ຊຸມນຸມ ອະດີດ ຄຣູ ແລະ ນັກສຶກສາ ດົງໂດກ
ອະດີດ ນັກສຶກສາ ແລະ ອາຈານສອນ ຈາກ ມະຫາວິທະຍາລັຍ ສ້າງຄຣູດົງໂດກ ຜແນກ ພາສາອັງກິດ ຈັດການຊຸມນຸມ ຢູ່ຊຽງໃໝ່ ປະເທດໄທ.
-
ໂພໄຊສວັດ ຣາຍງານ
2008-11-04 -
-
-
ເມື່ອຣະຫວ່າງ ວັນທີ 26 ຕຸລາ ຫາ 1 ພຶດສະຈິກາ ຜ່ານມາ ໄດ້ມີກຸ່ມອະດີດສຶກສາ ດັ່ງກ່າວ ຈາກທຸກທົ່ວມູມໂລກ ນັດພົບ ເພື່ອພົບປະສັງສັນ ລະລຶກເຖິງອະດີດ ເມື່ອ 30 ກວ່າປີກ່ອນ ທີ່ໄດ້ສຶກສາ ຮໍ່າຮຽນ ຮ່ວມສະຖາບັນຢູ່ ດົງໂດກ ໂດຍສະເພາະ ຜແນກພາສາອັງກິດ.
ຈຸດປະສົງ ຂອງການ ນັດພົບ ຂອງພວກຂະເຈົ້າ ກໍເພື່ອຮື້ຟື້ນ ຄວາມສັມພັມ ໃນອະດີດ, ສ້າງເຄືອຄ່າຍ ການຕິດຕໍ່ ທີ່ຂາດຫາຍໄປ ສໍາລັບບາງຄົນ ເປັນເວລາ 30 ກວ່າ ປີ ໃຫ້ກັບຄືນມາອີກ.
ໃນການຊຸມນຸມ ໄດ້ມີ ອະດີດນັກສຶກສາ ແລະ ອາຈານສອນ ຈາກ ທົ່ວໂລກ ເຂົ້າຮ່ວມ ທັງໝົດ ເກືອບ 100 ຄົນ ເຊັ່ນຈາກ ລາວ, ໄທ, ອອສເຕຣເລັຍ, ນິວຊີແລນ, ຝັ່ຣງເສດ, ອັງກິດ, ເຢຣະມັນ, ສະເປນ, ຄານາດາ, ສະຫະຣັດ ອະເມຣິກາ, ຄູເວດ ແລະ ດູບາຍ.
ກິດຈະກັມ ກໍມີ ການໄປທ່ຽວຊົມ ສະຖານທີ່ ຕ່າງໆ ໃນເຂດ ຊຽງໃໝ່ ການກິນເຂົ້າ ຮ້ອງເພງ ຮ່ວມກັນ ການກ່າວສົນທະນາ ປາສັຍ ຂອງຜູ້ເຂົ້າຮ່ວມ. ໃນໂອກາດນີ້ ຍານາງ ນິຍົມ ປັດສມໍ ຜູ້ປະສານງານ ໃນການເຕົ້າໂຮມກັນ ຈາກປະເທດ ດູບາຍ ໃນຕາເວັນອອກກາງ ໄດ້ເວົ້າເຖິງ ເຫດການ ທີ່ດົນໃຈ ໃນການຈັດການ ພົບປະສັງສັນກັນ ໃນຄັ້ງນີ້ວ່າ:
“ຍ້ອນມີຄວາມຮູ້ສຶກ ວ່າ ຜູ້ໃດ ກໍມີອາຍຸ ເຖົ້າແກ່ ຂື້ນມາແລ້ວ ອັນນີ້ ອາດຈະເປັນໂອກາດ ສຸດທ້າຍ ທີ່ຈະໄດ້ມາຮ່ວມ ມັນເປັນງານ ອັນຍິ່ງໃຫຍ່ ອັນນຶ່ງ ກໍວ່າໄດ້ ທີ່ຈະມີການຕຸ້ມລຸມ ຄົນທີ່ມາ ເກືອບທົ່ວໂລກ ກໍວ່າໄດ້.”
