແຂວງ ຫຼວງນ້ຳທາ ຍັງ ລະມັດ ລະວັງ ໄຂ້ຫວັດນົກ ຢູ່ ຕໍ່ໄປ

”ເຣື້ອງ ໄຂ້ຫວັດ ສັດປີກ ນີ້ ເຮົາ ກໍ ຍັງມີ ທີມງານ ສືບຕໍ່ ຍັງ ສືບຕໍ່ ລົງເກັບກຳ ຕົວຢ່າງ ຢູ່. ອາດຈະ ສືບຕໍ່ ໄປຮອດ ປີ 2009 ເພາະວ່າ ເຮົາ ຍັງ ບໍ່ທັນຮູ້ວ່າ ເຊື້ອໄຂ້ຫວັດ ສັດປີກ ທີ່ ພວກເຮົາ ພົບ ຜ່ານມາ ບໍ່ຮູ້ວ່າ ມາແຕ່ໃສ ຫຼືວ່າ ມັນອາດຈະ ບົ່ມຊ້ອນ ຢູ່ ໃນ ທ້ອງຖິ່ນ ນີ້.”

ໃນ ປັດຈຸບັນ ນີ້ ເຖິງ ແມ່ນວ່າ ຈະມີ ການອະນຸຍາດ ໃຫ້ມີ ການ ຊື້ຂາຍ ຫຼື ກິນ ແລະ ເຄື່ອນຍ້າຍ ສັດປີກ ໃນ ແຂວງ ຫຼວງນ້ຳທາ ໄດ້ ຕາມປົກກະຕິ ແລ້ວ ກໍຕາມ, ທາງການ ກ່ຽວຂ້ອງ ຍັງ ຄົງ ເກັບຕົວຢ່າງ ສັດ ຕາມ ຕລາດ ຕາມ ເຮືອນຊານ ແລະ ຊາກ ສັດປີກ ຕາມ ທັມມະຊາດ ຢູ່ ຕລອດ ມາ, ຮວມເຖິງ ການກວດກາ ສັດປີກ ທີ່ ນຳເຂົ້າມາ ຈາກ ປະເທດ ໄກ້ຄຽງ ເພື່ອ ໃຫ້ ຮູ້ຈັກ ທີ່ມາ ທີ່ໄປ ຂອງ ສັດ ແລະ ເພື່ອ ປ້ອງກັນ ບໍ່ໃຫ້ ພະຍາດ ນີ້ ລະບາດ ຄືນໃໝ່ ອີກ.

ທາງການ ຍັງ ບໍ່ຮູ້ ສາຍເຫດ ທີ່ ແທ້ຈິງ ໃນ ການລະບາດ ທີ່ ໄດ້ເກີດຂື້ນ ໃນ ຕົ້ນປີ ທີ່ ຜ່ານມາ, ດັ່ງທີ່ ດຣ ສແວງ ໄດ້ເວົ້າ ກ່ຽວກັບ ການລະບາດ ນັ້ນວ່າ:
”ຈາກ ປະສົບການ ໂຕນີ້, ເປັນ ບົດຮຽນ ສຳຄັນ ຂອງ ພວກເຮົາ. ຖ້າວ່າ ມີ ກໍຣະນີ ໜ້າສົງສັຍ, ພວກເຮົາ ອາດ ຈະຕ້ອງ ສອບສວນ ຫຼືວ່າ ການຄວບຄຸມ ອາດຈະ ໄດ້ ໄວກວ່ານີ້. ເພາະວ່າ ຜ່ານມາ ພວກເຮົາ ກໍ ເຮັດໄດ້ດີ ແລ້ວ; ແຕ່ ມັນ ກໍຍັງມີ ບາງອັນ ທີ່ ທັນ ວ່ອງໄວ.”

ການລະບາດ ເທື່ອ ທຳອິດ ຂອງ ໄຂ້ຫວັດນົກ ຢູ່ ແຂວງ ຫຼວງນ້ຳທາ ໄດ້ມີ ການທຳລາຍ ສັດປີກ ໄປ ກວ່າ 4,000 ໂຕ ແລະ ໄຂ່ໄກ່ ອີກ ຫຼາຍພັນ ໜ່ວຍ, ເປັນເງິນ ປະມານ 80 ລ້ານ ກີບ. ໂຊກດີ ທີ່ການແພ່ລາມ ຂອງ ໄຂ້ຫວັດນົກ ບໍ່ ໄດ້ຕິດຕໍ່ໄປ ຮອດ ຊາວບ້ານ.

ຄຳສັບ ຊອກຫາຂໍ້ມູນ: ໂຣຄຕິດຕໍ່ communicabledisease