ບັນຍາກາດ ໃນການພົບປະ ໝູ່ເພື່ອນ ເກົ່າ ເຮັດໃຫ້ພວກຂະເຈົ້າ ມີຄວາມດີອົກດີໃຈ ທັງພາກັນຮ້ອງໄຫ້ ແລະ ຫົວຊຸມແຊວ ມ່ວນຊື່ນ ເມື່ອໄດ້ເວົ້າເຖິງ ອະດີດ ແລະ ເລົ່າຊີວິດ ການເປັນຢູ່ ທີ່ຜ່ານມາ ແລະ ໃນປັດຈຸບັນ ສູ່ກັນຟັງ ແລະ ຄວາມຕື່ນເຕັ້ນ ກະຕືລືລົ້ນ ຍ້ອນບໍ່ເຄີຍ ຄາດໝາຍວ່າ ຈະໄດ້ມາພົບກັນອີກ ໃນຊີວິດນີ້ ຫລັງຈາກ ທີ່ບາງຄົນ ໄດ້ຈາກກັນໄປ ດົນກວ່າ 30 ປີ.
ເນື່ອງຈາກວ່າ ໝູ່ເພື່ອນ ໄດ້ຈາກຢາຍກັນ ໄປຢູ່ ທຸກທົ່ວມູມໂລກ ການຈັດແຈງ ໃນການນັດພົບ ແລະ ການລິເລີ້ມຈຶ່ງ ມີຄວາມຍາກລໍາບາກ ພໍສົມຄວນ ດັ່ງນາງ ໄດ້ຊີ້ແຈງເພີ້ມຕື່ມ ວ່າ:
“ສໍາລັບ ຄວາມຍຸ້ງຍາກ ກໍມີຢູ່ ວ່າ ການຕິດຕໍ່ ເພາະວ່າ ຜູ້ໃດ ກໍຢູ່ຫ່າງກັນ ໃຜກໍຢູ່ corner of the world ເຮົາໄດ້ຕິດຕໍ່ກັນ ແຕ່ໃນ Email ສ່ວນຫລາຍເນາະ ຂ້ອຍນັ່ງ ເກືອບ ທຸກມຶ້ ທຸກມຶ້ ທຸກມຶ້”
ເຖິງຢ່າງໃດກໍຕາມ ຄວາມຮູ້ສຶກດີອົກດີໃຈ ທີ່ໄດ້ເຫັນໄດ້ພົບໄດ້ສໍາພັດ ກັບໝູ່ເພື່ອນ ຄຣູ ອາຈານ ອີກເທື່ອນຶ່ງ ກໍເຮັດໃຫ້ ການເສັຍສະລະໃນຄັ້ງນີ້ມັນຄຸ້ມຄ່າ.
ນອກຈາກ ນີ້ທາງກຸ່ມນັກຮຽນນັກສຶກສາເລົ່ານີ້ ຍັງໄດ້ຝາກ ຄວາມຄິດຮອດຄິດເຖິງ ໝູ່ເພື່ອນ ທຸກໆຄົນ ຈາກຜແນກ ພາສາອັງກິດ ດົງໂດກ ທີ່ບໍ່ສາມາດ ມາຮ່ວມ ວ່າຄິດຮອດຄິດເຖິງ ທຸກໆຄົນ ຢູ່ສເມີ ເຖິງວ່າຈະໄດ້ແຍກກັນໄປ ຢູ່ຄົນລະ ສຸດຂອບຟ້າກໍ່ຕາມ.
ທີ່ຜ່ານມາ ກຸ່ມນັກສຶກສາເລົ່ານີ້ກໍເຄີຍໄດ້ຈັດ ການຊຸມນຸມມາແລ້ວ ແຕ່ທຸກໆຄັ້ງກໍມີຣົດຊາດ ຄວາມຮູ້ສຶກ ແລະ ຄວາມແຕກຕ່າງຂອງແຕ່ລະເທື່ອ ໃນໂອກາດໜ້າກໍກະວ່າ ຈະມີການ ພົບປະຊຸມນຸມກັນອີກ ແຕ່ຍັງບໍ່ທັນໄດ້ມີ ກໍາໜົດເທື່ອ.